ଭଞ୍ଜନଗର: ଗଞ୍ଜାମ ଜିଲ୍ଲା ଭଞ୍ଜନଗର ଥାନା ଜିଲୁଣ୍ଡି ଗାଁରେ ଉତ୍ତେଜନା । ଗତ ୨୯ ତାରିଖରେ ଅଜଣା ଗାଡ଼ି ଧକ୍କାରେ ଗୁଡିଆମ୍ବା ଗାଁର ଅଚ୍ୟୁତାନନ୍ଦ ସାହୁ ଗୁରୁତର ଆହତ ହୋଇଥିଲେ । ପରେ ବ୍ରହ୍ମପୁର ମେଡ଼ିକାଲରେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ହୋଇଥିଲା । ଏନେଇ କ୍ଷତିପୂରଣ ଦାବିରେ ପରିବାର ଲୋକ ଏବଂ ସ୍ଥାନୀୟ ଅଞ୍ଚଳବାସୀ ଜିଲୁଣ୍ଡି ଠାରେ ଶବ ରଖି ବ୍ରହ୍ମପୁର-ଭଞ୍ଜନଗର ଜାତୀୟ ରାଜପଥକୁ ଅବରୋଧ କରିଥିଲେ ।
ଫଳରେ ବହୁ ସଂଖ୍ୟକ ଯାତ୍ରୀବାହୀ ବସ୍ ଏବଂ ଟ୍ରକ୍ ଅଟକି ରହିଥିଲା । ଖବର ପାଇ ଘଟଣା ସ୍ଥଳରେ ଭଂଜନଗର ଥାନା ପୋଲିସ ଏବଂ ତହସିଲଦାର ପହଞ୍ଚିଥିଲେ । ମୃତକଙ୍କ ପରିବାରକୁ ୩୦ ହଜାର ଟଙ୍କା ତତ୍କାଳ ସହାୟତା ପ୍ରଦାନ କରିଥିଲେ । ଏହା ସହ ଦୁର୍ଘଟଣା ଘଟାଇଥିବା ଟ୍ରକ୍ କୁ ଧରିବା ସହ ଅନ୍ୟାନ୍ୟ ସହାୟତା ପାଇଁ ସହଯୋଗ କରିବାକୁ ପ୍ରତିଶ୍ରୁତି ଦେବାପରେ ରାସ୍ତାରୋକ ହଟିଥିଲା ।
