ନୂଆଦିଲ୍ଲୀ : ଭାଜପା ରାଷ୍ଟ୍ରୀୟଅଧ୍ୟକ୍ଷ ନୀତିନ ନବୀନଙ୍କୁ ଆଜି ଭେଟିଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ। ନୂଆଦିଲ୍ଲୀ ଭାଜପା ମୁଖ୍ୟାଳୟରେ ରାଷ୍ଟ୍ରୀୟ ଅଧ୍ୟକ୍ଷଙ୍କୁ ଭେଟି ଓଡ଼ିଶାର ଦଳର ସାଂଗଠନିକ ସ୍ଥିତି ଓ ସମନ୍ବୟ ଉପରେ ଆଲୋଚନା କରିଛନ୍ତି। ବୈଠକ ପରେ ମୁଖ୍ୟମନ୍ତ୍ରୀ ଏକ୍ସରେ ପୋଷ୍ଟ କରିଛନ୍ତି ଆଜି ଭାରତୀୟ ଜନତା ପାର୍ଟିର ସଭାପତି ନୀତିନ ନବୀନ ଜୀଙ୍କୁ ଭେଟିଛନ୍ତି ଏବଂ ଓଡ଼ିଶାରେ ସାଂଗଠନିକ ସମନ୍ବୟକୁ ସୁଦୃଢ଼ କରିବା ଏବଂ ବିକାଶ ପଦକ୍ଷେପକୁ ତ୍ୱରାନ୍ବିତ କରିବା ଉପରେ ଫଳପ୍ରଦ ଆଲୋଚନା କରିଛନ୍ତି। ସୁଶାସନ,ଅନ୍ତର୍ଭୁକ୍ତିମୂଳକ ଅଭିବୃଦ୍ଧି ଏବଂ ଆମ ରାଜ୍ୟର ଲୋକଙ୍କ କଲ୍ୟାଣ ପାଇଁ ଆମର ମିଳିତ ପ୍ରତିବଦ୍ଧତାକୁ ପୁନଃସ୍ଥାପିତ କରିଛନ୍ତି। ଯଦିଓ ଏହି ବୈଠକକୁ ଆନୁଷ୍ଠାନିକ ଭାବରେ ରାଜ୍ୟରେ ସାଂଗଠନିକ ସମନ୍ବୟ ଏବଂ ବିକାଶ ପ୍ରାଥମିକତା ଉପରେ ଆଲୋଚନା ଭାବରେ ବର୍ଣ୍ଣନା କରାଯାଇଥିଲା, କିନ୍ତୁ ଆଗକୁ ରାଜ୍ୟସଭା ନିର୍ବାଚନ ହେବାକୁ ଥିବାରୁ ସେ ନେଇ ଆଲୋଚନା ହୋଇଥିବା ନେଇ ଦଳୀୟ ମହଲରେ ଚର୍ଚ୍ଚା ହୋଇଥବା ନେଇ ଆଲୋଚନା ହେଉଛି।
୪ଟି ଆସନରେ ନିର୍ବାଚନ ପାଇଁ ରାଜ୍ୟରୁ ସମ୍ଭାବ୍ୟ ପ୍ରାର୍ଥୀଙ୍କୁ ନେଇ କଳ୍ପନାଜଳ୍ପନା ତୀବ୍ର ହୋଇଛି। ସେମାନଙ୍କର ବର୍ତ୍ତମାନର ବିଧାନସଭା ଶକ୍ତିକୁ ଆଧାର କରି, ଭାଜପା ଦୁଇଟି ଆସନ ଏବଂ ବିଜେଡି ଗୋଟିଏ ଜିତିବାକୁ ପ୍ରସ୍ତୁତ, ଅନ୍ୟ କୌଣସି ଦଳ ପାଖରେ ଚତୁର୍ଥ ଆସନ ପାଇବା ପାଇଁ ସଂଖ୍ୟା ନାହିଁ। ବର୍ତ୍ତମାନ ସମସ୍ତଙ୍କ ନଜର ଚତୁର୍ଥ ଆସନ ଉପରେ।ଚତୁର୍ଥ ଆସନ ପାଇଁ ରାଜ୍ୟରାଜନୀତି ଚଳଚଞ୍ଚଳ ହୋଇଉଠିଛି।
