ଡିଜିଟାଲ ପେମେଣ୍ଟ ଦ୍ବାରା ଲୋକେ ଘରେ ବସି ସହଜରେ ପେମେଣ୍ଟ କରି ପାରୁଛନ୍ତି । କିନ୍ତୁ ଏବେ ବି ସ୍କୁଲ ମାନଙ୍କରେ ଡିଜିଟାଲ ପେମେଣ୍ଟ ପରିବର୍ତ୍ତେ ନଗଦ ପେମେଣ୍ଟ କରିବାକୁ କୁହାଯାଏ । ଯେଉଁଥିପାଇଁ ନାନା ସମସ୍ୟାର ସମ୍ମୁଖୀନ ହୁଅନ୍ତି ଅଭିଭାବକ । ଏହି ସବୁ ସମସ୍ୟାକୁ ନଜରରେ ରଖି ନୂଆ ନିର୍ଦ୍ଦେଶାବଳୀ ଆଣିଛି ଶିକ୍ଷା ମନ୍ତ୍ରଣାଳୟ ।
ଶିକ୍ଷା ମନ୍ତ୍ରଣାଳୟ ଡିଜିଟାଲ୍ ପେମେଣ୍ଟ ପ୍ଲାଟଫର୍ମ ବ୍ୟବହାର ସମ୍ପର୍କରେ ନୂଆ ନିର୍ଦ୍ଦେଶାବଳୀ ଜାରି କରିଛି, ଯାହା “ଇଜ୍ ଅଫ୍ ସ୍କୁଲିଂ” ଭିଜନକୁ ଆହୁରି ଆଗକୁ ବଢାଇଛି । ସ୍କୁଲ ଫି ସଂଗ୍ରହ ପ୍ରକ୍ରିୟାରେ ସ୍ୱଚ୍ଛତା ବୃଦ୍ଧି କରିବା ହେଉଛି ଏହାର ଲକ୍ଷ୍ୟ । ସ୍କୁଲ ଶିକ୍ଷା ଏବଂ ସାକ୍ଷରତା ବିଭାଗର ସଚିବ ସଞ୍ଜୟ କୁମାର ସମସ୍ତ ରାଜ୍ୟ ବୋର୍ଡର ବରିଷ୍ଠ ଅଧିକାରୀ, NCERT, CBSE, ନବୋଦୟ ବିଦ୍ୟାଳୟ ସମିତି, କେନ୍ଦ୍ରୀୟ ବିଦ୍ୟାଳୟ ସମିତି ଏବଂ ଶିକ୍ଷକ ଶିକ୍ଷା ପରିଷଦକୁ ଏନେଇ ଏକ ଚିଠି ଲେଖିଛନ୍ତି ।
ଫି ସଂଗ୍ରହ ପ୍ରକ୍ରିୟାରୁ ପରୀକ୍ଷା ଫି ସଂଗ୍ରହ ପ୍ରକ୍ରିୟା ପର୍ଯ୍ୟନ୍ତ ସ୍କୁଲ ଆଡମିସନ୍ ପ୍ରକ୍ରିୟାକୁ ନଗଦ ପେମେଣ୍ଟରୁ ଡିଜିଟାଲ୍ ପେମେଣ୍ଟକୁ ସ୍ଥାନାନ୍ତରିତ କରିବାକୁ ଆହ୍ୱାନ କରାଯାଇଛି । ଏଥି ପାଇଁ ୟୁନିଫାଏଡ୍ ପେମେଣ୍ଟସ୍ ଇଣ୍ଟରଫେସ୍ (UPI), ମୋବାଇଲ୍ ୱାଲେଟ୍ ଏବଂ ନେଟ୍ ବ୍ୟାଙ୍କିଂ ଭଳି ଡିଜିଟାଲ୍ ପେମେଣ୍ଟ ପ୍ଲାଟଫର୍ମ ବ୍ୟବହାର କରାଯାଇପାରିବ । ଅଭିଭାବକମାନଙ୍କୁ ସମସ୍ତ ପୂର୍ବ ଡିଜିଟାଲ୍ ପେମେଣ୍ଟ ଅପ୍ସନ ଯୋଗାଇ ଦିଆଯିବା ଉଚିତ ବୋଲି କୁହାଯାଇଛି ।
ଶିକ୍ଷା ସଚିବ ତାଙ୍କ ଚିଠିରେ ଉଲ୍ଲେଖ କରିଛନ୍ତି ଯେ ନଗଦ ପେମେଣ୍ଟ ଅପେକ୍ଷା ଡିଜିଟାଲ୍ ପେମେଣ୍ଟ ଅନେକ ସୁବିଧା ଦିଏ । ଡିଜିଟାଲ୍ ପେମେଣ୍ଟ ଦ୍ବାରା ଅଭିଭାବକ ଏବଂ ଛାତ୍ରଛାତ୍ରୀମାନେ ଘରେ ବସି ପେମେଣ୍ଟ କରିପାରିବେ । ସମାନ ଭାବେ ସ୍କୁଲଗୁଡ଼ିକ ଫିସ୍ ର ହିସାବ ମଧ୍ୟ ଠିକ ରହିବ । ଫି ରେକର୍ଡ ରଖିବା ସହ ଫି କଲେକ୍ସନର ରିଏଲ୍ ଟାଇମ୍ ଟ୍ରାକିଂ କରିବା ସ୍କୁଲ୍ ପାଇଁ ସହଜ ହେବ ।
ଫି ସମ୍ପର୍କରେ ଅଭିଭାବକଙ୍କ ଅଭିଯୋଗର ତଦନ୍ତ କରିବା ସହଜ ହେବ । କେନ୍ଦ୍ର ସରକାରଙ୍କ ନିର୍ଦ୍ଦେଶ ଅନୁଯାୟୀ ଅଭିଭାବକମାନଙ୍କୁ ଡିଜିଟାଲ ପେମେଣ୍ଟ କରିବାକୁ ଉତ୍ସାହିତ କରାଯାଇଛି ଏବଂ ଏଥିରେ ସକାରାତ୍ମକ ଫଳାଫଳ ମିଳୁଛି।ଶିକ୍ଷାବିତ୍ ଏବଂ VSPK ସ୍କୁଲ ଶିକ୍ଷା ସମାଜର ଅଧ୍ୟକ୍ଷ, ଏସ.କେ. ଗୁପ୍ତା କହିଛନ୍ତି ଯେ ସ୍କୁଲ ଶିକ୍ଷା ଏବଂ ଭିତ୍ତିଭୂମିରେ ଉନ୍ନତି ସହିତ, ଡିଜିଟାଲ ପେମେଣ୍ଟ ସ୍କୁଲଗୁଡ଼ିକ ଉପରେ ଗୁରୁତ୍ୱପୂର୍ଣ୍ଣ ପ୍ରଭାବ ପକାଇବ । ସ୍କୁଲଗୁଡ଼ିକ ଏହି ପଦକ୍ଷେପରେ କେନ୍ଦ୍ର ସରକାରଙ୍କୁ ପୂର୍ଣ୍ଣ ସହଯୋଗ କରୁଛନ୍ତି ।
ଶିକ୍ଷା ମନ୍ତ୍ରଣାଳୟର ନିର୍ଦ୍ଦେଶାବଳୀ ଅନୁଯାୟୀ, ଅଟୋମେଟେଡ୍ ପରମାନେଣ୍ଟ ଏକାଡେମିକ୍ ଆକାଉଣ୍ଟ ରେଜିଷ୍ଟ୍ରି (APAAR ID), କିମ୍ବା ଆଡମିଶନ୍ ID ବ୍ୟବହାର କରି ଫି ଜମା କରାଯାଇପାରିବ । କେନ୍ଦ୍ର ସରକାରୀ ସ୍କୁଲଗୁଡ଼ିକରେ ଅନେକ ସୁବିଧା କରିଛି ଶିକ୍ଷା ବିଭାଗ, ଯେଉଁଥିରେ ପଏଣ୍ଟ ଅଫ୍ ସେଲ୍ (PoS), ମେସିନ୍ ମାଧ୍ୟମରେ ଫି ପ୍ରଦାନର ସୁବିଧା ସାମିଲ ରହିଛି । ସମସ୍ତ ସରକାରୀ, ସରକାରୀ-ସହାୟତାପ୍ରାପ୍ତ ଏବଂ ଘରୋଇ ସ୍କୁଲଗୁଡ଼ିକୁ ଡିଜିଟାଲ୍ ଫି ପେମେଣ୍ଟ ପ୍ରକ୍ରିୟା ଗ୍ରହଣ କରିବାକୁ ନିର୍ଦ୍ଦେଶ ଦେଇଛି ଶିକ୍ଷା ମନ୍ତ୍ରଣାଳୟ । ‘‘ଇଜ୍ ଅଫ୍ ସ୍କୁଲିଂ’’ର ଲକ୍ଷ୍ୟ ହେଉଛି ସ୍କୁଲରେ ଆଡମିଶନ୍ ପ୍ରକ୍ରିୟାକୁ ସରଳ ଏବଂ ସହଜ କରିବା ।
