ଏଚଆଇଭି ଏକ ଏଭଳି ଭୂତାଣୁ ଯାହା ଚୁପଚାପ ଶରୀରକୁ ନଷ୍ଟ କରିଦିଏ। ଆମ ସମାଜରେ ଏଚଆଇଭି/ଏଡ଼ସକୁ ନେଇ ଅନେକ ଭ୍ରାନ୍ତ ଧାରଣା ରହିଛି। ଏହାକୁ କେବଳ ଶାରୀରିକ ସମ୍ପର୍କ ସହ ଜଡ଼ିତ ରୋଗ ବୋଲି ବିବେଚନା କରାଯାଏ, କିନ୍ତୁ କିଛି ଅଜଣା ବ୍ୟବହାର ମଧ୍ୟ ଏହି ଭୂତାଣୁର ବ୍ୟାପକ କାରଣ ହୋଇପାରେ।
ବିଶେଷଜ୍ଞଙ୍କ ଅନୁଯାୟୀ, ଏଚଆଇଭି କେବଳ ଅସୁରକ୍ଷିତ ଶାରୀରିକ ସମ୍ପର୍କ ମାଧ୍ୟମରେ ନୁହେଁ, ବରଂ ସଂକ୍ରମିତ ରକ୍ତ, ସଂକ୍ରମିତ ଇଞ୍ଜେକସନ ଏବଂ ବ୍ୟକ୍ତିଗତ ଜିନିଷର ସାମୁହିକ ବ୍ୟବହାର ମାଧ୍ୟମରେ ମଧ୍ୟ ସଂକ୍ରମଣ ହୋଇପାରେ। ତେଣୁ ଏହାର ପ୍ରତ୍ୟେକ ଦିଗକୁ ବୁଝିବା ଏବଂ ସଂକ୍ରମଣରୁ ବଞ୍ଚିବା ପାଇଁ ପୂର୍ଣ୍ଣ ଜାଗରଣ ରହିବା ଆବଶ୍ୟକ।
ଏଚଆଇଭି ସଂକ୍ରମଣର ଅନ୍ୟ କାରଣଗୁଡ଼ିକ :-
ସଂକ୍ରମିତ ରକ୍ତ ବା ରକ୍ତ ଉତ୍ପାଦ : ଯଦି ରକ୍ତ ଚଢ଼ାଇବା ପୂର୍ବରୁ ଏଚଆଇଭି ପରୀକ୍ଷା କରାଯାଇ ନଥାଏ, ତେବେ ଏହି ଭୂତାଣୁ ଶରୀରରେ ପ୍ରବେଶ କରିପାରେ। ବିଶେଷକରି ଗ୍ରାମାଞ୍ଚଳ କିମ୍ବା ଅଣଆଧିକାରିକ ସେଟଅପରେ ଏହି ଝୁଁକି ଅଧିକ।
ଛୁଞ୍ଚି କିମ୍ବା ଇଞ୍ଜେକସନର ବ୍ୟବହାର : ମାଦକ ଦ୍ରବ୍ୟ ସେବନକାରୀ ବ୍ୟକ୍ତି କିମ୍ବା କୌଣସି ରୋଗରେ ବାରମ୍ବାର ଇଞ୍ଜେକସନ ନେଉଥିବା ଲୋକେ ଯଦି ଏକା ଛୁଞ୍ଚି ବ୍ୟବହାର କରନ୍ତି, ତେବେ ଏଚଆଇଭି ଦ୍ରୁତ ଗତିରେ ବ୍ୟାପିପାରେ।
ସଂକ୍ରମିତ ବ୍ୟକ୍ତିଙ୍କ ବ୍ୟବହୃତ ଜିନିଷ : ରେଜର, ଟୁଥବ୍ରସ କିମ୍ବା ବ୍ଲେଡ଼ ଭଳି ଜିନିଷ ଯଦି ସଂକ୍ରମିତ ବ୍ୟକ୍ତିଙ୍କ ସହ ବ୍ୟବହାର କରାଯାଏ ଏବଂ ତାହା ଉପରେ ରକ୍ତର ଅଂଶ ଥାଏ, ତେବେ ସଂକ୍ରମଣର ଆଶଙ୍କା ରହିଛି।
ଗର୍ଭାବସ୍ଥା କିମ୍ବା ସ୍ତନ୍ୟପାନ ସମୟରେ : ଯଦି ମାଆ ଏଚଆଇଭି ପଜିଟିଭ ଅଛନ୍ତି, ତେବେ ଚିକିତ୍ସା ବିନା ଏହି ଭୂତାଣୁ ଗର୍ଭସ୍ଥ ଶିଶୁକୁ କିମ୍ବା ସ୍ତନ୍ୟପାନ ସମୟରେ ମଧ୍ୟ ବ୍ୟାପିପାରେ।
ଏଚଆଇଭି ପଜିଟିଭ ବ୍ୟକ୍ତିଙ୍କ ପାଇଁ ସାବଧାନତା : ରେଜର, ବ୍ଲେଡ଼, ଟୁଥବ୍ରସ ଆଦି ବ୍ୟକ୍ତିଗତ ଜିନିଷ ଅନ୍ୟମାନଙ୍କ ସହ ବ୍ୟବହାର କରନ୍ତୁ ନାହିଁ।
ସବୁବେଳେ ସୁରକ୍ଷିତ ଶାରୀରିକ ସମ୍ପର୍କ ରଖନ୍ତୁ ଏବଂ କଣ୍ଡୋମର ବ୍ୟବହାର କରନ୍ତୁ।
ଡାକ୍ତରଙ୍କ ପରାମର୍ଶ ଅନୁଯାୟୀ ଆଣ୍ଟିରେଟ୍ରୋଭାଇରାଲ ଥେରାପି ନିୟମିତ ଗ୍ରହଣ କରନ୍ତୁ।
ସଂକ୍ରମିତ ବ୍ୟକ୍ତି କେବେ ବି ରକ୍ତଦାନ କରନ୍ତୁ ନାହିଁ।
ଏଚଆଇଭି/ଏଡ଼ସ କୌଣସି ଶାସ୍ତି ନୁହେଁ, ବରଂ ଏକ ସଂକ୍ରମଣ ଯାହାକୁ ସତର୍କତା ଓ ଜାଗରଣ ଦ୍ୱାରା ରୋକାଯାଇପାରେ। ଏହାକୁ କେବଳ ଶାରୀରିକ ସମ୍ପର୍କ ସହ ଜଡ଼ିତ ରୋଗ ବୋଲି ଭାବିବା ଭୁଲ। ଭ୍ରାନ୍ତ ଧାରଣା ତ୍ୟାଗ କରି ସଠିକ ସୂଚନା ଗ୍ରହଣ କରିବା ଆଜିର ସମୟର ସବୁଠାରୁ ବଡ଼ ଆବଶ୍ୟକତା।
