ଆଜିର ଦୁନିଆରେ, ସ୍ମାର୍ଟୱାଚ୍ ଏବଂ ଫିଟନେସ୍ ବ୍ୟାଣ୍ଡ ଆମ ଜୀବନର ଏକ ଅବିଚ୍ଛେଦ୍ୟ ଅଂଶ ପାଲଟିଛି। ଲୋକମାନେ କେବଳ ସମୟ ଯାଞ୍ଚ କରିବା ପାଇଁ ନୁହେଁ, ବରଂ ସେମାନଙ୍କ ସ୍ୱାସ୍ଥ୍ୟ ଉପରେ ନଜର ରଖିବା ପାଇଁ ସେଗୁଡ଼ିକୁ ପିନ୍ଧନ୍ତି। ହୃଦସ୍ପନ୍ଦନ, ନିଦ୍ରାର ଶୈଳୀ, ଷ୍ଟେପ୍ ଗଣନା, କ୍ୟାଲୋରୀ ନଷ୍ଟ ହେବା ଏବଂ ଅନ୍ୟାନ୍ୟ ବିଭିନ୍ନ ସ୍ୱାସ୍ଥ୍ୟ ମାପଦଣ୍ଡ ଭଳି ତଥ୍ୟ ଏବେ ଆମ ହାତ ପାପୁଲିରେ ସହଜରେ ଉପଲବ୍ଧ। କିନ୍ତୁ ଏହି ଡିଭାଇସଗୁଡ଼ିକର ବ୍ୟବହାର ବୃଦ୍ଧି ପାଇବା ସହିତ, ଏକ ଗୁରୁତ୍ୱପୂର୍ଣ୍ଣ ପ୍ରଶ୍ନ କ୍ରମଶଃ ସାମ୍ନାକୁ ଆସିଛି ଯେ, ସ୍ମାର୍ଟୱାଚ୍ ପିନ୍ଧିବା କ’ଣ କର୍କଟ ରୋଗର କାରଣ ହୋଇପାରେ? ଏହି ପ୍ରଶ୍ନ ଇଣ୍ଟରନେଟରେ ଅନେକ ଆଲୋଚନା ଏବଂ ଗବେଷଣା ଅଧ୍ୟୟନକୁ ଆରମ୍ଭ କରିଛି, ଯାହା ପ୍ରାୟତଃ ଲୋକଙ୍କୁ ଦ୍ୱନ୍ଦ୍ୱରେ ପକାଇଥାଏ। ତେଣୁ ଆସନ୍ତୁ ଜାଣିବା ଏ ବିଷୟରେ…
ସ୍ମାର୍ଟୱାଚ୍ କ’ଣ କର୍କଟ ରୋଗର କାରଣ
ସ୍ମାର୍ଟୱାଚ୍ ଏବଂ ଫିଟନେସ୍ ବ୍ୟାଣ୍ଡଗୁଡ଼ିକ ବ୍ଲୁଟୁଥ୍ ପରି ୱାୟରଲେସ୍ ସିଗନାଲ୍ ବ୍ୟବହାର କରନ୍ତି। ଏଥିରୁ ବାହାରୁଥିବା ରେଡିଓ ସିଗନାଲ୍ ଅତି କମ୍ ଶକ୍ତିଶାଳୀ ଏବଂ ଏହାକୁ Non-ionising radiation କୁହାଯାଏ। ଏହା ଏକ୍ସ-ରେ ଭଳି କ୍ଷତିକାରକ ରେଡିଏସନ୍ ନୁହେଁ, ଯାହା DNA କୁ ନଷ୍ଟ କରି କ୍ୟାନ୍ସରର କାରଣ ସାଜିବ।
ରେଡିଏସନ୍ କେତେ ବିପଜ୍ଜନକ?
ବୈଜ୍ଞାନିକ ଗବେଷଣା ଅନୁଯାୟୀ, ସ୍ମାର୍ଟୱାଚ୍ରୁ ବାହାରୁଥିବା ରେଡିଓ ସିଗନାଲ୍ ମୋବାଇଲ୍ ଫୋନ୍ ତୁଳନାରେ ମଧ୍ୟ ବହୁତ କମ୍। ଏହା ଆନ୍ତର୍ଜାତୀୟ ସୁରକ୍ଷା ମାନଦଣ୍ଡ ମଧ୍ୟରେ ରହିଥାଏ। ଏପର୍ଯ୍ୟନ୍ତ ଏହା ଦ୍ୱାରା କ୍ୟାନ୍ସର ହେବାର କୌଣସି ଠୋସ୍ ପ୍ରମାଣ ମିଳିନାହିଁ। ତେଣୁ କେବଳ ସିଗନାଲ୍ କିମ୍ବା ବ୍ଲୁଟୁଥ୍ କାରଣରୁ ଏହାକୁ ବିପଜ୍ଜନକ କୁହାଯାଇପାରିବ ନାହିଁ।
ଷ୍ଟ୍ରାପ୍ ଏବଂ କେମିକାଲ୍ର ଚିନ୍ତା
ବର୍ତ୍ତମାନ ଏକ ନୂଆ ବିଷୟ ସାମ୍ନାକୁ ଆସିଛି, ଯାହା ସ୍ମାର୍ଟୱାଚ୍ର ସିଗନାଲ୍ ନୁହେଁ ବରଂ ଏହାର ଷ୍ଟ୍ରାପ୍ ବା ବେଲ୍ଟ ସହ ଜଡ଼ିତ। କିଛି ରିସର୍ଚ୍ଚ ଅନୁଯାୟୀ, କେତେକ ଫିଟନେସ୍ ବ୍ୟାଣ୍ଡରେ ସିନ୍ଥେଟିକ୍ ରବର ବ୍ୟବହାର ହୁଏ, ଯେଉଁଥିରେ PFAS ନାମକ କେମିକାଲ୍ ଥାଇପାରେ। ଏହାକୁ ‘ଫରେଭର କେମିକାଲ୍ସ’ କୁହାଯାଏ କାରଣ ଏହା ପରିବେଶରେ ଶୀଘ୍ର ନଷ୍ଟ ହୁଏନାହିଁ। ଦୀର୍ଘ ସମୟ ଧରି ଏହି କେମିକାଲ୍ ସଂସ୍ପର୍ଶରେ ଆସିଲେ ସ୍ୱାସ୍ଥ୍ୟ ସମସ୍ୟା ଉପୁଜିପାରେ, କିନ୍ତୁ ସ୍ମାର୍ଟୱାଚ୍ ପିନ୍ଧିବା ଦ୍ୱାରା ସିଧାସଳଖ କ୍ୟାନ୍ସର ହେବା କଥା ଏପର୍ଯ୍ୟନ୍ତ ପ୍ରମାଣିତ ହୋଇନାହିଁ।
ସ୍ମାର୍ଟୱାଚ୍ ଯୋଗୁଁ ହେଉଥିବା ସାଧାରଣ ସମସ୍ୟା
ଡାକ୍ତରଙ୍କ ଅନୁଯାୟୀ, ସ୍ମାର୍ଟୱାଚ୍ ପିନ୍ଧିବା ଦ୍ୱାରା କ୍ୟାନ୍ସର ନୁହେଁ ବରଂ କିଛି ସାଧାରଣ ସମସ୍ୟା ଦେଖାଦେଇଥାଏ । ଯେପରିକି ଚର୍ମରେ ଆଲର୍ଜି କିମ୍ବା କୁଣ୍ଡେଇ ହେବା, ଅଧିକ ସମୟ ଟାଇଟ୍ କରି ପିନ୍ଧିବା ଯୋଗୁଁ ଚର୍ମରେ ଦାଗ ବା ଜଳାପୋଡ଼ା ହେବା ଇତ୍ୟାଦି ।ସ୍ମାର୍ଟୱାଚ୍ ପିନ୍ଧିବା ଦ୍ୱାରା କ୍ୟାନ୍ସର ହେବାର କୌଣସି ବୈଜ୍ଞାନିକ ଆଧାର ନାହିଁ। ତେବେ ଚର୍ମର ସୁରକ୍ଷା ପାଇଁ ଏହାକୁ ସମୟ ସମୟରେ ବାହାର କରିବା ଏବଂ ଷ୍ଟ୍ରାପ୍ ସଫା ରଖିବା ଉଚିତ୍।
