ଏବେ ରାଜ୍ୟରେ ଯେଉଁଭଳି ଆକାଶରୁ ନିଆଁ ବର୍ଷା ଯୋଗୁ ଦିନକୁ ଦିନ ଗରମ ବଢିବାରେ ଲାଗିଛି। ଆଉ ତାପମାତ୍ରା ରେକର୍ଡ ପରେ ରେକର୍ଡ ଭାଙ୍ଗିବାରେ ଲାଗିଛି। ଆଉ ଗରମ ତାତିରୁ ମୁକ୍ତି ପାଇବା ପାଇଁ ଲୋକେ ବିଭିନ୍ନ ପ୍ରକାର ଉପାୟ ଆପଣାଉଛନ୍ତି। ହେଲେ ଆପଣମାନେ କେବେ ଗରମରୁ ରକ୍ଷା ପାଇବା ପାଇଁ ଏହି ୫ ଯୋଗାସନକୁ ଆପଣାଇଛନ୍ତି କି? ଯଦି କେବେ ଚେଷ୍ଟା କରିନାହାନ୍ତି। ତାହାଲେ ଥରେ ଚେଷ୍ଟା କରି ଦେଖନ୍ତୁ। ଆହି ୫ଟି ଯୋଗାସନ ଏମିତି କାମ ଦେବ। ଯେତେ ଗରମ ହେଲେ ବି କିଛି ଫରକ ପଡିବ ନାହିଁ।
ପ୍ରଜାପତି ଆସନ: ଗ୍ରୀଷ୍ମ ଋତୁରେ ଶରୀରର ତାପମାତ୍ରାକୁ ନିୟନ୍ତ୍ରଣ କରିବା ପାଇଁ ପ୍ରଜାପତି ଆସନ କରିବା ଲାଭଦାୟକ ହୋଇପାରେ। ଏହା ଆପଣଙ୍କ ଶାରୀରିକ ଥକ୍କାପଣକୁ ଦୂର କରିଥାଏ ଏବଂ ଆପଣଙ୍କୁ ମାନସିକ ଶାନ୍ତି ଦେଇଥାଏ।ଏହା କରିବା ପାଇଁ, ଦୁଇ ଗୋଡକୁ ଆଣ୍ଠୁ ପାଖରୁ ଭାଙ୍ଗି ପାଦକୁ ଯୋଡନ୍ତୁ ଏବଂ ମଳଦ୍ୱାର ଆଡକୁ ଟାଣନ୍ତୁ। ବର୍ତ୍ତମାନ ପାଦକୁ ହାତରେ ଧରି ଦୁଇ ଆଣ୍ଠୁକୁ ପ୍ରଜାପତି ଡେଣା ପରି ଉପର-ତଳ କରନ୍ତୁ।
ତାଡ଼ାସନ: ଗ୍ରୀଷ୍ମ ଋତୁରେ ଶରୀରକୁ ଶୀତଳ ରଖିବା ପାଇଁ ତାଡାସନ ଅଭ୍ୟାସ କରିପାରିବେ। ଏହା ପାଦକୁ ଆରାମ ଦେବା ସହ ଶରୀରର ତାପମାତ୍ରାକୁ ନିୟନ୍ତ୍ରଣରେ ରଖେ। ଏହା କରିବା ପାଇଁ ସିଧା ଠିଆ ହୁଅନ୍ତୁ। ଶ୍ୱାସ ନେଇ ଦୁଇ ହାତକୁ ଉପରକୁ ଉଠାନ୍ତୁ। ଧିରେ ଧିରେ ଗୋଇଠି ଟେକି ପାଦ ଆଙ୍ଗୁଠିରେ ଠିଆ ହୁଅନ୍ତୁ।
ଶବାସନ: ଖରା ଦିନେ ମାନସିକ ଶାନ୍ତି ଏବଂ ଚାପମୁକ୍ତ ଦିନ ଚାହୁଁଥିଲେ ଜୀବନଶୈଳୀରେ ଶବାସନକୁ ସାମିଲ୍ କରନ୍ତୁ। ନିୟମିତ ଯୋଗ ଅଭ୍ୟାସରେ, ଶବାସନ ପାଇଁ ଆପଣଙ୍କୁ ଶେଷ କିଛି ମିନିଟ୍ ବାହାର କରିବାକୁ ପଡିବ। ଏହା କରିବା ପାଇଁ, ଶରୀରକୁ ସମ୍ପୂର୍ଣ୍ଣ ଢିଲା କରି ସିଧା ଶୋଇଯାଆନ୍ତୁ। ଦୁଇ ଗୋଡ ଛାଡି ରଖିବା ସହିତ ହାତକୁ ଶରୀରର ଦୁଇ ପାର୍ଶ୍ୱରେ ଛାଡିକି ରଖନ୍ତୁ। ଶ୍ୱାସକ୍ରିୟା ଧିରେ ଧିରେ କରନ୍ତୁ। ନିଜକୁ ଜାଗ୍ରତ ରଖନ୍ତୁ।
ବୀରଭଦ୍ରାସନ: ଗ୍ରୀଷ୍ମ ଦିନ ପାଇଁ ବୀରଭଦ୍ରାସନ ହେଉଛି ସର୍ବୋତ୍ତମ ଆସନ। ଯେକୌଣସି ବୟସର ବ୍ୟକ୍ତି ଏହା କରିପାରିବେ। ଯଦି ଆପଣ ଗ୍ରୀଷ୍ମ ସମୟରେ ଓଜନ ହ୍ରାସ କରିବାକୁ ଚାହାଁନ୍ତି, ତେବେ ଏହି ଆସନ ବହୁତ ପ୍ରଭାବଶାଳୀ ହେବ। ଗ୍ରୀଷ୍ମ ଋତୁରେ ଶରୀରର ସନ୍ତୁଳନକୁ ବଢାଇବା ପାଇଁ ଏହା ଏକ ଉତ୍କୃଷ୍ଟ ପ୍ରତିକାର ଭାବରେ ବିବେଚନା କରାଯାଏ।
ସିଂହାସନ: ଯଦି ଆପଣ ଗ୍ରୀଷ୍ମ ସମୟରେ ଶରୀରର ତାପମାତ୍ରାକୁ ନିୟନ୍ତ୍ରଣ କରିବାକୁ ଚାହୁଁଛନ୍ତି, ତେବେ ଆପଣ ସିଂହାସନ ଅଭ୍ୟାସ କରିପାରିବେ। ଏହା ଆପଣଙ୍କ ରକ୍ତ ସଞ୍ଚାଳନରେ ଉନ୍ନତି ଆଣେ ଏବଂ ଆପଣଙ୍କୁ ମାନସିକ ଶାନ୍ତି ପ୍ରଦାନ କରେ। ଏହା କରିବା ପାଇଁ, ପ୍ରଥମେ ବଜ୍ରାସନରେ ବସନ୍ତୁ ଏବଂ ଦୁଇ ହାତକୁ ଆଣ୍ଠୁ ଉପରେ ରଖନ୍ତୁ ଏବଂ ପାଟି ବନ୍ଦ କରି ହମ୍ ଧ୍ୱନି କରନ୍ତୁ।
