ନୂଆଦିଲ୍ଲୀ: ଆସନ୍ତା ବର୍ଷ ପଶ୍ଚିମବଙ୍ଗରେ ବିଧାନସଭା ନିର୍ବାଚନ ଅନୁଷ୍ଠିତ ହେବ। ଏହାପୂର୍ବରୁ ତୃଣମୂଳ କଂଗ୍ରେସ ମୁଖ୍ୟ ତଥା ମୁଖ୍ୟମନ୍ତ୍ରୀ ମମତା ବାନାର୍ଜୀ ସକ୍ରିୟ ହୋଇପଡ଼ିଛନ୍ତି। ଗୁରୁବାର କୋଲକାତାର ନେତାଜୀ ଷ୍ଟାଡିୟମରେ ବ୍ଲକ ସ୍ତରର ନେତାଙ୍କ ଠାରୁ ଆରମ୍ଭ କରି ସମସ୍ତ ସାଂସଦ ଏବଂ ବିଧାୟକଙ୍କ ବୈଠକ ଡାକିଛନ୍ତି। ଏହି ବୈଠକରେ ସେ ଦିଲ୍ଲୀ ଏବଂ ମହାରାଷ୍ଟ୍ରରେ ବିଜେପିର ବିଜୟ ପାଇଁ ନିର୍ବାଚନ ଆୟୋଗର କାର୍ଯ୍ୟଶୈଳୀକୁ ଦାୟୀ କରିଛନ୍ତି।ମମତା ବାନାର୍ଜୀ କହିଛନ୍ତି, ‘ହରିୟାଣା ଏବଂ ଗୁଜରାଟର ଲୋକଙ୍କ ନକଲି ଭୋଟ୍ ଦେଇ ଦିଲ୍ଲୀ ଏବଂ ମହାରାଷ୍ଟ୍ର ନିର୍ବାଚନରେ ବିଜେପି ବିଜୟୀ ହୋଇଛି।’ ସେ କର୍ମୀମାନଙ୍କ ସାମ୍ନାରେ ଘୋଷଣା କରିଛନ୍ତି ଯେ ଯଦି ଆବଶ୍ୟକ ହୁଏ ତେବେ ଆମେ ଭୋଟର ତାଲିକାରୁ ନକଲି ଭୋଟରଙ୍କ ନାମ ହଟାଇବାକୁ ଦାବି କରି ନିର୍ବାଚନ ଆୟୋଗ କାର୍ଯ୍ୟାଳୟ ସମ୍ମୁଖରେ ଧାରଣା ମଧ୍ୟ ଦେବୁ । ମମତା ବାନାର୍ଜୀ ଅଭିଯୋଗ କରିଛନ୍ତି ଯେ ଜ୍ଞାନେସ କୁମାରଙ୍କୁ ମୁଖ୍ୟ ନିର୍ବାଚନ କମିଶନର ଭାବେ ନିଯୁକ୍ତ କରିବା ପରେ ବିଜେପି ନିର୍ବାଚନ ଆୟୋଗକୁ ପ୍ରଭାବିତ କରିବାକୁ ଚେଷ୍ଟା କରୁଛି। ସେ କହିଛନ୍ତି ଯେ ଯଦି ନିର୍ବାଚନ ଆୟୋଗ ନିରପେକ୍ଷ ନହୁଏ ତେବେ ମୁକ୍ତ ଏବଂ ନିରପେକ୍ଷ ନିର୍ବାଚନ ହୋଇପାରିବ ନାହିଁ।
ଏହି ବୈଠକରେ ଟିଏମସି ସାଧାରଣ ସମ୍ପାଦକ ଅଭିଷେକ ବାନାର୍ଜୀ କର୍ମୀମାନଙ୍କୁ ସମ୍ବୋଧିତ କରିବାବେଳେ କହିଛନ୍ତି ଯେ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ସହ ତାଙ୍କର କୌଣସି ପ୍ରକାରର ମତଭେଦ ନାହିଁ। ସେ କହିଛନ୍ତି ମୁଁ ତୃଣମୂଳ କଂଗ୍ରେସର ଜଣେ ବିଶ୍ୱସ୍ତ ସୈନିକ ଏବଂ ମୋର ନେତା ମମତା ବାନାର୍ଜୀ। ଭାରତୀୟ ଜନତା ପାର୍ଟିରେ ଯୋଗଦେବା ନେଇ ହୋଇଥିବା କଳ୍ପନାଜଳ୍ପନାକୁ ପ୍ରତ୍ୟାଖ୍ୟାନ କରି ଅଭିଷେକ କହିଛନ୍ତି ଯେ ଯେଉଁମାନେ କହୁଛନ୍ତି ମୁଁ ବିଜେପିରେ ଯୋଗ ଦେଉଛି ସେମାନେ ମିଥ୍ୟା ଗୁଜବ ପ୍ରଚାର କରୁଛନ୍ତି।
ସେ କହିଥିଲେ, ‘ମୁଁ ସେହି ଲୋକଙ୍କୁ ଜାଣେ ଯେଉଁମାନେ ଏପରି ମିଥ୍ୟା ଖବର ପ୍ରଚାର କରୁଛନ୍ତି। ଆସନ୍ତା ବର୍ଷ ବିଧାନସଭା ନିର୍ବାଚନ ପୂର୍ବରୁ ସେମାନଙ୍କର ସ୍ୱାର୍ଥ ରହିଛି।
