ଛାତ୍ରନେତାଙ୍କ ଚାପରେ ଇସ୍ତଫା ଦେଲେ ବାଂଲାଦେଶ ପ୍ରଧାନ ବିଚାରପତି

ବାଂଲାଦେଶର ସର୍ବୋଚ୍ଚ ଅଦାଲତର ପ୍ରଧାନ ବିଚାରପତି ଓବାଇଡୁଲ ହାସନ ସୁପ୍ରିମକୋର୍ଟକୁ ଘେରି ରହିଥିବା ବିରୋଧକାରୀଙ୍କ ତୀବ୍ର ଚାପରେ ଇସ୍ତଫା ଦେବାକୁ ରାଜି ହୋଇଥିବା ସ୍ଥାନୀୟ ଗଣମାଧ୍ୟମ ରିପୋର୍ଟ କରିଛି। ଢାକା ଟ୍ରିବ୍ୟୁନ୍ ରିପୋର୍ଟ କରିଛି ଯେ ୬୫ ବର୍ଷୀୟ ବିଚାରପତି ସନ୍ଧ୍ୟାରେ ରାଷ୍ଟ୍ରପତି ମହମ୍ମଦ ଶାହାବୁଦ୍ଦିନଙ୍କ ସହ ପରାମର୍ଶ କରିବା ପରେ ତାଙ୍କ ଇସ୍ତଫା ପତ୍ର ପ୍ରଦାନ କରିବେ ସୁପ୍ରିମକୋର୍ଟର ଉଭୟ ବିଭାଗର ସମସ୍ତ ବିଚାରପତିଙ୍କ ସହ ହାସନ ସମ୍ପୂର୍ଣ୍ଣ କୋର୍ଟ ବୈଠକ ଡାକିବା ପରେ ଏହି ବିରୋଧ ଆରମ୍ଭ ହୋଇଥିଲା। ବିକ୍ଷୋଭକାରୀ ଛାତ୍ରମାନେ ପୂର୍ଣ୍ଣ ଅଦାଲତର ବୈଠକକୁ ନ୍ୟାୟିକ ଜବରଦଖଲ ଭାବରେ ଦେଖି ହାଇକୋର୍ଟ ପରିସରରେ ଅବରୋଧ ଘୋଷଣା କରିଥିଲେ ଛାତ୍ରମାନଙ୍କର ଆକ୍ରୋଶ ଦେଖି ପ୍ରଧାନ ବିଚାରପତି ହାସନ ବୈଠକକୁ ଘୁଞ୍ଚାଇ ଦେଇଥିଲେ ଏବଂ ପରେ ଇସ୍ତଫା ଦେବାକୁ ରାଜି ଥିବା କହିଥିଲେ। ଗଲା ବର୍ଷ ହାସନଙ୍କୁ ନିଯୁକ୍ତି ମିଳିଥିଲା, ପୂର୍ବତନ ପ୍ରଧାନମନ୍ତ୍ରୀ ଶେଖ ହସିନାଙ୍କ ସହିତ ତାଙ୍କର ସମ୍ପର୍କ ଖୁବ ଭଲ ବୋଲି କୁହାଯାଏ। ତେବେ ଆନ୍ଦୋଳନରତ ଛାତ୍ରମାନେ ତାଙ୍କୁ ଇସ୍ତଫା ଦେବା ପାଇଁ ଏକ ଘଣ୍ଟାର ଅଲଟିମେଟମ୍ ଦେଇଥିଲେ। ଅର୍ଥ ମନ୍ତ୍ରଣାଳୟର ପରାମର୍ଶଦାତା ସାଲେହୁଦ୍ଦିନ ଅହମ୍ମଦ ଗଣମାଧ୍ୟମକୁ କହିଛନ୍ତି ଯେ ବାଂଲାଦେଶ ବ୍ୟାଙ୍କ ଗଭର୍ଣ୍ଣର ଅବଦୁର ରୁଫ ତାଲୁକର ମଧ୍ୟ ଇସ୍ତଫା ଦେଇଛନ୍ତି କିନ୍ତୁ ଏହି ପଦବୀକୁ ଗୁରୁତ୍ୱ ଦେଇ ତାଙ୍କ ଇସ୍ତଫା ଗ୍ରହଣ କରାଯାଇ ନାହିଁ। କିଛି ଦିନ ପୂର୍ବରୁ ଚାରିଜଣ ଡେପୁଟି ଗଭର୍ଣ୍ଣର ଦୁର୍ନୀତିରେ ଲିପ୍ତ ଥିବା ୩୦୦ ରୁ ୪୦୦ ବ୍ୟାଙ୍କ ଅଧିକାରୀଙ୍କ ଅଭିଯୋଗରେ ଇସ୍ତଫା ଦେବାକୁ ବାଧ୍ୟ ହୋଇଥିଲେ। ଦେଶରେ ସଂରକ୍ଷଣକୁ ବିରୋଧକରି ଛାତ୍ରମାନଙ୍କର ଆନ୍ଦୋଳନ ପରେ ଅଶାନ୍ତିକର ପରିସ୍ଥିତି ସୃଷ୍ଟି ହୋଇଛି। ଯେଉଁଥିରେ ଅନେକ ପୋଲିସ କର୍ମଚାରୀଙ୍କ ସମେତ ୪୫୦ ରୁ ଅଧିକ ଲୋକଙ୍କ ମୃତ୍ୟୁ ଘଟିଛି। ଯେଉଁଠି ପାଇଁ ପୂର୍ବତନ ପ୍ରଧାନମନ୍ତ୍ରୀ ଶେଖ ହାସିନାଙ୍କୁ ଦୋଷୀ ବୋଲି କୁହାଯାଉଛି।