ପ୍ରଭୁ ରାମଙ୍କର କୌଣସି ଅସ୍ତିତ୍ବ ନଥିଲା: ଷ୍ଟାଲିନଙ୍କ ମନ୍ତ୍ରୀ

ଚେନ୍ନାଇ: ତାମିଲନାଡୁର ମୁଖ୍ୟମନ୍ତ୍ରୀ ଏମ.କେ ଷ୍ଟାଲିନଙ୍କ ମନ୍ତ୍ରୀ ଏସ.ଏସ୍ ଶିବଶଙ୍କର ପ୍ରଭୁ ରାମଙ୍କୁ ନେଇ ଦେଇଥିବା ବୟାନକୁ ନେଇ ବିବାଦ ଦେଖାଦେଇଛି | ସେ କହିଥିଲେ ଯେ ରାମଙ୍କ ଅସ୍ତିତ୍ୱର କୌଣସି ଐତିହାସିକ ପ୍ରମାଣ ନାହିଁ | ଏନେଇ ତାମିଲନାଡୁ ବିଜେପି ମୁଖ୍ୟ କେ ଅନ୍ନାମଲାଇ ଡିଏମକେ ଉପରେ ଆକ୍ରମଣ କରି ଏକ ପୋଷ୍ଟରେ କହିଛନ୍ତି, “ପ୍ରଭୁ ଶ୍ରୀ ରାମଙ୍କ ସହ ଡ଼ିଏମକେର ଏଭଳି ବୟାନ ଆଶ୍ଚର୍ଯ୍ୟ କରିଦେଇଛି | ଗତ ସପ୍ତାହରେ ଡିଏମକେ ଆଇନ ମନ୍ତ୍ରୀ ରଘୁପତି ଏହା ଘୋଷଣା କରିଥିଲେ ଯେ ପ୍ରଭୁ ଶ୍ରୀ ରାମ ସାମାଜିକ ନ୍ୟାୟର ସର୍ବୋଚ୍ଚ ଚାମ୍ପିଅନ୍, ଧର୍ମନିରପେକ୍ଷତାର ଅଗ୍ରଦୂତ ତଥା ସମସ୍ତଙ୍କ ପାଇଁ ସମାନତାର ସମର୍ଥକ ଥିଲେ | ସେ ଆହୁରି ମଧ୍ୟ କହିଛନ୍ତି, “ଏହା ହାସ୍ୟାସ୍ପଦ ଯେ ଡ଼ିଏମକେ ଭାବୁଛି ଯେ ତାମିଲନାଡୁର ଇତିହାସ ୧୯୬୭ ମସିହାରେ ଆରମ୍ଭ ହୋଇଥିଲା | ଡିଏମକେ ହଠାତ୍ ଦେଶର ସମୃଦ୍ଧ ସଂସ୍କୃତି ଏବଂ ଇତିହାସକୁ ଭଲ ପାଉଛି । ବର୍ତ୍ତମାନ ଡିଏମକେ ମନ୍ତ୍ରୀ ରଘୁପତି ଏବଂ ଶିବଶଙ୍କର ବସି ପ୍ରଭୁ ରାମଙ୍କ ଉପରେ ତର୍କ କରନ୍ତୁ ଓ ଏକ ନିଷ୍କର୍ଷରେ ପହଞ୍ଚନ୍ତୁ | ବାସ୍ତବରେ ଡିଏମକେ ନେତା ତଥା ତାମିଲନାଡୁର ମନ୍ତ୍ରୀ ଶିବଶଙ୍କର ଏକ କାର୍ଯ୍ୟକ୍ରମକୁ ସମ୍ବୋଧିତ କରିବା ସମୟରେ ପ୍ରଭୁ ରାମଙ୍କ ମନ୍ଦିର ଉପରେ ବିବାଦୀୟ ମନ୍ତବ୍ୟ ଦେଇଥିଲେ। ସେ କହିଥିଲେ ଯେ ପ୍ରଭୁ ରାମଙ୍କ ଅସ୍ତିତ୍ବ ସହ ଜଡିତ କୌଣସି ଐତିହାସିକ ପ୍ରମାଣ ନାହିଁ। ଯାହାଦ୍ୱାରା ଏହା ନିଶ୍ଚିତ ହୋଇପାରିବ ଯେ ପ୍ରଭୁ ରାମ ବିଦ୍ୟମାନ ଅଛନ୍ତି | ତାଙ୍କର ଏହି ବିବାଦୀୟ ବିବୃତ୍ତି ପରେ ରାଜନୈତିକ ବିବାଦ ତୀବ୍ର ହୋଇଛି।