ନୂଆଦିଲ୍ଲୀ: ସୋସିଆଲ ମିଡିଆରେ ଅନେକ ସମୟରେ କିଛି ଏଭଳି ଭିଡିଓ ଭାଇରାଲ ହୁଏ ଯାହା କେବେ ହସାଏ ତ କେବେ କନ୍ଦାଏ। ଏବେ ସୋସିଆଲ ମିଡିଆରେ ଚୀନର ଏକ ଚିଡ଼ିଆଖାନାର ଭିଡିଓ ଭାଇରାଲ ହେଉଛି। ଏହାକୁ ଦେଖିବା ପରେ ଆପଣ ନିଶ୍ଚିତ ଭାବରେ ଆଶ୍ଚର୍ଯ୍ୟ ହେବେ ଏବଂ ଜୋରରେ ହସିବେ। ଚୀନର ଶାଣ୍ଡୋଙ୍ଗ ପ୍ରଦେଶର ଜିବୋ ସିଟି ଆମ୍ୟୁଜମେଣ୍ଟ ପାର୍କରେ ଏକ ଅଜବ ଘଟଣା ଘଟିଥିବା ସାମ୍ନାକୁ ଆସିଛି। ଚିଡ଼ିଆଖାନା କର୍ତ୍ତୃପକ୍ଷ ଏକ ଗଧକୁ ଜେବ୍ରା ଭଳି ଦେଖାଇବା ପାଇଁ କଳା ଏବଂ ଧଳା ରଙ୍ଗରେ ରଙ୍ଗ କରିଥିବା ଜଣାଯାଇଛି।ସୂଚନା ଅନୁଯାୟୀ, ଏହି କାର୍ଯ୍ୟର ଉଦ୍ଦେଶ୍ୟ ଅଧିକ ପର୍ଯ୍ୟଟକଙ୍କୁ ଆକର୍ଷିତ କରିବା ଥିଲା। କିନ୍ତୁ ଏହାକୁ ସୋସିଆଲ ମିଡିଆରେ କଡ଼ା ସମାଲୋଚନା କରାଯାଉଛି। ଚୀନର ଚିଡ଼ିଆଖାନା ସ୍ୱୀକାର କରିଛି ଯେ ସେମାନଙ୍କ ପାଖରେ ଜେବ୍ରା ନାହିଁ, ତେଣୁ ସେମାନେ ଏକ ଗଧକୁ ରଙ୍ଗ କରି ତାକୁ ଜେବ୍ରା ପରି ଦେଖାଇବା ପାଇଁ ସମସ୍ତ ପ୍ରକାରର ଚେଷ୍ଟା କରିଥିଲେ। ଏବେ କିଛି ଲୋକ ଏଭଳି କାମକୁ ପ୍ରଶଂସା କରୁଥିବା ବେଳେ କିଛି ବିରୋଧ କରିଛନ୍ତି। ଏହି ପ୍ରସଙ୍ଗ ଉପରେ ଚିଡ଼ିଆଖାନା ପକ୍ଷରୁ କୁହାଯାଇଛି ଯେ, ଏହା ସେମାନଙ୍କର ମାର୍କେଟିଂ ରଣନୀତି।
କିଛି ସୋସିଆଲ ମିଡିଆ ବ୍ୟବହାରକାରୀ ଗଧର ଫଟୋ ସେୟାର କରିବା ପରେ ବିବାଦ ଆରମ୍ଭ ହୋଇଥିଲା, ଯେଉଁଥିରେ ଗଧର ଶରୀରରେ ଜେବ୍ରା ପରି ପଟି ଦେଖିବାକୁ ମିଳିଥିଲା। ଫଟୋ ଏବଂ ଭିଡିଓଗୁଡ଼ିକ ଭାଇରାଲ ହେବା ପରେ, ଚିଡ଼ିଆଖାନା ସ୍ୱୀକାର କରିଛି ଯେ ସେମାନେ ପ୍ରକୃତରେ ଗଧମାନଙ୍କୁ ରଙ୍ଗ କରିଥିଲେ। ସେମାନେ ଏହା ମଧ୍ୟ ଦାବି କରିଥିଲେ ଯେ ବ୍ୟବହୃତ ରଙ୍ଗ ବିଷାକ୍ତ ନୁହେଁ।
