କେନ୍ଦୁଝରରେ ଖୋଲିଲା ପ୍ରଥମ ସିନ୍ଥେଟିକ ହ୍ୟାଣ୍ଡବଲ୍ ଷ୍ଟାଡିୟମ

କେନ୍ଦୁଝରରେ ଖୋଲିଲା ପ୍ରଥମ ସିନ୍ଥେଟିକ ହ୍ୟାଣ୍ଡବଲ୍ ଷ୍ଟାଡିୟମ

କେନ୍ଦୁଝରରେ ଖୋଲିଲା ସହରର ନବନିର୍ମିତ ତଥା ଅତ୍ୟାଧୁନିକ ସୁବିଧାପୂର୍ଣ୍ଣ ହ୍ୟାଣ୍ଡବଲ ଷ୍ଟାଡିୟମ । ପ୍ରଥମ କରି କେନ୍ଦୁଝରେ ନିର୍ମାଣ ହୋଇଛି ଏହି ସିନ୍ଥେଟିକ ହ୍ୟାଣ୍ଡବଲ୍ ଷ୍ଟାଡିୟମ । ନଭେମ୍ବର ୧୮ ରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହି ଷ୍ଟାଡିୟମର ଉଦଘାଟନ କରିଥିଲେ । ଅନ୍ତର୍ଜାତୀୟ ଫେଡେରେସନମାନର ସାମଗ୍ରୀରେ ଏହି ଡୁଆଲ କୋର୍ଟ ନିର୍ମାଣ କରାଯାଇଛି ବୋଲି ପ୍ରଶାସନ ପକ୍ଷରୁ ସୂଚନା ଦିଆଯାଇଛି । ୧.୬ ଏକର ପରିମିତ ଏହି ଷ୍ଟାଡିୟମରେ ଏକାସାଙ୍ଗରେ ୨୦୦ ଦର୍ଶକ ବସି ଖେଳ ଦେଖିବାର ସୁବିଧା ରହିଛି । ଜିଲ୍ଲା ଖଣିଜ ପ୍ରତିଷ୍ଠାନ ପାଣ୍ଠିରୁ ୩.୨୬ କୋଟି ଟଙ୍କା ବ୍ୟୟ ଅଟକଳରେ ନିର୍ମିତ ଏହି ଷ୍ଟାଡିୟମ ଜାତୀୟ ଓ ଅନ୍ତର୍ଜାତୀୟ ଖେଳାଳିଙ୍କୁ ପ୍ରିତ୍ସାହିତ କରିବ। ଏଠାରେ ହ୍ୟାଣ୍ଡବଲ ସହିତ ବିଭିନ୍ନ ବର୍ଗର ଲୋକଙ୍କ ପାଇଁ ବହୁବିଧ କ୍ରୀଡା ବ୍ୟବସ୍ଥା ରହିଛି । ପିଲାଠୁ ବୃଦ୍ଧ ସବୁ ବର୍ଗର ଲୋକମାନେ ସୁସ୍ଥ ରହିବା ପାଇଁ ପ୍ରାତଃ ଭ୍ରମଣ ଟ୍ରାକ, ଯୋଗ, ଓପନ ଜିମନାସିୟମ, ଶିଶୁ କ୍ରୀଡ଼ା ଆଦି ବ୍ୟବସ୍ଥା ରହିଛି । ରାତିରେ ମଧ୍ୟ ଖେଳିବା ପାଇଁ ଆଲୋକ ବ୍ୟବସ୍ଥା କରାଯାଇଛି । ଯାହାକୁ ସ୍ବାଗତ କରିଛନ୍ତି ଖେଳାଳି । ପୂର୍ବରୁ ମାଟି କାଦୁଅର ଷ୍ଟାଡିୟମ ଥିବାରୁ ନାନା ସମସ୍ୟା ଭୋଗିବାକୁ ପଡୁଥିଲା । ରାତିରେ ମଧ୍ୟ ଅଭ୍ୟାସ କରିବାର ସୁଯୋଗ ନଥିଲା । ବର୍ତ୍ତମାନ ଡୁଆଲ କୋର୍ଟ ଷ୍ଟାଡିୟମ ନିର୍ମାଣ ହେବା ପରେ ରାତିରେ ଅଭ୍ୟାସ ପାଇଁ ମଧ୍ୟ ସୁଯୋଗ ସୃଷ୍ଟି ହୋଇଛି । ତେବେ କୋଚଙ୍କ ବ୍ୟବସ୍ଥା ହୋଇପାରିଲେ ଆଗକୁ ଏଠାରୁ ବହୁ ଖେଳାଳି ଜାତୀୟ ଏବଂ ଅନ୍ତର୍ଜାତୀୟସ୍ତରରେ ନାମ କମାଇପାରିବେ ବୋଲି ଆଶାବ୍ୟକ୍ତ କରିଛନ୍ତି ଜିଲ୍ଲାବାସୀ ।