ରାଜନଗର : ରାଜନଗର ବ୍ଲକ ଘଡିଆମାଳ ପଞ୍ଚାଯତ ନୂଆଗାଁ ଅଙ୍ଗନବାଡି କେନ୍ଦ୍ରରେ ଛୁଆଁ ଅଛୁଆଁ ଭେଦଭାବ ଏବେ ଆଉ ଓଡ଼ିଶା ଭିତରେ ସୀମିତ ନାହିଁ । ଏହାକୁ ନେଇ ଜାତୀୟସ୍ତରରେ ଉଦବେଗ ସୃଷ୍ଟି ହୋଇଛି । ତଥାପି ସ୍ଥିତିରେ ପରିବର୍ତ୍ତନ ନାହିଁ । ରାଜ୍ୟସଭାରେ ଏହି ପ୍ରସଙ୍ଗ ଉଠାଇଛନ୍ତି କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡଗେ । ଶର୍ମଷ୍ଠା ସେଠୀଙ୍କ କଥା ଉତ୍ଥାପନ କରିଛନ୍ତି । ଘଟଣାକୁ କଡ଼ା ଶବ୍ଦରେ ନିନ୍ଦା କରିବା ଏଭଳି ଭେଦଭାବ ପିଲାଙ୍କ ବିକାଶ ଉପରେ ପ୍ରଭାବ ପକାଇବ ବୋଲି କହିଛନ୍ତି ।
ଛୁଆଁ ଅଛୁଆଁ ଭେଦଭାବ ଯୋଗୁଁ, ଦିନେ କି ଦୁଇ ଦିନ ନୁହେଁ ଦୀର୍ଘ ୮୫ ଦିନ ହେଲା ଅଙ୍ଗନବାଡି କେନ୍ଦ୍ରକୁ ପଢିବାକୁ ଆସୁନାହାନ୍ତି କୋମଳମତି ଶିଶୁ । ଏଭଳି ଏକ କୁତ୍ସିତ ଘଟଣାକୁ ୮୫ ଦିନ ବିତିଥିବା ବେଳେ ପ୍ରଶାସନ କାହିଁକି ଚୁପ ବସିଥିଲା । ଗଣମାଧ୍ୟମରେ ଖବର ପ୍ରକାଶ ପାଇବା ଯାଏଁ ଜିଲ୍ଲା ସମାଜ ମଙ୍ଗଳ ଅଧିକାରିଣୀଙ୍କ ପାଦ ଗାଁରେ ପଡିନଥିଲା କାହିଁକି ?
ଅନୁସୂଚିତ ଜାତିର ଯୁବତୀ ଶର୍ମିଷ୍ଠା ସେଠୀ ୨୦ ନଭେମ୍ବର ୨୦୨୫ରେ ନୂଆଗାଁ ଅଙ୍ଗନବାଡି କେନ୍ଦ୍ରର ସହାୟିକା ଭାବେ ନିଯୁକ୍ତି ପାଇଥିଲେ । ଶର୍ମିଷ୍ଠାଙ୍କ ନିଯୁକ୍ତି ଦିନ ଠାରୁ ଗ୍ରାମବାସୀ ଶିଶୁଙ୍କୁ ପଢିବାକୁ ଅଙ୍ଗନବାଡିକୁ ଛାଡୁ ନାହାନ୍ତି । ସହାୟିକାଙ୍କ ହାତରୁ ଗର୍ଭବତୀ , ପ୍ରସୂତି ଓ ଶିଶୁ ଖାଦ୍ୟ ବି ଗ୍ରହଣ କରୁନାହାନ୍ତି ।
ଗଣମାଧ୍ୟମରେ ଖବର ପ୍ରକାଶ ପରେ ଉପଜିଲ୍ଲାପାଳଙ୍କ ନେତୃତ୍ଵରେ ଟିମ୍ ବୁଧବାର ଗାଁରେ ପହଞ୍ଚିଥିଲେ ମଧ୍ୟ ଗ୍ରାମବାସୀ ଆଲୋଚନାକୁ ଆସିନଥିଲେ । ଆଜି କଂଗ୍ରେସ ର ପ୍ରତିନିଧି ଦଳ ସେହି ଗାଁରେ ପହଞ୍ଚି ଲୋକଙ୍କ ସହ ଆଲୋଚନା କରିବା ସହ ପ୍ରଶାସନ ଉପରେ ବର୍ଷିଛନ୍ତି । ଅନ୍ୟପଟେ ଜିଲ୍ଲାପାଳ କହିଛନ୍ତି ଖୁବଶୀଘ୍ର ସମସ୍ୟାର ସମାଧାନ କରାଯିବ ।
