ନୂଆଦିଲ୍ଲୀ : ଦିଲ୍ଲୀରୁ ଭାନକୁଭର ଯାଉଥିବା ଏୟାର ଇଣ୍ଡିଆର ବିମାନ AI ୧୮୫ ଭୁଲ ବିମାନ ପଠାଇଦେଲା । ତେଣୁ ଏୟାର ଇଣ୍ଡିଆର ବିମାନ ଚୀନର ମଝି ଆକାଶରେ ୮ ଘଣ୍ଟା ଧରି ବୁଲିବା ପରେ ୟୁ ଟର୍ଣ୍ଣ କରି ଦିଲ୍ଲୀ ଫେରିଥିଲା ।
ସୂଚନାନୁଯାୟୀ, ବିମାନ ଦିଲ୍ଲୀରୁ ଉଡ଼ାଣ ଭରିଥିଲା । କିନ୍ତୁ ଚୀନର ମଝି ଆକାଶରେ ପ୍ରାୟ ୮ ଘଣ୍ଟା ଧରି ଘୂରି ବୁଲିଥିଲା । ଦୀର୍ଘ ସମୟ ପର୍ଯ୍ୟନ୍ତ ଚୀନର କୁଜିଂ ଦେଇ ଆକାଶରେ ଘୂରି ବୁଲିବା ପରେ ପୁଣି ଦିଲ୍ଲୀ ଫେରିବାକୁ ନିଷ୍ପତ୍ତି ନିଆଯାଇଥିଲା । ସୁରକ୍ଷାକୁ ଦୃଷ୍ଟିରେ ରଖି ଏଭଳି ପଦକ୍ଷେପ ନିଆଯାଇଛି ବୋଲି ସ୍ପଷ୍ଟ କରିଛି ଏୟାର ଇଣ୍ଡିଆ । ବିମାନ ଫେରି ଆସିବା ପରେ ଦିଲ୍ଲୀ ବିମାନବନ୍ଦରରେ ଗ୍ରାଉଣ୍ଡ ଟିମ୍ ଯାତ୍ରୀମାନଙ୍କୁ ସାହାଯ୍ୟ କରିଥିଲେ ଏବଂ ହୋଟେଲରେ ସେମାନଙ୍କୁ ରଖିବାର ବ୍ୟବସ୍ଥା କରିଥିଲେ । ହଠାତ୍ ବିମାନର ପରିବର୍ତ୍ତନ ଯାତ୍ରୀମାନଙ୍କୁ ଚିନ୍ତାରେ ପକାଇଥିଲା । କିନ୍ତୁ ଟେକ୍ନିକାଲ ଯାଞ୍ଚ ଏବଂ ସୁରକ୍ଷା ପ୍ରୋଟୋକଲ୍ କାରଣରୁ କମ୍ପାନୀ ଏଭଳି ନିଷ୍ପତ୍ତି ନେଇଥିଲା ।
ଏଥିସହ ବିମାନ କମ୍ପାନୀ କହିଛି ଯେ, ସାଧାରଣତଃ ଏହି ରୁଟରେ ବୋଇଂ୭୭୭-୩୩୭ର ବିମାନ ବ୍ୟବହାର କରାଯାଇଥିଲା । କିନ୍ତୁ ଏହି ଦିନ ବୋଇଂ ୭୭୭-୨୩୨ ବିମାନ ଭାନକୁଭରକୁ ଉଡ଼ାଣ କରିଥିଲେ । ଯାତ୍ରୀଙ୍କ ଅସୁବିଧା ପାଇଁ କମ୍ପାନୀ କ୍ଷମା ପ୍ରାର୍ଥନା କରିବା ସହ କର୍ମଚାରୀ ଟିମକୁ ସୁରକ୍ଷିତ ଭାବେ ଅବତରଣ କରିଥିବା ସ୍ପଷ୍ଟ କରିଛି କମ୍ପାନୀ ।
ଅନ୍ୟପଟେ ଏୟାର ଇଣ୍ଡିଆର ସରକାରୀ ବିବୃତ୍ତି ଅନୁଯାୟୀ, ପରିଚାଳନା ସମ୍ବନ୍ଧୀୟ ସମସ୍ୟାର ସମାଧାନ ହେବା ପରେ ସମସ୍ତ ଯାତ୍ରୀଙ୍କୁ ଗତକାଲି ସକାଳେ ଅନ୍ୟ ଏକ ବିମାନରେ ସେମାନଙ୍କର ଗନ୍ତବ୍ୟସ୍ଥଳ ଭାନକୁଭରକୁ ପଠାଯାଇଥିଲା । ଯାତ୍ରୀଙ୍କ ସୁରକ୍ଷା କମ୍ପାନୀ ପାଇଁ ଅତ୍ୟନ୍ତ ଗୁରୁତ୍ବପୂର୍ଣ୍ଣ ବୋଲି କୁହାଯାଇଛି । ହେଲେ ଏପର୍ଯ୍ୟନ୍ତ ସୁଦ୍ଧା ପରିଚାଳନା ସମସ୍ୟାର ସଠିକ୍ ବିବରଣୀ କମ୍ପାନୀ ଦେଇନାହିଁ ।
