ମଲ୍‌, ହସ୍ପିଟାଲ୍ ଓ ହୋଟେଲ୍‌ରେ ସ୍ଥିତି ଯାଞ୍ଚ କଲା ଅଗ୍ନିଶମ ବିଭାଗ

ଗତକାଲି ପ୍ରାୟ ୧୧ଟାରେ ସିଏଫ୍‌ଓଙ୍କ ନେତୃତ୍ବରେ ୨ଟି ଫାୟାର୍ ଷ୍ଟେସନ୍‌ର ୧୫ଜଣିଆ ଟିମ୍ ପ୍ରଥମେ ଏସପ୍ଲାନେଡ୍ ମଲ୍‌ରେ ଯାଞ୍ଚ କରିଥିଲେ। ତଳ ମହଲାରୁ ଆରମ୍ଭ କରି ଅଧିକାରୀମାନେ ତୃତୀୟ ମହଲା ପର୍ଯ୍ୟନ୍ତ ଅଗ୍ନି ନିରାପତ୍ତା ସମୀକ୍ଷା କରିଥିଲେ। ଏହା ସହିତ ଵାଟର୍ ଷ୍ଟୋରେଜ୍ ଓ ସ୍ପ୍ରିଙ୍କଲର୍ ଆଦି ଅନୁଧ୍ୟାନ କରିଥିଲେ। ଅପରାହ୍ନ ପ୍ରାୟ ୩ଟା ବେଳକୁ ଗଜପତିନଗରରେ ଥିବା ଆପୋଲ ହସ୍ପିଟାଲରେ ଆଗ୍ନିକ ଟିମ୍ ଯାଞ୍ଚ ପ୍ରକ୍ରିୟା ଆରମ୍ଭ କରିଥିଲା। ହସ୍ପିଟାଲର ପ୍ରବେଶ ଓ ପ୍ରସ୍ଥାନ ପଏଣ୍ଟ୍ ବୁଲି ଦେଖିବା ସହିତ ରୋଗୀଙ୍କ ପାଇଁ ଉଦ୍ଦିଷ୍ଟ ଆଇସିୟୁ ଵାର୍ଡ ଓ ସେଠାରେ ଥିବା ଅଗ୍ନି ସୁରକ୍ଷା ବ୍ୟବସ୍ଥା ପରଖା ଯାଇଥିଲା। ପରେ ଜୟଦେବବିହାର ନିକଟସ୍ଥ ଜିଞ୍ଜର୍ ହୋଟେଲ୍‌ରେ ଅଗ୍ନି ନିରାପତ୍ତା ବ୍ୟବସ୍ଥା ଯାଞ୍ଚ୍ ହୋଇଥିଲା। ହୋଟେଲ୍ କର୍ମଚାରୀଙ୍କୁ ଅଗ୍ନିକାଣ୍ଡ ସମୟରେ ଭୟଭୀତ ନହୋଇ କିଭଳି ଲୋକଙ୍କୁ ସୁରକ୍ଷିତ ଭାବେ ବାହାର କରାଯିବ ଏବଂ ଅଗ୍ନି ନିର୍ବାପକ ଯନ୍ତ୍ର ବ୍ୟବହାର ଆଦି ସମ୍ପର୍କରେ ସଚେତନ କରାଯାଇଥିଲା। ଏହି ଯାଞ୍ଚ ପ୍ରକ୍ରିୟାରେ ସିଏଫ୍‌ଓଙ୍କ ସମେତ ଡେପୁଟି ଫାୟାର ଅଫିସର ନାରାୟଣ ଦାଶ, ଆସିଷ୍ଟାଣ୍ଟ ଫାୟାର୍ ଅଫିସର ଜିତେନ୍ଦ୍ର କୁମାର ଦାଶ, ଷ୍ଟେସନ୍ ଅଫିସର୍ ଗୋବିନ୍ଦ ଚନ୍ଦ୍ର ଜେନା ଓ ଜ୍ଞାନରଂଜନ ବେହେରା ପ୍ରମୁଖ ସାମିଲ ହୋଇଥିଲେ। ବୋଲି ବିଭାଗୀୟ ସୂତ୍ରରୁ ଜଣାପଡ଼ିଛି।