ରଜନୀକାନ୍ତଙ୍କୁ ଦାଦା ସାହେବ ଫାଲକେ ପୁରସ୍କାର

ରଜନୀକାନ୍ତଙ୍କୁ ଦାଦା ସାହେବ ଫାଲକେ ପୁରସ୍କାର
ରଜନୀକାନ୍ତଙ୍କୁ ଦାଦା ସାହେବ ଫାଲକେ ପୁରସ୍କାର

ମୁମ୍ବାଇ:  ଦକ୍ଷିଣ ଭାରତୀୟ ସିନେମା ଇଣ୍ଡଷ୍ଟ୍ରୀର ସୁପରଷ୍ଟାର ରଜନୀକାନ୍ତଙ୍କୁ ୫୧ତମ ଦାଦା ସାହେବ ଫାଲ‌କେ ପୁରସ୍କାର ପ୍ରଦାନ କରାଯିବ। ଏ ସମ୍ପର୍କରେ କେନ୍ଦ୍ର ସୂଚନା ଏବଂ ପ୍ରସାରଣ ମନ୍ତ୍ରୀ ପ୍ରକାଶ ଜାଭେଡକର ଘୋଷଣା କରିଛନ୍ତି। ଦାଦା ସାହେବ ଫାଲକେ ପୁରସ୍କାର ଭାରତୀୟ ସିନେମା ଜଗତର ସବୁଠୁ ପ୍ରତିଷ୍ଠିତ ପୁରସ୍କାର ଭାବେ ଜଣାଯାଏ। କରୋନା ମହାମାରୀ ଯୋଗୁଁ ଚଳିତ ଥର ସମସ୍ତ ପୁରସ୍କାର ଘୋଷଣା ବିଳମ୍ବରେ କରାଯାଇଛି।

ରଜନୀକାନ୍ତଙ୍କ ପିଲାଦିନ ବହୁ ଦୁଃଖକଷ୍ଟରେ କଟିଛି। ତାଙ୍କର ପ୍ରକୃତ ନାମ ଶିବାଜୀ ରାଓ ଗାୟକୱାଡ଼। ସେ ୫ ବର୍ଷର ହୋଇଥିବାବେଳେ ତାଙ୍କ ମା’ଙ୍କ ଦେହାନ୍ତ ହୋଇଯାଇଥିଲା। ମା’ଙ୍କ ମୃତ୍ୟୁ ପରେ ପରିବାର ଦାୟିତ୍ଵ ତାଙ୍କ ଉପରେ ରହିଥିଲା। କିନ୍ତୁ ଘର ଚଳାଇବା ତାଙ୍କ ପକ୍ଷେ ସହଜ ନ ଥିଲା। ଏଥିପାଇଁ ତାଙ୍କୁ କୁଲି କାମ ମଧ୍ୟ କରିବାକୁ ପଡ଼ିଥିଲା।

ଚଳଚ୍ଚିତ୍ର ଦୁନିଆକୁ ଆସିବା ପୂର୍ବରୁ ରଜନୀକାନ୍ତ ବସ୍‌ କଣ୍ଡକ୍ଟର ଭାବେ କାମ କରୁଥିଲେ। ତାମିଲ ଚଳଚ୍ଚିତ୍ର ‘ଅପୂର୍ବା ରାଗନଗାଲ’ରେ ସେ ଡେବ୍ୟୁ କରିଥିଲେ। ଏହି ଚଳଚ୍ଚିତ୍ରରେ କମଲ ହାସନ ଏବଂ ଶ୍ରୀବିଦ୍ୟା ଅଭିନୟ କରିଥିଲେ। ରଜନୀକାନ୍ତ ତାଙ୍କ ଅଭିନୟ ଜୀବନ କନ୍ନଡ଼ ନାଟକରୁ ଆରମ୍ଭ କରିଥିଲେ। ରଜନୀକାନ୍ତଙ୍କ ଦୁର୍ଯ୍ୟୋଧନ ଚରିତ୍ର ପାଇଁ ସେ ଘରେ ଘରେ ଲୋକପ୍ରିୟ ହୋଇପାରିଥିଲେ। ୧୯୮୩ରେ ରଜନୀକାନ୍ତ ବଲିଉଡ଼ରେ ପ୍ରବେଶ କରିଥିଲେ। ତାଙ୍କର ପ୍ରଥମ ହିନ୍ଦୀ ଚଳଚ୍ଚିତ୍ର ଥିଲା ‘ଅନ୍ଧା କାନୁନ’। ଏହି ଚଳଚ୍ଚିତ୍ର ପରେ ରଜନୀକାନ୍ତ ଗୋଟିଏ ପରେ ଗୋଟିଏ ସଫଳତାର ସିଡି ଚଢ଼ିଥିଲେ। ଆଜି ସେ ଦକ୍ଷିଣ ଭାରତୀୟ ଚଳଚ୍ଚିତ୍ର ଇଣ୍ଡଷ୍ଟ୍ରୀର ସବୁଠୁ ବଡ଼ ଷ୍ଟାର।