ପ୍ୟାରିସ୍ : ପ୍ୟାରିସରେ ୨୦୨୪ ଅଲିମ୍ପିକ୍ସର ଉଦଘାଟନୀ ସମାରୋହକୁ ଆଉ ମାତ୍ର କିଛି ଘଣ୍ଟା ରହିଥିବାବେଳେ ସୁରକ୍ଷାକୁ ନେଇ ଏକ ବଡ଼ ପ୍ରଶ୍ନବାଚୀ ଦେଖାଦେଇଛି । କେତେକ ଉପଦ୍ରବକାରୀ ଫ୍ରାନ୍ସର ହାଇସ୍ପିଡ ରେଳ ନେଟୱାର୍କ ଉପରେ ଆକ୍ରମଣ କରି ବ୍ୟାପକ ଭଙ୍ଗାରୁଜ୍ଜା କରିଛନ୍ତି । ଫଳରେ ରେଳଚଳାଚଳକୁ ନେଇ ଅଚଳାବସ୍ଥା ସୃଷ୍ଟି ହୋଇଛି । ଦେଶର ହାଇସ୍ପିଡ ନେଟୱର୍କକୁ ଦୁର୍ବଳ କରିବା ଉଦ୍ଦେଶ୍ୟରେ ଏହା କରାଯାଇଛି ବୋଲି ଅଧିକାରୀମାନେ କହିଛନ୍ତି। ଏହି କାରଣରୁ ଅନେକ ଟ୍ରେନ୍ ବାତିଲ ହୋଇଥିବା ବେଳେ ଅନେକ ଟ୍ରେନ୍ ବିଳମ୍ବିତ ହୋଇଛି।
ଫ୍ରାନ୍ସ ରେଳପଥର ଆଟଲାଣ୍ଟିକ୍, ଉତ୍ତର ଓ ପୂର୍ବ ରେଳପଥରେ ଏହି ଆକ୍ରମଣ ହୋଇଥିଲା। ଏହି ଆକ୍ରମଣ ଯୋଗୁଁ ଗ୍ରୀଷ୍ମ ଛୁଟିରେ ଥିବା ଦେଶରେ ପ୍ରାୟ ୮୦,୦୦୦ ଯାତ୍ରୀ ପ୍ରଭାବିତ ହୋଇଛନ୍ତି।
ଫ୍ରାନ୍ସର ରେଳ କମ୍ପାନୀ ଏସଏନସିଏଫର ମୁଖ୍ୟ ଜିନ୍ ପିଏରେ ଫାରାଣ୍ଡୁ ଏଏଫପି ନ୍ୟୁଜ୍ ଏଜେନ୍ସିକୁ କହିଛନ୍ତି ଯେ ଆକ୍ରମଣକାରୀମାନେ ଡ୍ରାଇଭରଙ୍କ ସୁରକ୍ଷା ସୂଚନା ବାର୍ତ୍ତା ବହନ କରୁଥିବା ଅନେକ ଫାଇବର-ଅପ୍ଟିକ୍ କେବୁଲରେ ନିଆଁ ଲଗାଇ ଦେଇଥିଲେ। ସେଗୁଡ଼ିକୁ ଗୋଟିଏ ପରେ ଗୋଟିଏ ଠିକ୍ କରିବାକୁ ପଡ଼ିବ, ଏକ ମାନୁଆଲ୍ ଅପରେସନ୍ ଯେଉଁଥିପାଇଁ ଶହ ଶହ ଶ୍ରମିକ ଆବଶ୍ୟକ । ରେଳବାଇ ଅଧିକାରୀମାନେ କହିଛନ୍ତି ଯେ କ୍ଷୟକ୍ଷତି ବହୁତ ଅଧିକ ଏବଂ ମରାମତି କାର୍ଯ୍ୟ ସତର୍କତାର ସହ କରାଯିବ।
