ଗଞ୍ଜାମ : ଗଞ୍ଜାମ ଜିଲ୍ଲା ତାରାସିଙ୍ଗି ଥାନା ଅନ୍ତର୍ଗତ ଘାଟିପଲ୍ଲୀ ଗାଁରେ ଘଟିଛି ଅତି ଦୁଃଖଦ ହୃଦୟ ବିଦାରକ ଘଟଣା । ଗାଁରେ ଗଣେଶ ପୂଜା ଚାଲିଥିବା ବେଳେ ସେହି ଗାଁର ସିଲୁ ବେହେରା ଗଣେଶ ମେଢ଼ରେ ଲାଗିଥିବା ଟେଣ୍ଟ ଖୋଲୁଥିଲେ । ଏତିକି ବେଳେ ବିଦ୍ୟୁତ୍ ଖୁଣ୍ଟର ତାର ସଂସ୍ପର୍ଶରେ ଆସି ଯାଇଥିଲେ । ସ୍ଥାନୀୟ ଲୋକେ ଘଟଣାସ୍ଥଳରୁ ତାଙ୍କୁ ଉଦ୍ଧାର କରି ଭଂଜନଗର ମେଡିକାଲରେ ଭର୍ତ୍ତି କରିଥିଲେ । ହେଲେ ଡାକ୍ତରଖାନାରେ ପହଞ୍ଚିଲା ବେଳକୁ ସିଲୁ ଆଉ ନଥିଲେ । ତାଙ୍କୁ ମୃତ ଘୋଷଣା କରିଥିଲେ ଡାକ୍ତର ।
ଗଣେଶ ପୂଜା ଏବଂ ଭସାଣ ସବୁ ଭଲରେ ହୋଇଗଲା । ହେଲେ ଶେଷକୁ ଘଟିଲା ଏଭଳି ଅଘଟଣ । ଏହାକୁ ନେଇ ସ୍ଥାନୀୟ ଅଞ୍ଚଳ ଏକପ୍ରକାର ସ୍ତବ୍ଧ ହୋଇ ଯାଇଛି । ପୂଜାର ଖୁସି ଶୋକରେ ବଦଳି ଯାଇଛି । ଏଇ ଗଣେଶ ପୂଜା କାହା ପାଇଁ ଖୁସି ଆଣି ଦେଇଥିବା ବେଳେ କେଉଁ ପରିବାରରେ ଦୁଃଖ ଓଜାଡ଼ି ଦେଇଛି । କିଏ ବାପାକୁ ହରାଇ କାନ୍ଦୁଛି ତ ଆଉ କିଏ ଭେଣ୍ଡିଆ ପୁଅକୁ ହରାଇ ଆଖିରୁ ଲୁହ ଝରାଉଛି । ଗୋଟିଏ ଅଘଟଣ ମନରୁ ନ ପାସୋରୁଣୁ ଆଉ ଗୋଟିଏ ଦୁଃଖ ସାମ୍ନାକୁ ଆସୁଛି । ଏପଟେ ସ୍ଥାନୀୟ ଲୋକେ ଅଭିଯୋଗ ହେଉଛି କି ଗାଁ ଭିତରେ ଯାଇଥିବା ଏଇ ୧୧ କେଭି ତାର ଅନେକ ଜୀବନ ନେଲାଣି । ତଥାପି କିଛି ସମାଧାନ କରାଯାଉନି । କାହିଁକି ଏ ଅବହେଳା ତାହା ପୁଣି ମଣିଷ ଜୀବନକୁ ନେଇ ? ଆଶ କରୁଛୁ କର୍ତ୍ତୃପକ୍ଷ ଗାଁ ଲୋକଙ୍କ ସମସ୍ୟା ବୁଝି ଠିକଣା ପଦକ୍ଷେପ ନେବେ ।
