ତିରୁପତି: ଏକ ଚଳଚ୍ଚିତ୍ର ରିଲିଜ ପୂର୍ବରୁ ସିନେମା ହଲରେ ମେଣ୍ଢାକୁ ବଳି ଦେଇଥିବା ଅଭିଯୋଗରେ ଆନ୍ଧ୍ରପ୍ରଦେଶ ପୁଲିସ ପାଞ୍ଚ ଜଣଙ୍କୁ ଗିରଫ କରିଛି। ପ୍ରକୃତରେ, ଏହି ଘଟଣା ଜାନୁଆରୀ ୧୨ ତାରିଖରେ ‘ଡାକୁ ମହାରାଜ’ ଚଳଚ୍ଚିତ୍ରର ରିଲିଜ ପୂର୍ବରୁ ଘଟିଥିବା କୁହାଯାଉଛି। କୁହାଯାଉଛି ଯେ ଶୋ ପୂର୍ବରୁ ଏକ ସିନେମା ହଲରେ ଏକ ମେଣ୍ଢାକୁ ବଳି ଦିଆଯାଇଥିଲା, ଏହି ମାମଲାରେ ଏବେ ପାଞ୍ଚ ଜଣଙ୍କୁ ଗିରଫ କରାଯାଇଛି। ଶନିବାର ଜଣେ ଅଧିକାରୀ ଗିରଫଦାରୀ ସମ୍ପର୍କରେ ସୂଚନା ଦେଇଥିଲେ। ‘ପିପୁଲ୍ସ ଫର୍ ଦି ଏଥିକାଲ୍ ଟ୍ରିଟମେଣ୍ଟ ଅଫ୍ ଆନିମଲ୍ସ’ (ପେଟା) ପକ୍ଷରୁ ଏହି ମାମଲାରେ ଏକ ଅଭିଯୋଗ ଇମେଲ୍ ମାଧ୍ୟମରେ ପଠାଯାଇଥିବା ସେ ସୂଚନା ଦେଇଛନ୍ତି। ମିଳିଥିବା ଅଭିଯୋଗ ଆଧାରରେ କାର୍ଯ୍ୟାନୁଷ୍ଠାନ ଗ୍ରହଣ କରି ପୁଲିସ ଶଙ୍କରାୟା, ରମେଶ, ସୁରେଶ ରେଡ୍ଡୀ, ପ୍ରସାଦ ଏବଂ ମୁକେଶ ବାବୁଙ୍କୁ ଗିରଫ କରିଛି।
ମିଳିଥିବା ସୂଚନା ମୁତାବକ ଏହି ସମସ୍ତ ଅଭିଯୁକ୍ତ ଫିଲ୍ମ ରିଲିଜ ପୂର୍ବରୁ ଏକ ମେଣ୍ଢା ବଳି ଦେଇଥିଲେ ଓ ମୁଖ୍ୟ ଅଭିନେତାଙ୍କ ପୋଷ୍ଟରକୁ ରକ୍ତଭିଷେକ କରିଥିଲେ | ଏହି ଫିଲ୍ମରେ ମୁଖ୍ୟ ଭୂମିକାରେ ଅଭିନୟ କରିଛନ୍ତି ଅଭିନେତା ଏନ. ବାଳକୃଷ୍ଣ | ପୁଲିସ ଅଧିକାରୀ ଭେଙ୍କଟ ନାରାୟଣ କହିଛନ୍ତି, “ପେଟାରୁ ଏକ ଇମେଲ୍ ଆସିଥିଲା।” ସେମାନେ ଇମେଲ୍ ମାଧ୍ୟମରେ ଏସପିଙ୍କ ନିକଟରେ ଅଭିଯୋଗ କରିଥିଲେ। ସେହି ଦିନ (ଜାନୁଆରୀ ୧୬) ଆମେ ତିରୁପତି ପୂର୍ବ ପୁଲିସ ଷ୍ଟେସନରେ ତଦନ୍ତ କରି ଏକ ମାମଲା ରୁଜୁ କରିଥିଲୁ।
ନାରାୟଣ କହିଛନ୍ତି ଯେ ପୁଲିସ ପଶୁବଳିରେ ସମ୍ପୃକ୍ତ ଥିବା ସନ୍ଦେହ କରାଯାଉଥିବା ଅନ୍ୟ ଲୋକଙ୍କୁ ମଧ୍ୟ ଖୋଜୁଛି। ପୁଲିସର ସୂଚନା ଅନୁଯାୟୀ, ଜାନୁଆରୀ ୧୨ ତାରିଖ ଦିନ ୩ଟାରେ ମେଣ୍ଢାକୁ ବଳି ଦିଆଯାଇଥିଲା। ସେ କହିଛନ୍ତି ଯେ ଅଭିଯୁକ୍ତଙ୍କୁ ତୁରନ୍ତ ଜାମିନ ମିଳିଛି। ଏହି ପଶୁବଳି ଘଟଣାର ଏକ ଭିଡିଓ ମଧ୍ୟ ସୋସିଆଲ ମିଡିଆରେ ଭାଇରାଲ ହୋଇଥିଲା, ଯେଉଁଥିରେ ଜଣେ ଅଭିଯୁକ୍ତ ମେଣ୍ଢାର ମୁଣ୍ଡକୁ ତା’ ଶରୀରରୁ ଅଲଗା କରୁଥିବାର ଦେଖାଯାଇଥିଲା।
