ନୂଆଦିଲ୍ଲୀ: ଯଦି ଆପଣ ମହାକାଶ ବିଜ୍ଞାନ ପ୍ରତି ରୁଚି ରଖୁଛନ୍ତି, ତେବେ ସୋମବାର ରାତିର ଦୃଶ୍ୟ ଆପଣଙ୍କ ପାଇଁ ଆଶ୍ଚର୍ଯ୍ୟଜନକ ହୋଇପାରେ । ଏଥର ଅଗଷ୍ଟ ୧୧ ଓ ୧୨ ତାରିଖ ରାତିରେ ଆକାଶରେ ଉଲକା ବର୍ଷା ଦେଖିବାକୁ ମିଳିବ । ବୀର ବାହାଦୁର ସିଂହ ପ୍ଲାନେଟୋରିୟମର ଜ୍ୟୋତିର୍ବିଜ୍ଞାନୀ ଅମର ପାଲ ସିଂହ କହିଛନ୍ତି ଯେ ରବିବାର ରାତି ପ୍ରାୟ ୮ଟାରୁ ଏହି ଆଶ୍ଚର୍ଯ୍ୟଜନକ ଦୃଶ୍ୟ ଦେଖିବାକୁ ମିଳିବ। କିନ୍ତୁ ୧୧ ତାରିଖ ବିଳମ୍ବିତ ରାତିରୁ ୧୨ ତାରିଖ ସକାଳ ପର୍ଯ୍ୟନ୍ତ ଏହି ଉଲକା ବର୍ଷା ସ୍ପଷ୍ଟଭାବରେ ଦେଖାଯିବ। ଏଥର ଅଗଷ୍ଟ ୧୧ରୁ ୧୨ ତାରିଖ ରାତିରେ ଆପଣ ଗୋଟିଏ ଘଣ୍ଟାରେ ଅତି କମରେ ୬୦ରୁ ୧୦୦ ଉଲକା ପତନ ଦେଖିପାରିବେ, ଯଦିଓ ସେମାନଙ୍କ ରୂପ ମଧ୍ୟ ପାଣିପାଗ ଘଟଣା ଉପରେ ନିର୍ଭର କରେ ।
ଏହି ଅଗଷ୍ଟ ମାସରେ ହେଉଥିବା ଉଲକା ବର୍ଷାକୁ ପର୍ସିଡ୍ସ ଉଲକା ବର୍ଷା ମଧ୍ୟ କୁହାଯାଏ, କାରଣ ଏହି ଉଲକାପିଣ୍ଡ ପର୍ସିୟସ୍ ନକ୍ଷତ୍ରମଣ୍ଡଳରୁ ଆସିଥିବା ଦେଖାଯାଏ । ଯେଉଁ ସ୍ଥାନରୁ ଉଲକାପାତ ଆରମ୍ଭ ହୋଇଥାଏ ତାହାକୁ ଜ୍ୟୋତିର୍ବିଜ୍ଞାନର ଭାଷାରେ ମିଟିଓର ରେଡିଏଣ୍ଟ ପଏଣ୍ଟ କୁହାଯାଏ । କିନ୍ତୁ ମନେ ରଖିବା ଜରୁରୀ ଯେ ନକ୍ଷତ୍ରମଣ୍ଡଳର ଏକ ବିନ୍ଦୁରୁ ଉଲକାପିଣ୍ଡ ବାହାରୁଥିବା ଦେଖାଯାଉଥିଲେ ବି ପ୍ରକୃତରେ ତାହା ଏକ ଭ୍ରମ ମାତ୍ର । ପ୍ରକୃତ କଥା ହେଉଛି ନକ୍ଷତ୍ରଗୁଡ଼ିକ ଆମଠାରୁ ବହୁ ଦୂରରେ ଅଛନ୍ତି । ଅନ୍ୟପକ୍ଷରେ ଉଲକାଗୁଡ଼ିକ ଭୂପୃଷ୍ଠରୁ ପ୍ରାୟ ୧୦୦ରୁ ୧୨୦ କିଲୋମିଟର ଉଚ୍ଚରେ ଥାଆନ୍ତି ଓ ସେଗୁଡ଼ିକ ବାୟୁମଣ୍ଡଳରେ ପହଞ୍ଚିବା ପରେ ଜଳିଯାଆନ୍ତି ଓ ତାହା ଆମ ଆଖିକୁ ତାରା ଖସିବା ପରି ଦେଖାଯାଏ । ଭାରତର କେତେକ ସ୍ଥାନରେ ଏହି ମହାଜାଗତିକ ଘଟଣା ଦେଖାଯାଇପାରେ, କିନ୍ତୁ ସବୁକିଛି ପାଣିପାଗ ଉପରେ ନିର୍ଭର କରେ । ଆକାଶ ସ୍ପଷ୍ଟ ଥିଲେ ଏହା ଦେଖାଯିବ ।
