ଗୁଜରାଟ ପୌର ନିର୍ବାଚନରେ ବିଜେପିର ବାଜିମାତ୍

ନୂଆଦିଲ୍ଲୀ : ଦିଲ୍ଲୀ ବିଧାନସଭା ନିର୍ବାଚନ ପରେ ଛତିଶଗଡ଼ ପୌର ନିର୍ବାଚନରେ ବିଜେପି କ୍ଲିନ୍ ସୁଇପ୍ ହାସଲ କରିଥିଲା। ଛତିଶଗଡ଼ ପୌର ନିର୍ବାଚନରେ ବିଜେପି ସମସ୍ତ ୧୦ଟି ମହାନଗର ନିଗମରେ ବିଜୟୀ ହୋଇଥିଲା। ଏବେ ଗୁଜରାଟ ପୌର ନିର୍ବାଚନରେ ମଧ୍ୟ ବିଜେପି ନିଜର ପରିଚୟ ସୃଷ୍ଟି କରିଛି। ମଙ୍ଗଳବାର ପ୍ରକାଶିତ ଫଳାଫଳ ବିଜେପିକୁ ଉତ୍ସାହିତ କରିଛି। ଗୁଜରାଟର ୬୮ଟି ପୌରପାଳିକାରୁ ୬୦ଟିରେ ବିଜୟୀ ହୋଇ ବିଜେପି ସ୍ପଷ୍ଟ ସଂଖ୍ୟାଗରିଷ୍ଠତା ହାସଲ କରିଛି। ଗୁଜରାଟ ସ୍ଥାନୀୟ ନିର୍ବାଚନରେ ବିପୁଳ ବିଜୟ ହାସଲ କରି ବିଜେପି ଖୁସି । ପ୍ରଧାନମନ୍ତ୍ରୀ ମୋଦୀ ସୋସିଆଲ ମିଡିଆ ପ୍ଲାଟଫର୍ମ ଏକ୍ସରେ ଦଳୀୟ କର୍ମୀମାନଙ୍କୁ ଅଭିନନ୍ଦନ ଜଣାଇକହିଛନ୍ତି ଯେ ବିକାଶ ରାଜନୀତି ପାଇଁ ଏହା ଆଉ ଏକ ଗୁରୁତ୍ୱପୂର୍ଣ୍ଣ ବିଜୟ । କଂଗ୍ରେସ ମାତ୍ର ଗୋଟିଏ ପୌରପାଳିକା ଜିତିବାରେ ସକ୍ଷମ ହୋଇଥିଲା। ଆମ୍ ଆଦମୀ ପାର୍ଟି (ଆପ୍) ଆଦୌ ଖାତା ଖୋଲିନଥିଲା। ଗୁଜରାଟ ସ୍ଥାନୀୟ ନିର୍ବାଚନରେ କଂଗ୍ରେସ ସମାଜବାଦୀ ପାର୍ଟି ଠାରୁ ଭଲ ପ୍ରଦର୍ଶନ କରିଥିଲା। ଏସପି ଏଠାରେ ଦୁଇଟି ପୌରପାଳିକାକୁ ଦଖଲ କରିଛନ୍ତି। ଏହାବ୍ୟତୀତ ୩ଟି ପୌରପାଳିକାରେ ମଧ୍ୟ ମୁହାଁମୁହିଁ ପରିସ୍ଥିତି ସୃଷ୍ଟି ହୋଇଥିଲା। ଗୋଟିଏରେ ସ୍ୱାଧୀନ ପ୍ରାର୍ଥୀ ବିଜୟୀ ହୋଇଥିବା ବେଳେ ଗୋଟିଏ ପୌରପାଳିକାରେ କେହି ସଂଖ୍ୟାଗରିଷ୍ଠତା ପାଇନାହାନ୍ତି।