ଏମିତି ଅନେକ ଲୋକ ଅଛନ୍ତି ଯେଉଁମାନେ ଚଷମା ପିନ୍ଧିବାକୁ ପସନ୍ଦ କରନ୍ତିନାହିଁ, ଯେଉଁଥିପାଇଁ ସେମାନେ କଣ୍ଟାକ୍ଟ ଲେନ୍ସ ପିନ୍ଧିଥାନ୍ତି । ବର୍ତ୍ତମାନ ସମୟରେ କଣ୍ଟାକ୍ଟ ଲେନ୍ସ କେବଳ ଚଷମାର ଏକ ବିକଳ୍ପ ନୁହେଁ ବରଂ ଫ୍ୟାସନ୍ ରୂପେ ମଧ୍ୟ ବ୍ୟବହାର କରାଯାଉଛି । ଏହା ଦୃଷ୍ଟି ଶକ୍ତିକୁ ଉନ୍ନତ କରିବା ସହ ଆଖିକୁ ଭଲ ଆକର୍ଷଣ ଲୁକ୍ ଦେଇଥାଏ । ବଜାରରେ ଅନେକ ପ୍ରକାର କଣ୍ଟାକ୍ଟ ଲେନ୍ସ ମିଳିଥାଏ । ଏହି ଲେନ୍ସ ମଧ୍ୟରୁ କେଉଁଟା ଗୋଟିଏ ଥିର ପାଇଁ ତ ଆଉ କେଉଁଟା ଅଧିକ ସମୟ ପାଇଁ ବ୍ୟବହାର କରାଯାଏ । ଆଖିକୁ ଏକ ଆକର୍ଷଣୀୟ ଲୁକ ଦେବା ପାଇଁ ଉଭୟ ମହିଳା ଏବଂ ପୁରୁଷମାନେ ଏହାକୁ ବ୍ୟବହାର କରୁଛନ୍ତି । ହେଲେ ଏହାକୁ ବ୍ୟବହାର କରିବା ସମୟରେ ସର୍ତକତା ଅବଲମ୍ବନ କରିବା ନିହାତି ଆବଶ୍ୟକ ହୋଇଥାଏ । କାରଣ ଲେନ୍ସ ବ୍ୟବହାର ସମୟରେ ସାମାନ୍ୟ ଭୁଲ୍ ବି ଆଖିକୁ ବଡ଼ କ୍ଷତି ପହଞ୍ଚାଇପାରେ ।
ଜାଣନ୍ତୁ କ’ଣ କହନ୍ତି ଡାକ୍ତର?
ଚକ୍ଷୁରୋଗ ବିଶେଷଜ୍ଞଙ୍କ ଅନୁଯାୟୀ, କଣ୍ଟାକ୍ଟ ଲେନ୍ସ ବ୍ୟବହାର କରିବା ସମୟରେ ଟିକେ ଅସାବଧାନତା ଯୋଗୁ ଆପଣଙ୍କ ଆଖିରେ କ୍ଷତି ହୋଇପାରେ । ଲେନ୍ସ ଠିକ୍ ଭାବେ ନ ପିନ୍ଧିଲେ କିମ୍ବା ପରିଷ୍କାର ପରିଚ୍ଛନତା ପ୍ରତି ଧ୍ୟାନ ନଦେଲେ ଆଖିରେ ବ୍ୟାକ୍ଟେରିଆ ଫଙ୍ଗଲ ସଂକ୍ରମଣ ହେବାର ଆଶଙ୍କା ଅଧିକ ଥାଏ । ଫଳରେ ଦୃଷ୍ଟି ଶକ୍ତି ଉପରେ ଖରାପ ପ୍ରଭାବ ପଡିଥାଏ । ତେଣୁ କଣ୍ଟାକ୍ଟ ଲେନ୍ସକୁ ସବୁବେଳେ ସଫା ରଖିବା ନିହାତି ଆବଶ୍ୟକ ହୋଇଥାଏ ।
ଭୁଲ ଉପାୟରେ ଲେନ୍ସ ପିନ୍ଧିଲେ ବିଭିନ୍ନ ପ୍ରକାର ସମସ୍ୟା ଦେଖାଦେଇଥାଏ, ଯେପରି – ଆଖି ପୋଡ଼ାଜଳା ହେବା, ଲାଲ୍ ପଡ଼ି ଯିବା, ବ୍ୟାକ୍ଟେରିଆ ଓ ଫଙ୍ଗଲ ସଂକ୍ରମଣ, କର୍ନିଆଲ ଅଲସର୍ କିମ୍ବା ଘା’, ଦୃଷ୍ଟି ଶକ୍ତି ଖରାପ ହେବା, ଶୁଷ୍କ ଆଖି ଇତ୍ୟାଦି ।
କଣ୍ଟାକ୍ଟ ଲେନ୍ସ ପିନ୍ଧିବାର ଠିକ୍ ଉପାୟ :
• ଲେନ୍ସକୁ ସବୁବେଳେ ସଠିକ୍ ଭାବରେ ପିନ୍ଧିବା ଆବଶ୍ୟକ । ଏହାକୁ ପିନ୍ଧିବା ସମୟରେ ସାବଧାନତା ଅବଲମ୍ବନ କରନ୍ତୁ ।
• ସବୁବେଳେ ସଫା ଏବଂ ସୁଖିଲା ହାତରେ ଲେନ୍ସ ଲଗାନ୍ତୁ ।
• ଆଖି କୁଣ୍ଡେଇ ହେଲେ କିମ୍ବା ପୋଡ଼ାଜଳା ହେଲେ ତୁରନ୍ତ ଲେନ୍ସ ବାହାର କରନ୍ତୁ ।
• ୮-୧୦ ଘଣ୍ଟାରୁ ଅଧିକ ସମୟ ଲେନ୍ସ ଲଗାନ୍ତୁ ନାହିଁ ।
• ଡାକ୍ତର ପରାମର୍ଶ ଦେଇଥିବା ଅନୁସାରେ ହିଁ ଲେନ୍ସ ବ୍ୟବହାର କରନ୍ତୁ ।
