ଗ୍ରୀନ୍ ଟି ସ୍ୱାସ୍ଥ୍ୟ ପାଇଁ ବହୁତ ଲାଭଦାୟକ ବୋଲି ବିବେଚନା କରାଯାଏ । ଆଣ୍ଟିଅକ୍ସିଡାଣ୍ଟରେ ଭରପୂର ଏହି ଡ୍ରିଙ୍କ ଓଜନ ହ୍ରାସ କରିବାରେ ବହୁତ ପ୍ରଭାବଶାଳୀ । ଏପରି ପରିସ୍ଥିତିରେ କିଛି ଲୋକ ନିଜ ସକାଳର ଆରମ୍ଭ ଗ୍ରୀନ୍ ଟି ସହିତ କରନ୍ତି । କିନ୍ତୁ ଏହା ସ୍ୱାସ୍ଥ୍ୟ ପାଇଁ ଲାଭଦାୟକ କି? ତେବେ ଆପଣଙ୍କୁ କହି ରଖୁଛୁ ଯେ, ଖାଲି ପେଟରେ ଗ୍ରୀନ୍ ଟି ପିଇବା ବିଷୟରେ ବିଶେଷଜ୍ଞଙ୍କ ମତ ଭିନ୍ନ, କିନ୍ତୁ ଅଧିକାଂଶ ବିଶେଷଜ୍ଞ ଖାଲି ପେଟରେ ଗ୍ରୀନ୍ ଟି ପିଇବାରୁ ଦୂରେଇ ରହିବାକୁ ପରାମର୍ଶ ଦିଅନ୍ତି ।
ଖାଲି ପେଟରେ ଗ୍ରୀନ୍ ଟି ପିଇବା କାହିଁକି ଏଡ଼ାଇବା ଉଚିତ୍?
ଗ୍ରୀନ୍ ଟି’ରେ ଟାନିନ୍ ଏବଂ ପଲିଫେନୋଲ୍ ଥାଏ, ଯାହା ଖାଲି ପେଟରେ ପିଇଲେ ପେଟରେ ଏସିଡ୍ ଉତ୍ପାଦନ ବୃଦ୍ଧି କରିପାରେ । ଏହା ଏସିଡିଟି, ପେଟ ପୋଡ଼ିବା, ବଦହଜମୀ କିମ୍ବା ବାନ୍ତି ଭଳି ସମସ୍ୟା ସୃଷ୍ଟି କରିପାରେ । ଏହା ପେଟର ପ୍ରାକୃତିକ ପାଚନ ପ୍ରକ୍ରିୟାକୁ ମଧ୍ୟ ପ୍ରଭାବିତ କରିପାରେ । ଗ୍ରୀନ୍ ଟିରେ ଥିବା କ୍ୟାଟେଚିନ୍ ଖାଦ୍ୟରୁ ଆଇରନ ଅବଶୋଷଣକୁ ହ୍ରାସ କରିପାରେ ।
ଗ୍ରୀନ୍ ଟି ପିଇବାର ସଠିକ୍ ସମୟ:
ବିଶେଷଜ୍ଞଙ୍କ ମତରେ, ସାଧାରଣତଃ ଖାଦ୍ୟ ଖାଇବା ପରେ କିମ୍ବା ହାଲୁକା ଜଳଖିଆ ପରେ ଗ୍ରୀନ୍ ଟି ପିଇବାର ସର୍ବୋତ୍ତମ ସମୟ । ସକାଳେ ହାଲୁକା ଜଳଖିଆ ପରେ ଗ୍ରୀନ୍ ଟି ପିଇବାକୁ ସର୍ବୋତ୍ତମ ବୋଲି ବିବେଚନା କରାଯାଏ । ଏହା ଶରୀରକୁ ଆବଶ୍ୟକୀୟ ଆଣ୍ଟିଅକ୍ସିଡାଣ୍ଟ ଯୋଗାଇଥାଏ ଏବଂ ଏନର୍ଜି ଲେବଲ୍ ବୃଦ୍ଧି କରେ । ଖାଦ୍ୟ ଖାଇବା ପରେ ଗ୍ରୀନ୍ ଟି ପିଇବା ପାଚନ ତନ୍ତ୍ର ପାଇଁ ଅତ୍ୟନ୍ତ ଲାଭଦାୟକ ହୋଇଥାଏ ।
ଏହା ହଜମ ପ୍ରକ୍ରିୟାକୁ ତ୍ୱରାନ୍ୱିତ କରେ ଏବଂ ପେଟ ସମସ୍ୟାରୁ ମୁକ୍ତି ଦେବାରେ ସହାୟକ ହୁଏ । ସନ୍ଧ୍ୟାରେ ଯେତେବେଳେ ଶରୀରରେ ଶକ୍ତିର ଅଭାବ ଅନୁଭବ ହୁଏ, ସେତେବେଳେ ଗ୍ରୀନ୍ ଟି ଏକ ନ୍ୟାଚୁରାଲ୍ ଏନର୍ଜି ବୁଷ୍ଟର୍ ଭାବରେ କାର୍ଯ୍ୟ କରେ । କିଛି ଲୋକ ବ୍ୟାୟାମ ପୂର୍ବରୁ କିମ୍ବା ପରେ ଗ୍ରୀନ୍ ଟି ପିଇବାକୁ ପସନ୍ଦ କରନ୍ତି କାରଣ ଏହା ଶରୀରର କାର୍ଯ୍ୟଦକ୍ଷତା ସ୍ତରକୁ ଉନ୍ନତ କରିବାରେ ଏବଂ ଷ୍ଟାମିନା ବୃଦ୍ଧି କରିବାରେ ସାହାଯ୍ୟ କରିପାରେ ।
ଦିନକୁ କେତେ ପିଇବା ଉଚିତ?
ସାଧାରଣତଃ, ଦିନକୁ ୨ ରୁ ୩ କପ୍ ଗ୍ରୀନ୍ ଟି ପିଇବାକୁ ଯଥେଷ୍ଟ ବୋଲି ବିବେଚନା କରାଯାଏ । ଅତ୍ୟଧିକ ଗ୍ରୀନ୍ ଟି ପିଇବା ଦ୍ୱାରା ପେଟ ଖରାପ, ଅନିଦ୍ରା ଏବଂ ଲିଭର ଉପରେ ପ୍ରେସର ପଡିବା ପରି ସମସ୍ୟା ହୋଇପାରେ ।
