ମା' ପାଇଁ ଦିନଟିଏ ...

ମା' ପାଇଁ ଦିନଟିଏ ...

ମା' ପାଇଁ ଦିନଟିଏ .. ମା” ପାଇଁ ଦିନେ ନୁହଁ, ମା” ପାଇଁ ତ’ ପ୍ରତ୍ୟେକ ଦିନ, ପ୍ରତ୍ୟେକ ମୁହୂର୍ତ୍ତ ଉତ୍ସର୍ଗ। ପ୍ରଥମ ଦେଖାରେ ପ୍ରେମ କ’ଣ ହୋଇଥାଏ? ପ୍ରଥମ ଥର ପାଇଁ ନବଜାତ ଶିଶୁ ଜନ୍ମ ଦେଇଥିବା କୌଣସି ମହିଳାଙ୍କୁ ଏହି ପ୍ରଶ୍ନ ପଚାର। ମା” ସନ୍ତାନ ସମ୍ପର୍କ ଏହି ଦୁନିଆର ସବୁଠାରୁ ସୁନ୍ଦର ଏବଂ ଅମୂଲ୍ୟ ଅଟେ। ପିଲାଟି ଯନ୍ତ୍ରଣା ଭୋଗିଲେ, ମା” ଯନ୍ତ୍ରଣା ଅନୁଭବ କରେ। ପିଲାଟି ହସିଲେ, ମା” ଖୁସି ଅନୁଭବ କରେ। ମା” ର ପ୍ରେମ, ତ୍ୟାଗ ଏବଂ ସମର୍ପଣକୁ ଶବ୍ଦରେ ବର୍ଣ୍ଣନା କରିବା ସହଜ ନୁହେଁ। ମା” ଭଗବାନଙ୍କ ଦ୍ୱାରା ନିର୍ମିତ ସଂସାରର ସବୁଠାରୁ ସୁନ୍ଦର ସୃଷ୍ଟି। ଯିଏ ନିଜ ପିଲାଙ୍କୁ ଜୀବନସାରା ନିସର୍ତ୍ତମୂଳକ ଭାବରେ ଭଲ ପାଇଥାଏ। କୌଣସି ପ୍ରକାରେ ମା” କୁ ବ୍ୟାଖ୍ୟା କରିବା ଅତ୍ୟନ୍ତ କଷ୍ଟକର। ମା” ର ଏକ ସଠିକ ପରିଭାଷା ହୋଇପାରିବ ନାହିଁ। ଯେତେବେଳେ ଜଣେ ନିଜ ମା” କୁ ଦେଖୁଥାଏ, ସେତେବେଳେ ସେ ଏକ ଶୁଦ୍ଧ ପ୍ରେମ ଦେଖୁଥାଏ। ଯଦିଓ ପ୍ରତ୍ୟେକଟି ଦିନ ସନ୍ତାନ ମାନଙ୍କ ପାଇଁ ବାପା, ମା” ସ୍ୱତନ୍ତ୍ର ହୋଇଥାଆନ୍ତି। କିନ୍ତୁ, ମାତୃ ଦିବସଟି ସଂପୂର୍ଣ୍ଣ ଭାବରେ ମା” ପାଇଁ ଉତ୍ସର୍ଗୀକୃତ ହୋଇଥାଏ। ପ୍ରତିବର୍ଷ ମେ’ ମାସର ଦ୍ୱିତୀୟ ରବିବାରରେ ପାଳନ କରାଯାଏ ବିଶ୍ୱ ମାତୃ ଦିବସ। ଚଳିତ ବର୍ଷ ମେ’ ୯ ତାରିଖ ରବିବାର ଦିନ ପଡ଼ୁଛି ବିଶ୍ୱ ମାତୃ ଦିବସ। ଏହି ଦିନ ସନ୍ତାନମାନେ ନିଜ ଜୀବନରେ ମା” ର ସ୍ଥାନ କ’ଣ ବୋଲି ଜଣାଇବା ପାଇଁ ସମସ୍ତ ପଦ୍ଧତି ବ୍ୟବହାର କରିଥାଆନ୍ତି। ବ୍ୟସ୍ତ ବହୁଳ ଜୀବନଶୈଳୀ ଭିତରେ ବେଳେବେଳେ କିଛି ଦିନରେ ସନ୍ତାନମାନେ ନିଜ ମା” ଙ୍କୁ ସମୟ ଦେଇ ପାରନ୍ତି ନାହିଁ। ଏପରି ସ୍ଥିତିରେ ଏହା ଏକ ବିଶେଷ ଦିନ, ଯେଉଁଦିନ ସନ୍ତାନ ମାନେ ସମସ୍ତ କାର୍ଯ୍ୟକୁ ପଛରେ ରଖି ନିଜ ମା’ଙ୍କ ସହିତ ସମୟ ବିତାଇଥାଆନ୍ତି।

ମାତୃ ଦିବସ ଆରମ୍ଭ ବିଷୟରେ ଅନେକ କାହାଣୀ ରହିଛି। ଆନା ଜାରଭିସ୍ ନାମକ ଜଣେ ଆମେରିକୀୟ ମହିଳା ମାତୃ ଦିବସ ପାଳନ କରିବା ଆରମ୍ଭ କରିଥିବା କୁହାଯାଏ। ଆନା ତାଙ୍କ ମା” ଙ୍କୁ ବହୁତ ଭଲ ପାଉଥିଲେ ଏବଂ ତାଙ୍କ ଦ୍ୱାରା ବହୁତ ଅନୁପ୍ରାଣିତ ହୋଇଥିଲେ। ଆନା ଅବିବାହିତ ଥିଲେ ଏବଂ ମା” ଙ୍କ ଦେହାନ୍ତ ପରେ ତାଙ୍କ ମା” ଙ୍କୁ ସମ୍ମାନ ଜଣାଇବା ପାଇଁ ଏହି ବିଶେଷ ଦିନ ଆରମ୍ଭ କରିଥିଲେ ବୋଲି କୁହାଯାଏ। ସେହିପରି, ଅନ୍ୟ ଏକ ଉପନ୍ୟାସ ଅନୁଯାୟୀ, ମାତୃ ଦିବସ ପାଳନ ଗ୍ରୀସରେ ଆରମ୍ଭ ହୋଇଥିଲା। ଗ୍ରୀସର ଲୋକମାନେ ସେମାନଙ୍କର ମା” ମାନଙ୍କ ପ୍ରତି ବିଶେଷ ସମ୍ମାନ କରୁଥିଲେ। ଏହି ସମ୍ମାନକୁ ଦର୍ଶାଇବା ପାଇଁ ସେମାନେ ଏହି ଦିନ ମା” ଙ୍କୁ ପୂଜା କରୁଥିଲେ। ବିଶ୍ୱାସ ଅନୁଯାୟୀ ସ୍ଵବେଲେ ଗ୍ରୀକ୍ ଦେବତା ମାନଙ୍କର ମାତା ଥିଲେ ଏବଂ ଗ୍ରୀସର ଲୋକମାନେ ଏହି ଦିନ ସ୍ଵବେଲେଙ୍କୁ ପୂଜା କରୁଥିଲେ। ସେହିପରି କୁହାଯାଏ ଯେ, ୧୯୧୪ ମସିହାରେ ଆମେରିକାର ରାଷ୍ଟ୍ରପତି ଏକ ଆଇନ ପ୍ରଣୟନ କରିଥିଲେ। ଯାହା ଅନୁଯାୟୀ ମେ’ ମାସର ଦ୍ୱିତୀୟ ରବିବାରରେ ମାତୃ ଦିବସ ପାଳନ କରାଯିବ। ସେହି ଦିନଠାରୁ ଏହା ଅନେକ ଦେଶରେ ପାଳନ କରାଯାଇ ଆସୁଛି।