ସାଧାରଣତଃ ଅନେକ ଲୋକ ରାତି ସମୟରେ ଘର ବାହାରେ ଓଦା ଲୁଗାପଟା ଶୁଖାଇବା ପାଇଁ ପକାଇ ଦିଅନ୍ତି କିମ୍ବା ଦିନରେ ଶୁଖିବା ପରେ ମଧ୍ୟ ରାତିସାରା ବାହାରେ ପକେଇ ରଖନ୍ତି। ବାସ୍ତୁ ଶାସ୍ତ୍ର ଅନୁଯାୟୀ ଏହି ଅଭ୍ୟାସ ଆଦୌ ଶୁଭ ବୋଲି ଧରାଯାଏ ନାହିଁ।
କୁହାଯାଏ ଯେ ଏହାଦ୍ୱାରା ଘରର ପରିବେଶ ନଷ୍ଟ ହୁଏ ଏବଂ ସକାରାତ୍ମକ ଶକ୍ତି ଉପରେ ଖରାପ ପ୍ରଭାବ ପଡ଼େ। ଅନ୍ୟପକ୍ଷରେ ବୈଜ୍ଞାନିକ ଦୃଷ୍ଟିକୋଣରୁ ଦେଖିଲେ ମଧ୍ୟ ରାତି ସମୟରେ ଲୁଗା ଶୁଖାଇବା ଦ୍ୱାରା ସ୍ୱାସ୍ଥ୍ୟ ସମ୍ପର୍କିତ ଅନେକ ସମସ୍ୟା ଦେଖାଦେଇପାରେ।
ଘରେ ନକାରାତ୍ମକ ଶକ୍ତିର ପ୍ରବେଶ: ବାସ୍ତୁ ଶାସ୍ତ୍ର ଅନୁସାରେ, ଦିନ ଓ ରାତିର ଶକ୍ତି ମଧ୍ୟରେ ବହୁତ ଫରକ ଥାଏ। ରାତି ସମୟରେ ଓଦା ଏବଂ ଓଦାଳିଆ ଲୁଗାକୁ ଦୀର୍ଘ ସମୟ ବାହାରେ ଛାଡ଼ିଦେବା ଦ୍ୱାରା ଘରକୁ ନକାରାତ୍ମକ ଶକ୍ତି ପ୍ରବେଶ କରିବାର ସମ୍ଭାବନା ବଢ଼ିଯାଏ।
ସ୍ୱାସ୍ଥ୍ୟ ଉପରେ ପ୍ରଭାବ: ବୈଜ୍ଞାନିକ ଦୃଷ୍ଟିକୋଣରୁ ଦେଖିଲେ, ରାତିରେ ଲୁଗା ଶୁଖାଇବା ପାଇଁ ଟାଙ୍ଗିଲେ ସେଥିରେ ଆର୍ଦ୍ରତା ବା ଓଦାଳିଆ ଭାବ ଦୀର୍ଘ ସମୟ ପର୍ଯ୍ୟନ୍ତ ରହିଥାଏ। ଅଧିକ ସମୟ ଓଦା ରହିବା କାରଣରୁ ଲୁଗାରେ ବ୍ୟାକ୍ଟେରିଆ ଏବଂ ଫିମ୍ପି ଦ୍ରୁତ ଗତିରେ ବୃଦ୍ଧି ପାଆନ୍ତି। ଏଭଳି ପୋଷାକ ପିନ୍ଧିବା ଦ୍ୱାରା ଚର୍ମରୋଗ, ଆଲର୍ଜି ଓ କୁଣ୍ଡାଇ ହେବା ଭଳି ସମସ୍ୟା ସୃଷ୍ଟି ହୋଇପାରେ। ତେଣୁ ଦିନରେ କିଛି ସମୟ ଖରାରେ ଲୁଗା ଶୁଖାଇବା ସବୁଠାରୁ ଉତ୍ତମ।
ସର୍ବଦା ଦିନରେ ହିଁ ଲୁଗା ଶୁଖାନ୍ତୁ: ଚେଷ୍ଟା କରନ୍ତୁ ସର୍ବଦା ଦିନବେଳା ଖରା ଏବଂ ଖୋଲା ପବନରେ ଲୁଗା ଶୁଖାଇବା ପାଇଁ। ସୂର୍ଯ୍ୟ କିରଣ ଲୁଗାକୁ ଶୀଘ୍ର ଶୁଖାଇବା ସହିତ ଆର୍ଦ୍ରତା ଦୂର କରିଥାଏ ଏବଂ ଜୀବାଣୁମୁକ୍ତ ତଥା ତାଜା ରଖିବାରେ ସାହାଯ୍ୟ କରେ। ସନ୍ଧ୍ୟା ବା ସୂର୍ଯ୍ୟାସ୍ତ ପୂର୍ବରୁ ଲୁଗା କାଢ଼ି ଘର ଭିତରକୁ ନେଇଆସନ୍ତୁ। ଏହା କରିବା ଦ୍ୱାରା ସମୟ ପୂର୍ବରୁ କାମ ସମ୍ପନ୍ନ ହୁଏ ଏବଂ ଘରର ସକାରାତ୍ମକ ପରିବେଶ ମଧ୍ୟ ବଜାୟ ରହେ।
