କଟକ : ଓଡିଶା ହାଇକୋର୍ଟ ଆସିବେ ନୂଆ ବିଚାରପତି । ଜଷ୍ଟିସ ମାନସ ରଞ୍ଜନ ପାଠକଙ୍କ ଓଡିଶା ହାଇକୋର୍ଟକୁ ବଦଳି ହୋଇଥିବା ଜଣାପଡିଛି । ଗୌହାଟୀ ହାଇକୋର୍ଟ ବିଚାରପତି ଥିବା ଜଷ୍ଟିସ ପାଠକ ଖୁବଶୀଘ୍ର ଆସି ଓଡିଶା ହାଇକୋର୍ଟରେ ଯୋଗଦେବେ । ଜଷ୍ଟିସ ପାଠକଙ୍କ ଯୋଗଦାନ ପରେ ଓଡିଶା ହାଇକୋର୍ଟରେ ବିଚାରପତିଙ୍କ ସଂଖ୍ୟା ୨୦ ରେ ପହଞ୍ଚିବ । ୧୯୬୫ ମସିହା ଅଗଷ୍ଟ ୨୮ ରେ ଗୌହାଟୀରେ ଜନ୍ମଗ୍ରହଣ କରିଥିଲେ ଜଷ୍ଟିସ ପାଠକ । କେନ୍ଦ୍ରୀୟ ବିଦ୍ୟାଳୟରୁ ହାଇସ୍କୁଲ ଓ ଯୁକ୍ତ ଦୁଇ ଶିକ୍ଷା ସମାପ୍ତ ପରେ ସେଣ୍ଟ ଜୋସେଫ କଲେଜ ବାଙ୍ଗାଲୋରରୁ ସ୍ନାତକ ଓ ଗୌହାଟୀ ବିଶ୍ୱବିଦ୍ୟାଳୟରୁ ଏଲଏଲବି ଡିଗ୍ରୀ ହାସଲ କରିଥିଲେ ।
୧୯୯୦ ସେପ୍ଟେମ୍ବର ୧୨ ରେ ବାର କାଉନସିଲରେ ନାମ ପଞ୍ଜିକରଣ କରି ଗୌହାଟୀ ହାଇକୋର୍ଟରେ ପ୍ରାକ୍ଟିସ ଆରମ୍ଭ କରିଥିଲେ । ଷ୍ଟାଣ୍ଡିଙ୍ଗ କାଉନସେଲ ଭାବେ କାର୍ଯ୍ୟ କରିବା ପରେ ୨୦୧୩ ମେ ୨୨ ତାରିଖରେ ଗୌହାଟୀ ହାଇକୋର୍ଟର ଅତିରିକ୍ତ ବିଚାରପତି ଭାବେ ଯୋଗ ଦେଇଥିଲେ । ଏହାପରେ ୨୦୧୮ ନଭେମ୍ବର ୧୨ ତାରିଖରୁ ସ୍ଥାୟୀ ବିଚାରପତି ଭାବେ ଶପଥ ଗ୍ରହଣ କରି ଆଜି ପର୍ଯ୍ୟନ୍ତ ଗୌହାଟୀ ହାଇକୋର୍ଟରେ କାର୍ଯ୍ୟ କରି ଆସୁଛନ୍ତି ।
