କୋରାପୁଟ: ଅନ୍ୟ ଜାତିର ଝିଅକୁ ବିବାହ ପଡିଲା ମହଙ୍ଗା । ଲଣ୍ଡା ହେବା ସହ ୯୦ ହଜାର ଟଙ୍କା ତଣ୍ଡ ଗଣିଲେ ବର । କୋରାପୁଟ ଜିଲ୍ଲା ମାଛରା ଜଙ୍ଗଲ ନିକଟରେ ଏଭଳି ଦୃଶ୍ୟ ଦେଖିବାକୁ ମିଳିଛି ।
ଜୟପୁର ସହରର ମହେଶ୍ବର ଖିଲଙ୍କର ସେହି ଗାଁର ଉର୍ମିଳାଙ୍କ ସହ ପ୍ରେମ ସମ୍ପର୍କ ଥିଲା। ଉଭୟ ବିବାହ କରିବାକୁ ମଧ୍ୟ ନିଷ୍ପତ୍ତି ନେଇଥିଲେ । କିନ୍ତୁ କୁଳ ଏବଂ କୁଟୁମ୍ବ ଉଭୟଙ୍କୁ ବିବାହ ପାଇଁ ଅନୁମତି ଦେଇନଥିଲା। କାରଣ ମହେଶ୍ବର ମାଳି ଜାତିର ହୋଇଥିଲା ବେଳେ ତାଙ୍କ ପ୍ରେମିକା ରଣା ସମାଜର । ଏମିତି ପ୍ରତିବନ୍ଧକର ସମ୍ମୁଖୀନ ହୋଇ ପ୍ରେମୀ ଯୁଗଳ କିଛି ଦିନ ତଳେ ଘର ଛାଡ଼ି ବାହାରକୁ ଚାଲି ଯାଇଥିଲେ । କିଛି ଦିନ ବାହାରେ ରହିବା ପରେ ପତ୍ନୀଙ୍କ ସହ ମହେଶ୍ବର ଘରକୁ ଫେରିବା ପାଇଁ ଚାହିଥିଲେ । ତେବେ ମାଳି ସମାଜ ଏହି ବିବାହକୁ ସ୍ବୀକୃତି ଦେବା ପାଇଁ କିଛି କଠୋର ସର୍ତ୍ତ ରଖିଲା । ବୈଠକ କରି ବରକୁ ଲଣ୍ଡା ହେବା ସହ ଭୋଜିଭାତ ଓ ୯୦ ହଜାର ଟଙ୍କା ଦେବାକୁ କହାଯାଇଥିଲା ।
ବୈଠକରେ ନିଷ୍ପତ୍ତି ପରେ ବର ଲଣ୍ଡା ହେବା ସହ ୯୦ ହଜାର ଟଙ୍କା ତଣ୍ଡ ଗଣିବା ପରେ ବିବାହ କରିଥିଲେ । ଭୋଜିରେ ମାଳି ସମାଜର ବରିଷ୍ଠଙ୍କ ସହ ଯୁବକ ଏବଂ ଶିକ୍ଷିତ ସାମିଲ ହୋଇଥିଲେ । ଭୋଜିଭାତ ସରିବା ପରେ ନବବଧୂଙ୍କୁ ମାଳି ସମାଜର ବରିଷ୍ଠ ସଦସ୍ୟ ଗୃହପ୍ରବେଶ ପାଇଁ ଅନୁମତି ଦେଇଥିଲେ । ଏଭଳି ଦଣ୍ଡ ଏବଂ ଜରିମାନା ମାଳି ସମାଜରେ ଆଦୌ ନୂଆ ଘଟଣା ନୁହେଁ ।
