ଏଲଟିଆର ଆଶାୟୀ ଶିକ୍ଷକ ସଂଘ ପକ୍ଷରୁ ରାଜଧାନୀରେ ଆନ୍ଦୋଳନ

ଭୁବନେଶ୍ୱର : ଏଲଟିଆର ଆଶାୟୀ ଶିକ୍ଷକ ସଂଘ ପକ୍ଷରୁ ଆଜି ରାଜଧାନୀରେ ବଡ଼ଧରଣର ଆନ୍ଦୋଳନ ଦେଖିବାକୁ ମିଳିଛି ।  ହଜାର ହଜାର ସଂଖ୍ୟାରେ ଚାକିରୀ ଆଶାୟୀ ଭୁବନେଶ୍ୱରସ୍ଥିତ ଓଏସ୍ ଏସ୍ ସି କାର୍ଯ୍ୟାଳୟକୁ ଘେରାଉ କରି ଜୋରଦାର ପ୍ରତିବାଦ କରିଥିଲେ ।  ଓଡ଼ିଆ, ଆର୍ଟ୍ସ, ସଂସ୍କୃତ ଓ ହିନ୍ଦୀ ପରି ଚାରିଟି ବିଭାଗର ଏଲଟିଆର ଆଶାୟୀ ଶିକ୍ଷକମାନେ ତୁରନ୍ତ ଫାଇନାଲ ମେରିଟ୍ ଲିଷ୍ଟ ପ୍ରକାଶ କରିବାକୁ ଦାବି ଉଠାଇ ଧାରଣାରେ ବସିଥିଲେ ।  ଦୀର୍ଘଦିନ ଧରି ଫଳାଫଳ ପ୍ରକାଶ ନ ହେବାରୁ ପ୍ରାର୍ଥୀମାନଙ୍କ ମଧ୍ୟରେ ଅସନ୍ତୋଷ ବୃଦ୍ଧି ପାଇଛି ।  ହେଲେ ଏହି ଦାବି ପ୍ରତି ଓଏସ୍ ଏସ୍ ସି ପକ୍ଷରୁ କୌଣସି ସ୍ପଷ୍ଟ ପ୍ରତିକ୍ରିୟା ନ ମିଳିବାରୁ ସଂଘ ଗର୍ଜନ କରିଛି ।  ଯଦି ଶୀଘ୍ର ମେରିଟ୍ ଲିଷ୍ଟ ପ୍ରକାଶ ନ କରାଯାଏ, ତେବେ ଆନ୍ଦୋଳନକୁ ଆହୁରି ତୀବ୍ର କରାଯିବ ବୋଲି ଆଶାୟୀମାନେ ସଚେତନ କରିଛନ୍ତି ।