ନୂଆଦିଲ୍ଲୀ: ଏକ ନୂଆ ସରକାରୀ ରିପୋର୍ଟରେ ଏକ ଚିନ୍ତାଜନକ ସତ୍ୟ ପଦାକୁ ଆସିଛି। ୨୦୨୨ରେ ଦେଶରେ ଅନୁସୂଚିତ ଜାତିଙ୍କ ବିରୋଧରେ ହୋଇଥିବା ଅତ୍ୟାଚାରର ପ୍ରାୟ ୯୭.୭% ମାମଲା ୧୩ଟି ରାଜ୍ୟରେ ରେକର୍ଡ ହୋଇଛି । ପୁଣି ଏହି ୧୩ଟି ରାଜ୍ୟ ମଧ୍ୟରୁ ଉତ୍ତରପ୍ରଦେଶ, ରାଜସ୍ଥାନ ଓ ମଧ୍ୟପ୍ରଦେଶରେ ଏଭଳି ଅପରାଧ ସର୍ବାଧିକ ରହିଛି। ଚିନ୍ତାଜନକ କଥା ହେଉଛି ଏହି ୧୩ଟି ରାଜ୍ୟରେ ଓଡ଼ିଶା ବି ରହିଛି । ଅନୁସୂଚୀତ ଜାତି ଓ ଜନଜାତିଙ୍କ ବିରୋଧୀ ଅତ୍ୟାଚାର କ୍ଷେତ୍ରରେ ଓଡ଼ିଶା ଦେଶରେ ୫ମ ସ୍ଥାନରେ ରହିଛି ।
ଉତ୍ତରପ୍ରଦେଶ ଏପରି ମାମଲାରେ ଦେଶରେ ନଂ୧ ରହିଛି ବୋଲି ଅନୁସୂଚିତ ଜାତି ଓ ଜନଜାତି (ଅତ୍ୟାଚାର ନିବାରଣ) ଆଇନ ଅଧୀନରେ ନିକଟରେ ଏକ ସରକାରୀ ରିପୋର୍ଟରେ ଏହି ସୂଚନା ଦିଆଯାଇଛି। ଅନୁସୂଚିତ ଜନଜାତି (ଏସଟି) ବିରୋଧରେ ଅଧିକାଂଶ (୯୮.୯୧% ) ଅତ୍ୟାଚାର ମଧ୍ୟ ଏହି ୧୩ଟି ରାଜ୍ୟରେ ରେକର୍ଡ ହୋଇଛି ।
୨୦୨୨ରେ ଅନୁସୂଚିତ ଜାତି (ଏସସି) ଆଇନ ଅଧୀନରେ ଦାୟର ହୋଇଥିବା ୫୧,୬୫୬ଟି ମାମଲା ମଧ୍ୟରୁ ଉତ୍ତରପ୍ରଦେଶରେ ୨୩.୭୮% ବା ୧୨,୨୮୭ଟି ମାମଲା ରହିଛି । ରାଜସ୍ଥାନରେ ୮,୬୫୧ (୧୬.୭୫%) ଏବଂ ମଧ୍ୟପ୍ରଦେଶରେ ୭,୭୩୨ (୧୪.୯୭%) ମାମଲା ରହିଛି। ଅନୁସୂଚିତ ଜାତିଙ୍କ ବିରୋଧରେ ଅତ୍ୟାଚାର ମାମଲା ଅଧିକ ଥିବା ଅନ୍ୟ ରାଜ୍ୟଗୁଡ଼ିକ ହେଲା ବିହାରରେ ୬,୭୯୯ (୧୩.୧୬%), ଓଡ଼ିଶାରେ ୩,୫୭୬ (୬.୯୩%) ଏବଂ ମହାରାଷ୍ଟ୍ରରେ ୨,୭୦୬ (୫.୨୪%)। ଏହି ୬ଟି ରାଜ୍ୟରେ ସମୁଦାୟ ମାମଲାର ପ୍ରାୟ ୮୧% ରହିଛି।
