ଦୀର୍ଘ ସମୟ ଧରି ଠିଆ ହେବା, ଅଧିକ ସମୟ ବସି ରହିବା କିମ୍ବା ଅଧିକ ପରିଶ୍ରମ କରିବା ପରେ ପାଦରେ ଯନ୍ତ୍ରଣା କିମ୍ବା ଝିମ୍ଝିମ୍ ହେବା ସାଧାରଣ କଥା। କିନ୍ତୁ କୌଣସି ଆଘାତ କିମ୍ବା ଅଧିକ ପରିଶ୍ରମ ନକରି ଯଦି ବାରମ୍ବାର ପାଦରେ ଯନ୍ତ୍ରଣା ହେଉଛି, ତେବେ ଏହାକୁ ଅଣଦେଖା କରିବା ଠିକ୍ ନୁହେଁ। ଶରୀରରେ କିଛି ଜରୁରୀ ଭିଟାମିନ୍ ଓ ଖଣିଜ ପଦାର୍ଥର ଅଭାବ ଯୋଗୁଁ ମଧ୍ୟ ଏଭଳି ସମସ୍ୟା ଦେଖାଦେଇଥାଏ।
ଶରୀରର ହାଡ଼, ମାଂସପେଶୀ ଓ ସ୍ନାୟୁର ସାଧାରଣ କାର୍ଯ୍ୟ ପାଇଁ ଭିଟାମିନ D ଗୁରୁତ୍ୱପୂର୍ଣ୍ଣ। ଏହାର ଅଭାବ ହେଲେ ଶରୀରରେ ଯନ୍ତ୍ରଣା ଓ ଦୁର୍ବଳତା ଭଳି ଲକ୍ଷଣ ଦେଖାଦେଇଥାଏ। କେତେକ ଲୋକଙ୍କଠାରେ ପିଠି, ଅଣ୍ଟା ଓ ପାଦରେ ମଧ୍ୟ ଯନ୍ତ୍ରଣା ଅନୁଭୂତ ହୋଇପାରେ। ସୂର୍ଯ୍ୟକିରଣ ଭିଟାମିନ୍ ଡିର ଏକ ପ୍ରମୁଖ ଉତ୍ସ ହୋଇଥିବା ବେଳେ ଆବଶ୍ୟକତା ଅନୁସାରେ ଡାକ୍ତରଙ୍କ ପରାମର୍ଶ ନେବା ଉଚିତ। କ୍ୟାଲସିୟମ କେବଳ ହାଡ଼କୁ ମଜବୁତ କରିବା ପାଇଁ ନୁହେଁ, ମାଂସପେଶୀର ସଠିକ୍ କାର୍ଯ୍ୟ ପାଇଁ ମଧ୍ୟ ଆବଶ୍ୟକ। ଶରୀରରେ କ୍ୟାଲସିୟମର ଅଭାବ ରହିଲେ ମାଂସପେଶୀରେ ଟାଣ, କ୍ରାମ୍ପ ଓ ଅସ୍ୱସ୍ତି ଭଳି ସମସ୍ୟା ହୋଇପାରେ। କ୍ଷୀର, ଦହି, ପନିର ଭଳି ଖାଦ୍ୟରେ କ୍ୟାଲସିୟମ ମିଳିଥାଏ।
ସେହିପରି, ଶରୀରରେ ଆବଶ୍ୟକୀୟ ପୋଷକତତ୍ତ୍ୱର ଅଭାବ ରୋକିବା ପାଇଁ ସନ୍ତୁଳିତ ଖାଦ୍ୟ ଗ୍ରହଣ ଜରୁରୀ। ଖାଦ୍ୟରେ ସବୁଜ ପନିପରିବା, କ୍ଷୀର ଓ ଦୁଗ୍ଧଜାତ ଖାଦ୍ୟ, ଅଣ୍ଡା, ଡାଲି, ଫଳ ଓ ବିଭିନ୍ନ ପୋଷକତତ୍ତ୍ୱଯୁକ୍ତ ଖାଦ୍ୟ ସାମିଲ କରିବା ଉଚିତ। ନିୟମିତ ଶାରୀରିକ କ୍ରିୟାକଳାପ ମଧ୍ୟ ସ୍ୱାସ୍ଥ୍ୟ ପାଇଁ ଉପକାରୀ। ତେବେ ପାଦ ଯନ୍ତ୍ରଣାର କାରଣ କେବଳ ଭିଟାମିନ୍ କିମ୍ବା ଖଣିଜ ଅଭାବ ନୁହେଁ। ରକ୍ତସଞ୍ଚାଳନ ସମସ୍ୟା, ସ୍ନାୟୁ ସମ୍ବନ୍ଧୀୟ ସମସ୍ୟା କିମ୍ବା ଅନ୍ୟାନ୍ୟ ଶାରୀରିକ କାରଣ ମଧ୍ୟ ଏଥିପାଇଁ ଦାୟୀ ହୋଇପାରେ। ତେଣୁ ଯନ୍ତ୍ରଣା ଦୀର୍ଘ ସମୟ ରହିଲେ, ବାରମ୍ବାର ହେଲେ କିମ୍ବା ଅନ୍ୟ ଲକ୍ଷଣ ସହ ଦେଖାଦେଲେ ଡାକ୍ତରଙ୍କ ପରାମର୍ଶ ନେବା ଉଚିତ।
