ନୂଆଦିଲ୍ଲୀ: ଗତକାଲି ସକାଳେ ପ୍ରବଳ ବର୍ଷାରେ ମୁମ୍ବାଇ ଏବଂ ଏହାର ପଡୋଶୀ ଅଞ୍ଚଳରେ ଯାନବାହାନ ଏବଂ ରେଳ ଚଳାଚଳ ବାଧାପ୍ରାପ୍ତ ହୋଇଛି। ବୁଧବାର ସନ୍ଧ୍ୟାରେ ସହର ଏବଂ ଏହାର ଉପକଣ୍ଠରେ ୧୦୦ ମିଲିମିଟରରୁ ଅଧିକ ବର୍ଷା ହୋଇଥିବା ବେଳେ ଅନ୍ଧେରୀ ଅଞ୍ଚଳରେ ପ୍ରବଳ ବର୍ଷା ହେତୁ ଜଣେ ମହିଳା ଓଭରବ୍ରିଜ୍ ଡ୍ରେନ୍ରେ ବୁଡ଼ି ଯାଇଥିଲେ। ତାଙ୍କର ମୃତ୍ୟୁ ଘଟିଥିବା ସୂଚନା ରହିଛି। ପ୍ରବଳ ବର୍ଷା ହେତୁ ଅନେକ ଟ୍ରେନ୍ ଟ୍ରାକରେ ଛିଡ଼ା ହୋଇରହିଛି। ଚାରିଆଡ଼େ ପାଣି ଜମି ଥିବା ହେତୁ ସ୍ଥାନୀୟ ରେଳ ସେବା ବନ୍ଦ ହୋଇଯାଇଛି ଏବଂ ୧୪ଟି ବିମାନ ଚଳାଚଳ ବନ୍ଦ ହୋଇଯାଇଛି। ବିଳମ୍ବିତ ରାତିରେ ବର୍ଷା ତୀବ୍ରତା ହ୍ରାସ ପାଇବା ପରେ ପରିସ୍ଥିତି ସୁଧୁରିଥିଲେ ମଧ୍ୟ ଅକ୍ଟୋବର ୧ ପର୍ଯ୍ୟନ୍ତ ଅଧିକ ବର୍ଷା ହେବାର ଆଶଙ୍କା ରହିଛି।
ଅଧିକାଂଶ ପ୍ରଭାବିତ ଅଞ୍ଚଳରେ ବନ୍ୟା ପରିସ୍ଥିତି ହ୍ରାସ ପାଇ ମୁମ୍ବାଇ ବିମାନ ବନ୍ଦରରେ ବିମାନ ଚଳାଚଳ ପୁଣି ଆରମ୍ଭ ହୋଇଥିଲା। ତେବେ ଆଜି ସକାଳ ୮.୩୦ ପର୍ଯ୍ୟନ୍ତ ସହର ପାଇଁ ରେଡ ଆଲର୍ଟ ଲାଗିବା ପରେ ପାଣିପାଗ କାର୍ଯ୍ୟାଳୟ ମୁମ୍ବାଇ ପାଇଁ ଅରେଞ୍ଜ୍ ଆଲର୍ଟ ଜାରି କରିଥିବାରୁ ଗୁରୁବାର ଦିନ ସ୍କୁଲ ଓ କଲେଜ ବନ୍ଦ ରହିଛି।
