ନୂଆଦିଲ୍ଲୀ: କଂଗ୍ରେସ ନେତା ଅଭିଷେକ ମନୁ ସିଂଭି ସୋମବାର ତେଲେଙ୍ଗାନାରୁ ରାଜ୍ୟସଭା ଉପ-ନିର୍ବାଚନ ପାଇଁ ଦଳର ପ୍ରାର୍ଥୀ ଭାବେ ନାମାଙ୍କନପତ୍ର ଦାଖଲ କରିଥିଲେ। ଯେତେବେଳେ ତାଙ୍କ ନାମାଙ୍କନପତ୍ର ଦାଖଲ କରିବାକୁ ସିଂଭି ବିଧାନସଭାରେ ପହଞ୍ଚିଥିଲେ ସେତେବେଳେ ମୁଖ୍ୟମନ୍ତ୍ରୀ ଏ ରେଭନ୍ତ ରେଡ୍ଡୀ ଏବଂ ଏଆଇସିସି ପ୍ରଭାରୀ ଦୀପାଦାସ ମୁନ୍ସୀ ତାଙ୍କ ସହ ଥିଲେ। ରବିବାର ରାତିରେ ତେଲେଙ୍ଗାନାରେ ଶାସକ କଂଗ୍ରେସ ବିଧାନସଭା ପାର୍ଟି (ସିଏଲପି) ରାଜ୍ୟସଭା ଉପ-ନିର୍ବାଚନ ପାଇଁ ସିଂଭିଙ୍କ ପ୍ରାର୍ଥୀପତ୍ରକୁ ସମର୍ଥନ କରିଥିଲେ। ହାଇଦ୍ରାବାଦରେ ଏକ ବିଧାୟକ ଦଳ ବୈଠକ ପରେ ସାମ୍ବାଦିକମାନଙ୍କୁ ସୂଚନା ଦେଇ ମୁଖ୍ୟମନ୍ତ୍ରୀ ତଥା ରାଜ୍ୟ କଂଗ୍ରେସ ସଭାପତି ରେଭନ୍ତ ରେଡ୍ଡୀ କହିଛନ୍ତି ଯେ ଏହି ବୈଠକରେ କଂଗ୍ରେସ ବିଧାୟକ, ସାଂସଦ ଏବଂ ବିଧାନ ପରିଷଦ ସଦସ୍ୟଙ୍କ ସହ ସିଂଭିଙ୍କୁ ପରିଚିତ କରାଯାଇଛି।
୨୦୧୪ ରେ ବିଭାଜନ ହେବା ପରେ ପଡୋଶୀ ଆନ୍ଧ୍ରପ୍ରଦେଶ ସହିତ ଚାଲିଥିବା ବିବାଦ ବିଷୟରେ ଉଲ୍ଲେଖ କରି ରେଭନ୍ତ ରେଡ୍ଡୀ କହିଛନ୍ତି ଯେ ସିଂଭିଙ୍କ ନା କେବଳ ସଂସଦରେ ବରଂ କୋର୍ଟରେ ମଧ୍ୟ ତେଲେଙ୍ଗାନାର ଚିନ୍ତା ଏବଂ ସମସ୍ୟାକୁ ଆଲୋକିତ କରିବାରେ ସହାୟକ ହେବେ । ସିଂଭି କହିଛନ୍ତି ଯେ ତେଲେଙ୍ଗାନାରେ ରାଜ୍ୟସଭା ଉପ-ନିର୍ବାଚନ ପାଇଁ ଦଳର ପ୍ରାର୍ଥୀ ଭାବେ ନାମିତ ହେବା ତାଙ୍କ ପାଇଁ ସମ୍ମାନର ବିଷୟ। ସେ ହାଇଦ୍ରାବାଦରେ କଂଗ୍ରେସ ନେତା କେ କେଶବ ରାଓଙ୍କୁ ଭେଟିଥିଲେ। ଭାରତ ରାଷ୍ଟ୍ର ସମିତି (ବିଆରଏସ) ଛାଡି କଂଗ୍ରେସରେ ଯୋଗଦେବା ପରେ ରାଓ ରାଜ୍ୟସଭାରୁ ଇସ୍ତଫା ଦେଇଥିବାରୁ ଉପ-ନିର୍ବାଚନ ହେବାକୁ ଯାଉଛି | ଏନେଇ ରାଓ କହିଛନ୍ତି ଯେ ଶାସକ କଂଗ୍ରେସ ଦଳ ତେଲେଙ୍ଗାନାରେ ସଂଖ୍ୟାଗରିଷ୍ଠତା ଥିବାରୁ ଉପ-ନିର୍ବାଚନରେ ଦଳ ପ୍ରାର୍ଥୀଙ୍କ ବିଜୟ ନିଶ୍ଚିତ। ଉଲ୍ଲେଖ ଥାଉ କି ୧୧୯ ସଦସ୍ୟ ବିଶିଷ୍ଟ ତେଲେଙ୍ଗାନା ବିଧାନସଭାରେ କଂଗ୍ରେସର ୬୫ ଜଣ ବିଧାୟକ ଅଛନ୍ତି। ଗତ ବର୍ଷର ବିଧାନସଭା ନିର୍ବାଚନ ପରେ ପ୍ରାୟ ୧୦ଜଣ ବିଆରଏସ ବିଧାୟକ ଦଳ ଛାଡି କଂଗ୍ରେସରେ ଯୋଗ ଦେଇଥିଲେ।
ତେଲେଙ୍ଗାନାରୁ ଅଭିଷେକ ମନୁ ସିଂଭିଙ୍କୁ ରାଜ୍ୟସଭା ପଠାଇବ କଂଗ୍ରେସ
