ଆମେରିକାର ମୋଷ୍ଟ ୱାଣ୍ଟେଡ୍ ଫ୍ରଡ୍ ଭାରତରେ ଗିରଫ । ବଡ ଧରଣର ଠକେଇ ମାମଲାର ଅଭିଯୁକ୍ତ ମଞ୍ଜିତ ସିଂହ ବେଦୀଙ୍କୁ ଭାରତରେ ଗିରଫ କରାଯାଇଛି । ତାଙ୍କ ବିରୋଧରେ ଆମେରିକୀୟ ସରକାରୀ ଯୋଜନାରେ ୬ ଲକ୍ଷ ଡଲାରରୁ ଅଧିକ ଠକେଇ କରିଥିବା ଅଭିଯୋଗ ରହିଛି । ବେଦୀଙ୍କ ଗିରଫଦାରୀ ପାଇଁ ଆମେରିକୀୟ ସରକାର ୧.୫ ଲକ୍ଷ ଡଲାର, ଅର୍ଥାତ୍ ପ୍ରାୟ ୧.୨୫ କୋଟି ଟଙ୍କାର ପୁରସ୍କାର ଘୋଷଣା କରିଥିଲା ।
FBI ନିର୍ଦ୍ଦେଶକ କାଶ୍ ପଟେଲ ନିଜେ ମଞ୍ଜିତ ସିଂହ ବେଦୀଙ୍କ ଗିରଫ ବିଷୟରେ ସୂଚନା ଦେଇଛନ୍ତି । ସେ କହିଛନ୍ତି ଯେ, ବେଦୀଙ୍କୁ ଭାରତରେ ଗିରଫ କରାଯାଇଛି । ସେ ଗତବର୍ଷ ଆମେରିକାରୁ ଭାରତକୁ ପଳାଇ ଆସିଥିବା ଜଣାପଡ଼ିଥିଲା । ଏବେ FBI ତାଙ୍କୁ ଆମେରିକା ଫେରାଇ ନେବା ପାଇଁ ତାତ୍ପରତାର ସହ କାମ କରୁଛି ।
କ’ଣ ରହିଛି ପୂରା ମାମଲା?
FBI ଅନୁଯାୟୀ, ମଞ୍ଜିତ ସିଂହ ବେଦୀ ୱାଶିଂଟନ୍ର ଟାକୋମା ଅଞ୍ଚଳରେ ଏକ ଛୋଟ ଦୋକାନ ଚଳାଉଥିଲେ । ସେ ଆମେରିକାର ସପ୍ଲିମେଣ୍ଟାଲ୍ ନ୍ୟୁଟ୍ରିସନ୍ ଆସିଷ୍ଟାନ୍ସ ପ୍ରୋଗ୍ରାମ୍ (SNAP) ଅଧୀନରେ ମିଳୁଥିବା ସରକାରୀ ବେନିଫିଟ୍ କାର୍ଡର ଦୁରୁପଯୋଗ କରିଥିବା ଅଭିଯୋଗ ହୋଇଛି । ସେ ଗ୍ରାହକଙ୍କ SNAP କାର୍ଡରୁ ଟଙ୍କା କାଟି ନେଉଥିଲେ । ତାବଦଳରେ ରାସନ ଦେବା ପରିବର୍ତ୍ତେ ନଗଦ ଟଙ୍କା ଦେଉଥିଲେ । ଏହି କାରବାରରେ ସେ ମୋଟ ଟଙ୍କାର ପ୍ରାୟ ଅଧା ନିଜ ପାଖରେ ରଖୁଥିଲେ ।
ମାର୍ଚ୍ଚ ୨୦୨୪ରୁ ଜୁନ୍ ୨୦୨୫ ମଧ୍ୟରେ ବେଦୀ ଆମେରିକୀୟ ସରକାରଙ୍କୁ ଅତି କମରେ ୬ ଲକ୍ଷ ଡଲାରର ଠକେଇ କରିଥିବା ଅଭିଯୋଗ ହୋଇଛି । ତାଙ୍କ ବିରୋଧରେ ୱାୟାର୍ ଫ୍ରଡ୍ ଏବଂ SNAP ବେନିଫିଟ୍ ଫ୍ରଡ୍ ଭଳି ମାମଲା ରୁଜୁ ହୋଇଛି ।
ଜାମିନ ପାଇବା ପରେ ଫେରାର:
ମାମଲା ରୁଜୁ ହେବା ପରେ ଅଦାଲତ ତାଙ୍କୁ ଗିରଫ ନକରି ମଧ୍ୟ ହାଜର ହେବାକୁ ଅନୁମତି ଦେଇଥିଲେ । ତାଙ୍କୁ ପାସପୋର୍ଟ ଜମା କରିବା ସହ ୱାଶିଂଟନ୍ ରାଜ୍ୟ ଛାଡ଼ି ନଯିବାକୁ ନିର୍ଦ୍ଦେଶ ଦିଆଯାଇଥିଲା । ଏହା ସତ୍ତ୍ୱେ ବେଦୀ ଗାଡ଼ି ଚଳାଇ କାନାଡା ସୀମା ପାର କରିଥିଲେ । ପରେ ସେ କାନାଡାରୁ ଭାରତକୁ ପଳାଇ ଆସିଥିବା ଜଣାପଡ଼ିଛି । ଏହାପରେ ଆମେରିକାର ଜିଲ୍ଲା ଅଦାଲତ ମେ’ ୨୧ ତାରିଖରେ ତାଙ୍କ ବିରୋଧରେ ଜାମିନବିହୀନ ଗିରଫ ପରୱାନା ଜାରି କରିଥିଲେ ।
