ନୂଆଦିଲ୍ଲୀ : ଯମୁନା ନଦୀର କରାଳ ରୂପ ସହ ଗମ୍ଭୀର ବନ୍ୟା ସଙ୍କଟ ଦେଇ ଗତି କରୁଛି ରାଜଧାନୀ ଦିଲ୍ଲୀ । ୨୦୧୩ର ରେକର୍ଡ ଭାଙ୍ଗିଛି ଯମୁନା ନଦୀର ଜଳସ୍ତର । ହାଇ ଆଲର୍ଟରେ ଦିଲ୍ଲୀ । ପ୍ରଭାବବିତ ହୋଇଛନ୍ତି ୮ ହଜାରରୁ ଅଧିକ ଲୋକ । ଯମୁନା ନଦୀର ଜଳସ୍ତର ବିପଦ ସଙ୍କେତ ଉପରେ ପ୍ରବାହିତ ହେଉଛି । ଦିଲ୍ଲୀ ସଚିବାଳୟ ନିକଟରେ ଯମୁନା ପାଣି ପହଞ୍ଚିଛି । ଯମୁନା ବନ୍ୟା ସମତଳ ପାର୍ଶ୍ୱରେ ଥିବା ଦିଲ୍ଲୀ ସଚିବାଳୟର ଅଣ୍ଡରପାସରେ ପ୍ରବଳ ପାଣି ପଶିଛି । ଏହାକୁ ବାହାର କରିବା ପାଇଁ ସକ୍ସନ ପାଇପ୍ ମଧ୍ୟ ଲଗାଯାଇଛି । ସେପ୍ଟେମ୍ବର ୬ ପର୍ଯ୍ୟନ୍ତ ବର୍ଷା ଚେତାବନୀ ଦିଆଯାଇଛି । ମୟୂର ବିହାର ଫେଜ୍-୧ରେ ନିର୍ମିତ ରିଲିଫ୍ କ୍ୟାମ୍ପଗୁଡ଼ିକ ମଧ୍ୟ ବୁଡ଼ି ଯାଇଛି । ସ୍ୱାମୀ ନାରାୟଣ ମନ୍ଦିର, ଫୁଟଓଭର ବ୍ରିଜ୍ ଏବଂ ସିଭିଲ୍ ଲାଇନ୍ସ ଅଞ୍ଚଳ ମଧ୍ୟ ପାଣିରେ ବୁଡ଼ି ରହିଛି । ଏଠାରେ ଥିବା ବଙ୍ଗଳାଗୁଡ଼ିକ ମଧ୍ୟ ପାଣିରେ ବୁଡ଼ି ରହିଛି । ଦିଲ୍ଲୀର ପୁରୁଣା ଲୁହା ପୋଲରେ ଯମୁନା ନଦୀର ଜଳସ୍ତର ୨୦୭.୩୯ ରେକର୍ଡ କରାଯାଇଛି । ପୂର୍ବରୁ ୨୦୧୩ରେ ଦିଲ୍ଲୀରେ ଯମୁନା ନଦୀର ଜଳସ୍ତର୨୦୭.୩୨ ମିଟର ରେକର୍ଡ କରାଯାଇଥିଲା ।
ଏହା ସହିତ, ଯମୁନା ନଦୀର ଜଳସ୍ତର ବୃଦ୍ଧି ପାଇବା ଯୋଗୁଁ, କାଶ୍ମୀର ଗେଟ୍ ଅଞ୍ଚଳର କିଛି ଅଂଶ ଜଳମଗ୍ନ ହୋଇଛି। ଯମୁନାର ଜଳସ୍ତର ନିରନ୍ତର ବୃଦ୍ଧି ପାଉଛି। କାଶ୍ମୀର ଗେଟ୍ ବସ୍ ଟର୍ମିନାଲ ବୁଡ଼ି ଯାଇଛି । ଜଳସ୍ତର ବୃଦ୍ଧିକୁ ଦୃଷ୍ଟିରେ ରଖି ହାଇଆଲର୍ଟ ଜାରି କରିଛନ୍ତି ଦିଲ୍ଲୀ ସରକାର । ସମ୍ବେଦନଶୀଳ ଅଞ୍ଚଳ ଗୁଡ଼ିକରେ NDRF ଟିମକୁ ମୁତୟନ କରାଯାଇଛି ।
ବନ୍ୟା ବିପନ୍ନଙ୍କୁ ଉଦ୍ଧାର କାର୍ଯ୍ୟ ଜାରି ରହିଛି । ଯମୁନା ନଦୀର ଜଳସ୍ତର ବଢ଼ିବା କାରଣରୁ ରାଜଧାନୀ ଦିଲ୍ଲୀରେ ପାଖାପାଖି ୮ ହଜାର ଲୋକ ପ୍ରଭାବିତ ହୋଇଛନ୍ତି । ମୁଙ୍ଗେଶପୁର ନଳାର ପାଇଁ ୫୦ ଫୁଟ ଉଚ୍ଚତାର ବନ୍ଧ ଭାଙ୍ଗିବାରୁ ଦିଲ୍ଲୀରେ ଅନେତ ତଳିଆ ଅଞ୍ଚଳରେ ବନ୍ୟାପାଣି ପଶିଛି । ସେମାନଙ୍କୁ ଅସ୍ଥାୟୀ କ୍ୟାମ୍ପକୁ ସ୍ଥାନାନ୍ତର କରାଯାଇଛି ।
