ଇଣ୍ଡୋନେସିଆରେ ଭୟଙ୍କର ଭୂକମ୍ପ ଝଟକା । ଆଜି ସକାଳେ ଏକ ଭୟଙ୍କର ଭୂମିକମ୍ପରେ ଇଣ୍ଡୋନେସିଆ ଥରି ଉଠିଛି । ସୁଲାୱେସି ଅଞ୍ଚଳର ମିନାହାସା ଉପଦ୍ୱୀପରେ ଏହି ଭୂମିକମ୍ପ ହୋଇଛି, ଯାହାର ତୀବ୍ରତା ୬.୩ ରହିଛି ।
ଜର୍ମାନ ରିସର୍ଚ୍ଚ ସେଣ୍ଟର ଫର୍ ଜିଓସାଇନ୍ସ (GFZ) ଅନୁଯାୟୀ, ସକାଳ ୨.୨୦ ରେ ହୋଇଥିବା ଭୂମିକମ୍ପର କେନ୍ଦ୍ରସ୍ଥଳ ୧୪୭ କିଲୋମିଟର ଗଭୀରତାରେ ଚିହ୍ନଟ କରାଯାଇଛି । ତେବେ ଗତ ୩ ମାସ ମଧ୍ୟରେ ଇଣ୍ଡୋନେସିଆରେ ଅନେକ ଥର ଭୂକମ୍ପ ଝଟକ ଅନୁଭୂତ ହୋଇଛି ।
ଦୁଇ ଦିନ ପୂର୍ବରୁ ମଧ୍ୟ ଇଣ୍ଡୋନେସିଆର ସେରାମରେ ଏକ ଭୂମିକମ୍ପ ହୋଇଥିଲା, ଯାହାର ତୀବ୍ରତା ରିକ୍ଟର ସ୍କେଲରେ ୫.୫ ମାପ କରାଯାଇଥିଲା । ଏହାର କେନ୍ଦ୍ରସ୍ଥଳ ପାଖାପାଖି ୨୪୪ କିମି ରହିଥିଲା । ସେହିଭଳି ୨୩ ମଇରେ ଆସିଥିବା ଭୂକମ୍ପର ତୀବ୍ରତା ୫.୯ ରହିଥିଲା ।
ଜୁଲାଇରେ ଇଣ୍ଡୋନେସିଆର ତାନିମ୍ବାର ଦ୍ୱୀପପୁଞ୍ଜର ଉପକୂଳରେ ଏକ ଭୂମିକମ୍ପ ହୋଇଥିଲା, ଯାହାର କେନ୍ଦ୍ରସ୍ଥଳ ୯୮ କିଲୋମିଟର ଗଭୀରତାରେ ରହିଥିଲା । ଏହି ଭୂମିକମ୍ପର ତୀବ୍ରତା ରିକ୍ଟର ସ୍କେଲରେ ୬.୭ ମାପ କରାଯାଇଥିଲା ।
ବିଶ୍ବରେ ସବୁଠାରୁ ଅଧିକ ଭୂକମ୍ପ ଇଣ୍ଡୋନେସିଆ, ଜାପାନ ଏବଂ ଫିଲିପିନ୍ସରେ ହୋଇଥାଏ । କେବଳ ଇଣ୍ଡୋନେସିଆ ନୁହେଁ ଜୁଲାଇରେ ଭାରତର ବିଭିନ୍ନ ସ୍ଥାନରେ ଭୂକମ୍ପ ଝଟକା ଅନୁଭୂତ ହୋଇଛି । ଜୁଲାଇ ୧୦ ତାରିଖରେ ଦିଲ୍ଲୀ ଏନସିଆର ,ବଂ ହରିୟାଣାର କିଛି ସ୍ଥାନରେ ୪.୪ ତୀବ୍ରତାର ଭୂକମ୍ପ ଅନୁଭୂତ ହୋଇଥିଲା ।
