ନୂଆପଡା: ଗୁଣି ଗାରେଡି ସନ୍ଦେହରେ ବୃଦ୍ଧଙ୍କୁ ଜୀବନ୍ତ ଜାଳି ହତ୍ୟା ଉଦ୍ୟମ । ନୂଆପଡା ଜିଲ୍ଲା ସିନାପାଲି ଥାନା ପୋଟିପଡା ଗାଁରେ ଅଭାବନୀୟ ଘଟଣା । ଗୁରୁତର ବୃଦ୍ଧ ହେଲେ ଖାମସିଂ ମାଝୀ । ଗାଁରେ ଗୁଣି ଗାରେଡି କରୁଥିବା ସନ୍ଦେହ କରି ଖାମସିଂଙ୍କୁ ସ୍ଥାନୀୟ ଲୋକେ ପୋଖରୀ ଡିହକୁ ଟେକି ନେଇ ନିସ୍ତୁକ ମାଡ ମାରିଥିଲେ । ପରେ ତାଙ୍କୁ ଏକ ପାଲ ବେଣ୍ଟରେ ବାନ୍ଧି ପେଟ୍ରୋଲ ଢାଳି ନିଆଁ ଲଗାଇ ମାରିବାକୁ ଉଦ୍ୟମ କରିଥିବା ଜଣାପଡିଛି । ବୃଦ୍ଧ ଜଣକ ଛଟପଟ ହେବାରୁ ଗାଁ ଲୋକେ ଛାଡି ଦେଇଥିଲେ । ପରେ ଖାମସିଂ ଚିତ୍କାର କରି ଜୀବନ ବଞ୍ଚାଇବା ପାଇଁ ପୋଖରୀ ଭିତରକୁ ଡେଇଁ ପଡିଥିଲେ ।
ଜୀବନ ଭୟରେ ଖାମସିଂ ପୋଖରୀ ପାଣିରେ କିଛି ସମୟ ଧରି ଲୁଚି ରହିଥିଲେ । ପରେ ପୋଖରୀ ପାଣିରୁ ବାହାରି ଚାଷ ଜମି ଭିତରେ ଲୁଚି ରହିଥିଲେ । ସକାଳେ ଘରକୁ ଫେରିବା ପରେ ଖବର ପାଇ ସିନାପାଲି ପୋଲିସ ପହଞ୍ଚି ଖାମସିଂଙ୍କୁ ଉଦ୍ଧାର କରି ପ୍ରଥମେ ସିନାପାଲି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲା । ପରେ ଅବସ୍ଥା ଗୁରୁତର ହେବାରୁ ତାଙ୍କୁ ନୂଆପଡା ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି । ଘଟଣା ନେଇ ଖାମସିଂଙ୍କ ପୁଅ ହେମ ମାଝି ସିନପାଲି ଥାନାରେ ଲିଖିତ ଅଭିଯୋଗ କରିଛନ୍ତି । ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଛି ପୋଲିସ । ସେପଟେ ଗିରଫଦାରୀ ଭୟରେ ପୁରୁଷ ଶୂନ୍ୟ ହୋଇଯାଇଛି ଗାଁ ।
