ଆଠଗଡ଼ : ମୃତଦେହକୁ କାନ୍ଧରେ ବୋହି ୫ କିଲୋମିଟର ଆଣିଲେ । ଥାନା ଆଗରେ ରଖି ବିକ୍ଷୋଭ କଲେ । ନ୍ୟାୟ ଦାବିରେ ଦଳିତ ଆଦିବାସୀ ମହାସଂଘର ବିକ୍ଷୋଭ । ଏ ହେଉଛି ଆଠଗଡ଼ ଗୁରୁଡ଼ିଝାଟିଆ ଅଞ୍ଚଳର ଦୃଶ୍ୟ । ଗୁରୁଡ଼ିଝାଟିଆ ଥାନା ଅନ୍ତର୍ଗତ ଓରିଙ୍ଗାବାଡ଼ି ଗାଁରେ ୧୬ ତାରିଖରେ ଏକ ପାଚେରୀ ନିର୍ମାଣକୁ କେନ୍ଦ୍ର କରି ହତ୍ୟାକାଣ୍ଡ ଘଟିଥିଲା ।
ପାଚେରୀ ନିର୍ମାଣକୁ କିଛି ଆଦିବାସୀ ଶ୍ରେଣୀର ଲୋକେ ବିରୋଧ କରିଥିଲେ। ଏହାକୁ ନେଇ ମାଡ଼ପିଟ ହୋଇଥିଲା । ଅପର ଗୋଷ୍ଠୀର ମାଡ଼ରେ ବିକ୍ରମ ଜେରାଇ ନାମକ ଜଣେ ଯୁବକଙ୍କର ମୃତ୍ୟୁ ହୋଇଥିଲା । ଆଉ ଦୁଇ ଜଣ ଗୁରୁତର ଅବସ୍ଥାରେ କଟକରେ ଚିକିତ୍ସିତ ହେଉଛନ୍ତି । ଏହି ଘଟଣାରେ ଅଭିଯୁକ୍ତମାନଙ୍କୁ ତୁରନ୍ତ ଗିରଫ ଦାବିରେ ଦଳିତ ଆଦିବାସି ମହାସଂଘ ପକ୍ଷରୁ ଗୁରୁଡ଼ିଝାଟିଆ ଥାନା ଆଗରେ ମୃତ ଦେହ ରଖି ବିକ୍ଷୋଭ ପ୍ରଦର୍ଶନ କରାଯାଇଥିଲା । ୫ କିଲୋମିଟର କାନ୍ଧିରେ ଆଣିବା ପରେ ଥାନା ଆଗରେ ମୃତଦେହ ରଖି ବିକ୍ଷୋଭ କରିଥିଲେ । ଖୁବ ଶୀଘ୍ର ଅଭିଯୁକ୍ତମାନଙ୍କୁ ଗିରଫ କରିବାକୁ ପୋଲିସ ପ୍ରତିଶ୍ରୁତି ଦେବା ପରେ ବିକ୍ଷୋଭ ପ୍ରତ୍ୟାହୃତ ହୋଇଥିଲା ।
