ଜାଲରେ ପଡ଼ିଲା ୪୦ କେଜିର ବିରଳ ବୁଦ ମାଛ

ବୌଦ୍ଧ ମହାନଦୀରେ ମାଛ ଧରୁଥିବାବେଳେ ଧିବର ଜାଲରେ ପଡ଼ିଛି ୪୦ କେଜିର ବୁଦ ମାଛ । ବିରଳ ପ୍ରଜାତିର ଏହି ମାଛ ସତକୋଶିଆ ଗଣ୍ଡରୁ ଆସିଥିବା ନେଇ ଅନୁମାନ କରାଯାଉଛି । ପ୍ରତିବର୍ଷ ବର୍ଷା ଋତୁରେ ମହାନଦୀରେ ଏହି ଭଳି ବିରଳ ପ୍ରଜାତିର ମାଛ ଦେଖିବାକୁ ମିଳିଥାଏ । ବର୍ଷଋତୁ ଆରମ୍ଭରେ ଗୋଳିପାଣି ଉପର ମୁଣ୍ଡରୁ ଆସିଲେ ସାତକୋଶିଆ ଗଣ୍ଡରୁ ଉପରକୁ ଏହି ପ୍ରଜାତିର ମାଛ ଉଠି ଆସିଥାନ୍ତି ବୋଲି ସ୍ଥାନୀୟ ମତ୍ସ୍ୟଜୀବୀମାନେ କହିଛନ୍ତି । ମାଛଟିକୁ ବିକ୍ରି ପାଇଁ ସ୍ଥାନୀୟ ବିଜୁ ପଟ୍ଟନାୟକ ଆଦର୍ଶ କୃଷି ବଜାର ପ୍ରାଙ୍ଗଣରେ ଥିବା ମାଛ ମାର୍କେଟକୁ ଅଣାଯାଇଥିବା ବେଳେ ମାଛକୁ ଦେଖିବାକୁ ଲୋକଙ୍କ ଭିଡ଼ ଲାଗିଥିଲା ।