ଅଭିନେତ୍ରୀ ମୌନୀ ରୟ ଅସଦାଚରଣ ହୋଇଥିବା ଅନୁଭବ ସେୟାର କରିବା ପରେ ବଙ୍ଗାଳୀ ଅଭିନେତ୍ରୀ ମିମି ଚକ୍ରବର୍ତ୍ତୀ ମଧ୍ୟ ଅସଦାଚରଣର ଶିକାର ହୋଇଛନ୍ତି । ଅଭିନେତ୍ରୀ ଜଣକ ଗଣତନ୍ତ୍ର ଦିବସ ଅବସରରେ ସୋସିଆଲ ମିଡିଆରେ ଏକ ପୋଷ୍ଟ ସେୟାର କରି କହିଛନ୍ତି, ବନଗାଁରେ ଏକ ଇଭେଣ୍ଟ ସମୟରେ ସର୍ବସାଧାରଣ ସ୍ଥାନରେ ଅସଦାଚରଣ ହୋଇଥିବା ଜଣାପଡିଛି ।
ମିମି ଚକ୍ରବର୍ତ୍ତୀ କହିଛନ୍ତି, ଯେତେବେଳେ ମୁଁ ପରଫର୍ମ କରୁଥିଲି, ହଠାତ୍ ଷ୍ଟେଜ ଛାଡିବାକୁ କୁହାଯାଇଥିଲା । ଏମିତି ବାହାରିବା ବେଳେ ମାଇକ୍ରୋଫୋନରେ ଅପମାନଜନକ କମେଣ୍ଟ କରାଯାଇଥିଲା । ଯାହା ମୋ ସମ୍ମାନ ଏବଂ ସ୍ବାଭିମାନକୁ କ୍ଷତି ପହଞ୍ଚାଇଥିଲା । ଆମେ ଗଣତନ୍ତ୍ର ଦିବସ ପାଳନ କରୁଛେ କିନ୍ତୁସ୍ବାଧୀନତା ଏବଂ ସମାନତା ବିଷୟରେ ଚିନ୍ତା କରୁଛେ, ଏହାସତ୍ତ୍ବେ ମଧ୍ୟ ମହିଳା ଏବଂ କଳାକାରଙ୍କ ସ୍ବାଧୀନତା ଏବଂ ସମ୍ମାନ ସହିତ ଏବେ ବି ବୁଝାମଣା କରାଯାଉଛି । ମୁଁ ଏତେ ବର୍ଷ ମଧ୍ୟରେ ନିଜର ପରିଚୟ ଏବଂ କ୍ୟାରିଅର ନିଜେ ଗଢିଛି ।
ଘଟଣା ପରେ ମିମି ଥାନାରେ ଏଫଆଇଆର ଦାୟର କରିଛନ୍ତି । ଘଟଣାକୁ ନେଇ ଆୟୋଜକ ସଂସ୍ଥା କହିଛି କି, କାର୍ଯ୍ୟକ୍ରମ ୧ ଘଣ୍ଟା ବିଳମ୍ବରେ ହୋଇଥିଲା । ତେଣୁ ଅଭିନେତ୍ରୀଙ୍କୁ ତରନ୍ତ ମଞ୍ଚରୁ ତଳକୁ ଆସିବାକୁ କୁହାଯାଇଥିଲା ।କାର୍ଯ୍ୟକ୍ରମ ଆୟୋଜକ ଅଜୟ ବନିକଙ୍କ କହିବା ମୁତାବକ, ପ୍ରଶାସନ ନିକଟରୁ ୧୨ ଯାଏଁ ସମୟ ନେଇଥିଲେ । ଆଉ ଅଭିନେତ୍ରୀ ଜଣକ ୧୧.୩୦ରେ ପହଞ୍ଚିଥିଲେ । ଆଉ ୧୨.୪୫ରେ ମଞ୍ଚକୁ ଯାଇଥିଲେ । ତେଣୁ ଏମିତି କହିବାକୁ ପଡିଥିଲା । କିନ୍ତୁ ଆମେ ମଞ୍ଚରୁ ଓହ୍ଲାଇ ଯିବାକୁ କହିଥିଲୁ ସତ କିନ୍ତୁ କୌଣସି ଅପଶବ୍ଦ ବ୍ୟବହାର କରିନଥିଲୁ । ଆଉ ଯଦି କିଛି ଭୁଲ ହୋଇଛି, ତେବେ ଅନୁଷ୍ଠାନ ତରଫରୁ କ୍ଷମା ମାଗୁଛୁ ।
