ନୂଆଦିଲ୍ଲୀ : ଭାରତୀୟ ଜନତା ପାର୍ଟି (ବିଜେପି) ଭାରତୀୟ ସେନାର ‘ଅପରେସନ ସିନ୍ଦୁର’ର ସଫଳତାକୁ ଉଦଯାପନ କରି ଏକ ନୂଆ ଗୀତ ଜାରି କରିଛି। ଏହି ଗୀତ ଭାରତୀୟ ସେନାର ସାହସିକତା ଓ ଦୃଢ଼ତାକୁ ପ୍ରଦର୍ଶନ କରୁଥିବା ବେଳେ ଦେଶର ଶତ୍ରୁମାନଙ୍କୁ ଏକ ସ୍ପଷ୍ଟ ଚେତାବନୀ ଦେଉଛି। ଗୀତର ମୁଖ୍ୟ ପଙ୍କ୍ତି “ତୁମନେ କିୟା ହୈ ଶୁରୁ, ତୋ ଦେଖ ଲୋ ମୋଦୀ କରେଗା ଖତମ କାହାଣୀ” (ତୁମେ ଆରମ୍ଭ କରିଛ, ଏବେ ଦେଖ ମୋଦି ଏହାର ଅନ୍ତ କରିବେ) ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱକୁ ଦୃଢ଼ ଭାବେ ଉପସ୍ଥାପନ କରୁଛି। ଏହି ଗୀତ ସୋସିଆଲ ମିଡିଆରେ ବେଶ ଲୋକପ୍ରିୟ ହୋଇଛି ଓ ବିଜେପିର ତିରଙ୍ଗା ଯାତ୍ରା ସହିତ ଜାତୀୟତାବାଦୀ ସଂଦେଶକୁ ଆହୁରି ଜୋରଦାର କରିଛି। ଏହି ଗୀତ ଭାରତୀୟ ସେନା, ନୌସେନା ଓ ବାୟୁସେନାର ବୀରତ୍ୱ ଓ ବଳିଦାନକୁ ଜାତୀୟ ଗୌରବର ସହ ଉପସ୍ଥାପନ କରୁଛି। ଏହା ‘ଅପରେସନ ସିନ୍ଦୁର’ରେ ପାକିସ୍ତାନ ଓ ପାକିସ୍ତାନ ଅଧିକୃତ କାଶ୍ମୀର (PoK) ରେ ଥିବା ଆତଙ୍କବାଦୀ ଠିକଣା ଉପରେ ଭାରତୀୟ ସେନାର ସଫଳ ଆକ୍ରମଣକୁ ହାଇଲାଇଟ କରୁଛି। ଗୀତର ପ୍ରୋମୋସନାଲ ପୋଷ୍ଟରରେ ବିଜେପି ସାଂସଦ ଓ ଗାୟକ ମନୋଜ ତିୱାରୀ ସୈନିକ ପୋଷାକରେ କର୍ଣ୍ଣେଲ ସୋଫିୟା କୁରେଶୀ ଓ ୱିଙ୍ଗ କମାଣ୍ଡର ବ୍ୟୋମିକା ସିଂଙ୍କ ସହ ଦେଖା ଦେଇଛନ୍ତି, ଯେଉଁମାନେ ଏହି ଅପରେସନରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲେ।
ଗୀତର ପଙ୍କ୍ତି “କହାଣୀ ଅବ ଶୁରୁ ହୁଆ ହୈ” (କାହାଣୀ ଏବେ ଆରମ୍ଭ ହୋଇଛି) ଓ “ତୁମନେ କିୟା ହୈ ଶୁରୁ, ମୋଦୀ କରେଗା ଖତମ” ଭାରତର ଦୃଢ଼ ନୀତି ଓ ଆତଙ୍କବାଦ ବିରୋଧୀ ଅଭିଯାନରେ ପ୍ରଧାନମନ୍ତ୍ରୀ ମୋଦୀଙ୍କ ନେତୃତ୍ୱକୁ ଜୋରଦାର ଭାବେ ଉପସ୍ଥାପନ କରୁଛି। ଏହି ଗୀତ ପାକିସ୍ତାନ, ଚୀନ ଓ ତୁର୍କୀ ଭଳି ଦେଶମାନଙ୍କୁ ଏକ କଠୋର ସଂଦେଶ ଦେଉଛି, ଯେଉଁମାନେ ଆତଙ୍କବାଦକୁ ସମର୍ଥନ କରୁଛନ୍ତି। ସୋସିଆଲ ମିଡିଆରେ ଏହି ଗୀତ ବ୍ୟାପକ ଚର୍ଚ୍ଚାରେ ରହିଛି, ଯେଉଁଥିରେ #OperationSindoor ହ୍ୟାସଟ୍ୟାଗ ଟ୍ରେଣ୍ଡ କରୁଛି। ବିଜେପିର ଅଫିସିଆଲ ଏକ୍ସ ହ୍ୟାଣ୍ଡେଲରେ ପୋଷ୍ଟ କରାଯାଇଥିବା ଏକ ଭିଡିଓରେ କୁହାଯାଇଛି, “ନୂଆ ଭାରତ ସେହିମାନଙ୍କୁ ଛାଡ଼ୁନାହିଁ, ଯିଏ ଆମମାନଙ୍କ ସହ ଲାଗୁଛନ୍ତି । ଶତ୍ରୁ ପୃଥିବୀ, ଆକାଶ କିମ୍ବା ପାତାଳରେ ଲୁଚି ରହିଥାଉ, ଖୋଜି ମାରୁଛି!” ଏହି ଗୀତ ଓ ଏହାର ପ୍ରଚାର ଜାତୀୟତାବାଦୀ ଭାବନାକୁ ଆହୁରି ଜାଗ୍ରତ କରୁଛି।
