ପ୍ରୟାଗରାଜ: ଉତ୍ତରପ୍ରଦେଶର ପ୍ରୟାଗରାଜରେ ଏବେ ମହାକୁମ୍ଭ ମେଳା ଚାଲିଛି। ଜାନୁଆରି ୧୩ରୁ ଆରମ୍ଭ ହୋଇଥିବା ଏହି ମହା ମେଳା ଫେବ୍ରୁଆରି ୨୬ରେ ଶେଷ ହେବ। କୋଟି କୋଟି ଲୋକ ଏହି ମେଳା ପରିଦର୍ଶନ କରିବାକୁ ଆସୁଥିବା ବେଳେ କିଛି ଲୋକ ଭିଡ଼ ଓ ଅଧିକ ବାଟ ଚାଲିବାକୁ ପଡ଼ିବା ଭୟରେ ଆସୁନଥିବା ଦେଖିବାକୁ ମିଳିଛି। ଏବେ ଶ୍ରଦ୍ଧାଳୁଙ୍କ ଚାଲିବା ଦୂରତାକୁ ଏଡାଇବାକୁ ଏକ ବଡ଼ ବ୍ୟବସ୍ଥା କରାଯାଇଛି। ଏବେ ଶ୍ରଦ୍ଧାଳୁ ବିମାନବନ୍ଦରରୁ ହେଲିକପ୍ଟର ମାଧ୍ୟମରେ ସିଧାସଳଖ ତ୍ରିବେଣୀ ସଙ୍ଗମରେ ପହଞ୍ଚିପାରିବେ। ଉତ୍ତର ପ୍ରଦେଶ ଇକୋ-ଟୁରିଜିମ୍ ଡେଭଲପମେଣ୍ଟ ବୋର୍ଡ ଏବଂ ଫ୍ଲାଏ ଓଲା ମହାକୁମ୍ଭ ପାଇଁ ଏହି ହେଲିକପ୍ଟର ସେବା ଆରମ୍ଭ କରିଛନ୍ତି।ଏହି ସେବା ଆରମ୍ଭ ହେବା ଦ୍ବାରା ଭକ୍ତମାନେ ଅଧିକ ବାଟ ଚାଲିବାର କଷ୍ଟ ନକରି ପବିତ୍ର ବୁଡ଼ ପକାଇପାରିବେ। ବିମାନବନ୍ଦରରେ ଏକ ହେଲିକପ୍ଟର ଉପଲବ୍ଧ ରହିବ, ଯାହା ଯାତ୍ରୀମାନଙ୍କୁ ସିଧା ତ୍ରିବେଣୀ ସଙ୍ଗମ ନିକଟସ୍ଥ ବୋଟ୍ କ୍ଲବରେ ଥିବା ଏକ ହେଲିପ୍ୟାଡକୁ ନେଇଯିବ। ସେଠାରୁ, ଭକ୍ତମାନଙ୍କୁ ଏକ ଡଙ୍ଗା ଯୋଗାଇ ଦିଆଯିବ ଯାହା ସେମାନଙ୍କୁ ବୁଡ଼ ପାଇଁ ସିଧା ସଙ୍ଗମକୁ ନେଇଯିବ। ଏହା ପରେ ସେମାନେ ସେହି ଡଙ୍ଗା ମାଧ୍ୟମରେ ହେଲିପ୍ୟାଡକୁ ଫେରିବେ ଏବଂ ହେଲିକପ୍ଟର ସେମାନଙ୍କୁ ପ୍ରୟାଗରାଜ ବିମାନବନ୍ଦରରେ ଆଣି ଛାଡ଼ିଦେବ।
ଏହି ସେବା ପାଇବା ପାଇଁ ପ୍ରତି ବ୍ୟକ୍ତି ପିଛା ୩୫,୦୦୦ ଟଙ୍କା ଖର୍ଚ୍ଚ ହେବ, ଯାହା ଦ୍ଵାରା ଭକ୍ତମାନେ ନଚାଲି ତ୍ରିବେଣୀ ସଙ୍ଗମ ଦର୍ଶନ କରିପାରିବେ। ଏହି ସେବା ବିଶେଷକରି ବୟସ୍କ ଏବଂ ଭିନ୍ନକ୍ଷମ ବ୍ୟକ୍ତିମାନଙ୍କ ପାଇଁ ଲାଭଦାୟକ ଯେଉଁମାନେ ଅଧିକ ଦୂର ଚାଲିପାରନ୍ତି ନାହିଁ।
ଏହି ସେବା ଆରମ୍ଭ ହେବା ପରଠାରୁ ଶହ ଶହ ଲୋକ ଏହାର ଲାଭ ଉଠାଉଥିବା ଜଣାପଡ଼ିଛି।
