କୋଲକାତା : ଜଣେ ମହିଳା ଡାକ୍ତରଙ୍କ ସହ ଯୌନ ନିର୍ଯାତନା ଓ ହତ୍ୟା ଘଟଣା ପରେ ଧର୍ମଘଟ କରୁଥିବା ଆର.ଜି.କର ମେଡିକାଲ କଲେଜ ଓ ହସ୍ପିଟାଲର କନିଷ୍ଠ ଡାକ୍ତରମାନେ ମଙ୍ଗଳବାର ଅନଶନ ଶେଷ କରିଛନ୍ତି। ମୁଖ୍ୟମନ୍ତ୍ରୀ ମମତା ବାନାର୍ଜୀ ଏବଂ ବିକ୍ଷୋଭକାରୀଙ୍କ ପ୍ରତିନିଧିଙ୍କ ସହ ଏକ ଗୁରୁତ୍ୱପୂର୍ଣ୍ଣ ବୈଠକ ପରେ କନିଷ୍ଠ ଡାକ୍ତରମାନେ ୧୮ ଦିନର ଅନଶନ ପ୍ରତ୍ୟାହାର କରିବାକୁ ନିଷ୍ପତ୍ତି ନେଇଛନ୍ତି।
ସୂଚନାଯୋଗ୍ୟ ଯେ, ଗତ ଅଗଷ୍ଟମାସରେ ଆରଜି କର ହସପିଟାଲର ସେମିନାର ହଲରେ ଜଣେ କନିଷ୍ଠ ଡାକ୍ତରଙ୍କୁ ଦୁଷ୍କର୍ମ ଓ ହତ୍ୟା ଘଟଣାକୁ ନେଇ ସାରା ଦେଶରେ ଅସନ୍ତୋଷ ପ୍ରକାଶ ପାଇଥିଲା। ଅଗଷ୍ଟ ୯ ତାରିଖରେ ମହିଳା ଡାକ୍ତରଙ୍କ ମୃତଦେହ ମିଳିଥିଲା, ଯେଉଁଥିରେ ଗୁରୁତର ଆଘାତ ଲାଗିଥିଲା। ଏହାର ପରଦିନ କୋଲକାତା ପୁଲିସ ଏହି ମାମଲାରେ ଜଣେ ବେସାମରିକ ସ୍ୱେଚ୍ଛାସେବୀଙ୍କୁ ଗିରଫ କରିଥିଲା। ଅଗଷ୍ଟ ୧୩ ତାରିଖରେ କଲିକତା ହାଇକୋର୍ଟ ତଦନ୍ତ କୁ କୋଲକାତା ପୋଲିସରୁ ସିବିଆଇକୁ ହସ୍ତାନ୍ତର କରିବାକୁ ନିର୍ଦ୍ଦେଶ ଦେଇଥିଲେ, ଯାହା ଅଗଷ୍ଟ ୧୪ ରେ ଏହାର ତଦନ୍ତ ଆରମ୍ଭ କରିଥିଲା ।
