୨ ନାବାଳିକାଙ୍କୁ ଗଣଦୁଷ୍କର୍ମ ଘଟଣା ସନ୍ଧାନୀ କୁକୁର ନେଇ ତଦନ୍ତ କଲା ସାଇଣ୍ଟିଫିକ୍ ଟିମ୍

ସୁନ୍ଦରଗଡ: ଚପଲ କିଣିବାକୁ ଆସିଥିବା ୨ ନାବାଳିକାଙ୍କୁ ୩ ଜଣ ଯୁବକ ଗଣଦୁଷ୍କର୍ମ କରିଥିବା ଘଟଣାରେ ପୁଲିସ ସନ୍ଧାନୀ କୁକୁରକୁ ନେଇ ଆଜି ତଦନ୍ତ କରିଛି ସାଇଣ୍ଟିଫିକ୍ ଟିମ୍ । ସୂଚନାଯୋଗ୍ୟ ଯେ ଶନିବାର ସନ୍ଧ୍ୟାରେ ହମିରପୁର ଅଞ୍ଚଳର ୨ ନାବାଳିକା ଚପଲ କଣିବାକୁ ବିଶ୍ରାରୋଡ ଆସିଥିବାବେଳେ ୩ ଜଣ ଯୁବକ ଗାନ୍ଧୀରୋଡ ଅଞ୍ଚଳର ଭୋଲୁ ମୁଣ୍ଡା ଓ ରାଜେନ୍ଦ୍ର ସିଂ ଏବଂ ଗୋପବନ୍ଧୁପାଲି ଅଞ୍ଚଳର ସାଜନ ସିଂ ବିର୍ସାମୁଣ୍ଡା ଆଥଲେଟିକ୍ ଷ୍ଟାଡିୟମ୍ ପାଚେରି ନିକଟରେ ଗଣଦୁଷ୍କର୍ମ କରିଥିଲେ । ଏହି ଘଟଣା ଏବେକ ବିଜେପି ସରକାରର ଆଇନ ଶୃଙ୍ଖଳା ପରିସ୍ଥିତିର ନଗ୍ନତାକୁ ପଦାରେ ପକାଇ ଦେଇଛି । ରାଉରକେଲାର ପ୍ଲାଣ୍ଟସାଇଟ୍ ପୁଲିସ ଏବଂ ଜୋନାଲ ଡିଏସପି ନିର୍ମଳ କୁମାର ମହାପାତ୍ର ଏହାକୁ ଗୁରୁତର ସହ ନେଇ ତଦନ୍ତ ଆରମ୍ଭ କରିଛନ୍ତି । ରବିବାର ଉପରୋକ୍ତ ୩ ଅଭିଯୁକ୍ତଙ୍କୁ କାବୁକରି ନେଇଥିବା ବେଳେ ଆଜି ସେମାନଙ୍କର ଡାକ୍ତରୀ ମାଇନା ସମ୍ପନ୍ନ କରାଯାଇଛି । ଏତଦ୍‌ବ୍ୟତୀତ ୩ ଅଭିଯୁକ୍ତଙ୍କୁ ସୋମବାର ପୁଲିସ ଘଟଣାସ୍ଥଳକୁ ନେଇ ସାଇଣ୍ଟିଫିକ୍ ପୁଲିସ ଟିମ୍ ଓ ପୁଲିସ ସନ୍ଧାନୀ କୁକୁର ଦ୍ୱାରା ପୁଙ୍ଖାନୁପୁଙ୍ଖ ତଦନ୍ତ କରିଥିଲେ । ଅଭିଯୁକ୍ତ ଦୁଷ୍କର୍ମକାରୀ ୩ଜଣ ଘଟଣାସ୍ଥଳ ଚିହ୍ନଟ କରି ଦୋଷ ସ୍ୱୀକାର କରିଥିବା ଜଣାପଡିଛି । ମଙ୍ଗଳବାର ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯିବ ବୋଲି ଡିଏସ୍‌ପି ସୂଚନା ଦେଇଛନ୍ତି ।