ରାଞ୍ଚି: ଭାରତୀୟ ଜନତା ପାର୍ଟି (ବିଜେପି) ଝାଡଖଣ୍ଡ ବିଧାନସଭା ନିର୍ବାଚନ ପାଇଁ ନିଜର ନିର୍ବାଚନୀ ଇସ୍ତାହାର ପ୍ରକାଶ କରିଛି। ଏହାକୁ କେନ୍ଦ୍ର ଗୃହମନ୍ତ୍ରୀ ଅମିତ ଶାହ ଉପସ୍ଥାପନ କରିଛନ୍ତି। ଏହି ଅବସରରେ ସେ କହିଛନ୍ତି ଯେ ଝାଡଖଣ୍ଡର ଲୋକମାନେ କେଉଁ ପ୍ରକାର ସରକାର ଚାହୁଁଛନ୍ତି ତାହା ସ୍ଥିର କରିବାକୁ ପଡିବ। ଝାଡ଼ଖଣ୍ଡକୁ ବିକାଶର ପଥରେ ନେବାକୁ ଏବଂ ରାଜ୍ୟରେ ଦୁର୍ନୀତିକୁ ଦୂର କରିବା ପାଇଁ ବିଜେପି ଲକ୍ଷ୍ୟ ରଖିଛି। ଅମିତ ଶାହ ପ୍ରତିଶ୍ରୁତି ଦେଇଛନ୍ତି ଯେ ବିଜେପି ମାଟି, ବେଟି ଏବଂ ରୁଟିକୁ ସୁରକ୍ଷା ଦେବ।
ଅମିତ ଶାହ ଏହି ନିର୍ବାଚନକୁ କେବଳ ସରକାର ବଦଳାଇବା ପାଇଁ ନୁହେଁ, ବରଂ ଝାଡଖଣ୍ଡର ଭବିଷ୍ୟତକୁ ସୁରକ୍ଷିତ ରଖିବା ପାଇଁ ଏକ ନିର୍ବାଚନ ବୋଲି ବର୍ଣ୍ଣନା କରିଛନ୍ତି। ସେ ଏହା ମଧ୍ୟ କହିଛନ୍ତି ଯେ ଅନୁପ୍ରବେଶକାରୀ ସରକାର କିମ୍ବା ନିରାପଦ ତଥା ଶକ୍ତିଶାଳୀ ସରକାର ଚାହୁଁଛନ୍ତି କି ନାହିଁ ତାହା ଲୋକଙ୍କୁ ନିଷ୍ପତ୍ତି ନେବାକୁ ପଡ଼ିବ। ବିଜେପିର ପ୍ରତିବଦ୍ଧତାକୁ ଗୁରୁତ୍ୱ ଦେଇ ସେ କହିଛନ୍ତି ଯେ ଝାଡ଼ଖଣ୍ଡର କୋଟି କୋଟି ଲୋକଙ୍କ ମତ ଆଧାରରେ ଏହି ନିର୍ବାଚନୀ ଇସ୍ତାହାର ପ୍ରସ୍ତୁତ କରାଯାଇଛି। ଯେଉଁଥିରେ ଆଦିବାସୀଙ୍କ ଜମି, ରୁଟି ଏବଂ ଝିଅଙ୍କ ସୁରକ୍ଷା ପାଇଁ ପ୍ରତିଶ୍ରୁତି ଦିଆଯାଇଛି।
ବିଜେପି ଅଭିଯୋଗ କରିଛି ଯେ ମୁଖ୍ୟମନ୍ତ୍ରୀ ହେମନ୍ତ ସୋରେନଙ୍କ ସରକାର ସମସ୍ତ ବିକାଶମୂଳକ ଯୋଜନାକୁ ଅଟକାଇ ଆଦିବାସୀଙ୍କ ସୁରକ୍ଷାକୁ ଅଣଦେଖା କରିଛନ୍ତି। ଅମିତ ଶାହ କହିଛନ୍ତି ଯେ ତାଙ୍କ ଦଳ ଝାଡଖଣ୍ଡରେ ବାଂଲାଦେଶୀ ଅନୁପ୍ରବେଶଙ୍କୁ ରୋକିବା ପାଇଁ ପ୍ରତିଶ୍ରୁତିବଦ୍ଧ ଏବଂ ରାଜ୍ୟକୁ ବିକାଶ ପଥରେ ନେବାକୁ ପ୍ରତିଶ୍ରୁତି ଦେଇଛି। ସେ ଆହୁରି ମଧ୍ୟ କହିଛନ୍ତି ଯେ କଲ୍ୟାଣ, ଯୁବପିଢ଼ିଙ୍କ ଭବିଷ୍ୟତ ଏବଂ ମହିଳାଙ୍କ ସୁରକ୍ଷା ଭଳି ପ୍ରସଙ୍ଗ ନିର୍ବାଚନୀ ଇସ୍ତାହାରରେ ଅନ୍ତର୍ଭୂକ୍ତ କରାଯାଇଛି।
ହେମନ୍ତ ସୋରେନ ସରକାରଙ୍କୁ ଲକ୍ଷ୍ୟ କରି ସେ କହିଛନ୍ତି ଯେ ଗତ ପାଞ୍ଚ ବର୍ଷ ମଧ୍ୟରେ ମହିଳାଙ୍କ ପ୍ରତି ଅପରାଧ ବୃଦ୍ଧି ପାଇଛି। ସେ ହେମନ୍ତ ସୋରେନଙ୍କୁ ପଚାରିଛନ୍ତି, ତାଙ୍କ ପ୍ରତିଶ୍ରୁତି ଅନୁଯାୟୀ ସେ କେତେ ଯୁବବର୍ଗଙ୍କୁ ନିଯୁକ୍ତି ଦେଇଛନ୍ତି। ଶାହ କହିଛନ୍ତି ହେମନ୍ତ ସରକାର ଅନୁପ୍ରବେଶକାରୀଙ୍କୁ ଆଶ୍ରୟ ଦେଇଛନ୍ତି, ଯେଉଁଥିପାଇଁ ଆଦିବାସୀ ସମ୍ପ୍ରଦାୟର ସଂଖ୍ୟା ହ୍ରାସ ପାଉଛି।
ଏଥିସହ ୨୮୭,୫୦୦ ସରକାରୀ ପଦବୀରେ ନିଯୁକ୍ତି। ପ୍ରତିବର୍ଷ ଏକ ଲକ୍ଷ ଯୁବକଙ୍କୁ ନିଯୁକ୍ତି ଭତ୍ତା ପ୍ରଦାନ ଏବଂ ଝାଡଖଣ୍ଡରେ ୧୦ଟି ନୂତନ ସରକାରୀ ମେଡିକାଲ କଲେଜ ନିର୍ମାଣ କରିବାକୁ ମଧ୍ୟ ପ୍ରତିଶ୍ରୁତି ଦିଆଯାଇଛି।
ଅମିତ ଶାହ କହିଛନ୍ତି ଯେ ହେମନ୍ତ ସରକାର ପ୍ରଧାନ ମନ୍ତ୍ରୀ ଆୱାସ ଯୋଜନା ଅଧୀନରେ ୨୧ ଲକ୍ଷ ଘର ନିର୍ମାଣ କରିନାହାନ୍ତି। କିନ୍ତୁ ବିଜେପି ଏହି ଲକ୍ଷ୍ୟ ପୂରଣ କରିବ। ବିଜେପିର ନିର୍ବାଚନୀ ଇସ୍ତାହାରରେ ଏହା ମଧ୍ୟ ସୁନିଶ୍ଚିତ ହୋଇଛି ଯେ ଅନୁପ୍ରବେଶକାରୀଙ୍କଠାରୁ ଜମି ଜବର ଦଖଲ ମୁକ୍ତ ହେବ ଏବଂ ରାଜ୍ୟରେ ଗୋରୁ ଚୋରା ଚାଲାଣ ଦୂର ହେବ।
ଏହା ସହିତ ସେ ଏମଏସପି ସିଷ୍ଟମରେ ନୂତନ ଫସଲ ଯୋଡିବା, ହୀରକ ଚତୁର୍ଭୁଜ ଏକ୍ସପ୍ରେସୱେ ନିର୍ମାଣ ଏବଂ ପ୍ରତ୍ୟେକ ଜିଲ୍ଲାରେ ଏକ ନର୍ସିଂ ଟ୍ରେନିଂ କଲେଜ ଖୋଲିବାକୁ ମଧ୍ୟ ନିର୍ବାଚନୀ ଇସ୍ତାହାରରେ ନିଶ୍ଚିତ କରାଯାଇଛି। ନିର୍ବାଚନୀ ଇସ୍ତାହାରରେ ବିଜେପି ଦୁର୍ନୀତି ବିରୋଧରେ ତଦନ୍ତ ଆୟୋଗ ଗଠନ କରିବାକୁ ଯୋଜନା କରିଛି। ଯାହାଫଳରେ ଝାଡଖଣ୍ଡର ବିକାଶ ତଥା ନିରାପତ୍ତା ଦିଗରେ ଠୋସ୍ ପଦକ୍ଷେପ ନିଆଯାଇପାରିବ।
