ନୂଆଦିଲ୍ଲୀ: ଉତ୍ତରପ୍ରଦେଶର ବହରାଇଚ୍ ହିଂସା ଓ ରାମଗୋପାଳ ମିଶ୍ରଙ୍କ ହତ୍ୟା ମାମଲାର ଦୁଇ ଅଭିଯୁକ୍ତଙ୍କ ଏନକାଉଣ୍ଟର ଘଟଣାକୁ ନେଇ ରାଜନୀତି ଆରମ୍ଭ ହୋଇଯାଇଛି । କଂଗ୍ରେସ ଓ ସମାଜବାଦୀ ପାର୍ଟି ଏହି ଏନକାଉଣ୍ଟର ଓ ଉତ୍ତରପ୍ରଦେଶର ଆଇନଶୃଙ୍ଖଳାକୁ ନେଇ ପ୍ରଶ୍ନ ଉଠାଇଛନ୍ତି ।
କଂଗ୍ରେସ ନେତ୍ରୀ ସୁପ୍ରିୟା ଶ୍ରୀନେତ କହିଛନ୍ତି ଯେ ଉତ୍ତରପ୍ରଦେଶରେ ଆଇନ ଶୃଙ୍ଖଳା ପରିସ୍ଥିତି ଅତ୍ୟନ୍ତ ଖରାପ ହୋଇଯାଇଛି । ରାଜ୍ୟରେ ବିଜେପିରେ ଏତେ ଆଭ୍ୟନ୍ତରୀଣ କଳହ ରହିଛି ଯେ ଯୋଗୀ ଆଦିତ୍ୟନାଥଙ୍କ ଆସନ ବିପଦରେ ପଡ଼ିଯାଇଛି ଏବଂ ସେ କେବଳ ନିଜକୁ ବଞ୍ଚାଇବା ଉପରେ ଧ୍ୟାନ ଦେଉଛନ୍ତି। ଯେଉଁ ରାଜ୍ୟରେ ଦଙ୍ଗାର ୪୮ ଘଣ୍ଟା ପରେ ଆଇନ ଶୃଙ୍ଖଳା ଏଡିଜିଙ୍କୁ ବନ୍ଧୁକ ଧରି ରାସ୍ତାରେ ଚାଲିବାକୁ ପଡ଼ିଥିଲା, ସେଠାରେ ଆଇନ ଶୃଙ୍ଖଳା ପରିସ୍ଥିତି କ’ଣ ହେବ ତାହା ଆପଣ କଳ୍ପନା କରିପାରିବେ। ଉତ୍ତରପ୍ରଦେଶରେ ଆମେ ବାରମ୍ବାର ଶାନ୍ତି ପାଇଁ ନିବେଦନ କରୁଛୁ। ବହରାଇଚରେ ସ୍ଥିତି ସ୍ୱାଭାବିକ ହେବା କଥା, କିନ୍ତୁ ସ୍ଥିତି ଆହୁରି ଖରାପ ହେବାରେ ଲାଗିଛି । ଏହା ସତ ଯେ ନିୟମିତ ଭାବେ ବ୍ୟବସ୍ଥାକୁ ପରିଚାଳନା କରିପାରୁନଥିବା ଉତ୍ତରପ୍ରଦେଶ ପୁଲିସ ଏନକାଉଣ୍ଟରରେ ସବୁଠୁ ଆଗରେ ରହିଛି।
ଏହି ମାମଲାରେ ଅଖିଳେଶ ଯାଦବ କହିଛନ୍ତି ଯେ ସରକାରଙ୍କ ବିଫଳତା ଯୋଗୁଁ ଏହା ଘଟୁଛି। ଏହା ହେଉଛି ଅଧା ଏନକାଉଣ୍ଟରର ଏକ ନୂଆ ସଂଜ୍ଞା । ଏହା ପ୍ରଶାସନର ବିଫଳତା। ଅଧା ଏନକାଉଣ୍ଟର, ଏନକାଉଣ୍ଟର, ଏସବୁ ଭୟ ସୃଷ୍ଟି କରିବା ପାଇଁ ଉଦ୍ଦିଷ୍ଟ । ସରକାର ଏହି ଏନକାଉଣ୍ଟର କରି ନିଜର ବିଫଳତାକୁ ଲୁଚାଉଛନ୍ତି । ଘଟିଥିବା ଘଟଣା ଦୁଃଖଦାୟକ, ଏଭଳି ଘଟଣା ଘଟିବା ଉଚିତ ନୁହେଁ, ଏହାକୁ ରୋକାଯାଇପାରିଥାନ୍ତା। ବିଭାଜନ ଓ ଶାସନ ହିଁ ସେମାନଙ୍କର ନୀତି ବୋଲି ମନେ ହୁଏ। ସେମାନେ ଘୃଣାକୁ ପ୍ରୋତ୍ସାହନ ଦେଉଛନ୍ତି।
