ଭୁବନେଶ୍ୱର : ନାଇଟ୍ ବ୍ଲକିଂ ବେଳେ ରାସ୍ତାରେ ବୁଲୁଥିବା ଏକ କୁକୁର ଛୁଆର ଜୀବନ ବଞ୍ଚାଇ ଚର୍ଚ୍ଚାକୁ ଆସିଛନ୍ତି ଜଣେ ମହିଳା ପୋଲିସ ଅଧିକାରୀ । ତେବେ ଏହି ଯୁବ ଆଇପିଏସ୍ ହେଉଛନ୍ତି ସୋନାଲି ସିଂହ ପରମାର । ଯେଉଁ ହାତ ସାହସର ସହିତ ବନ୍ଧୁକ ଉଠାଇ ଗୁଳି ଚଳାଇ ପାରେ ସେ ହାତ ଯତ୍ନର ସହିତ ନିରୀହ ଜୀବଙ୍କ ସାହାଯ୍ୟ ବି କରିପାରେ । ଏ କଥାକୁ ପ୍ରମାଣ କରି ଦେଖାଇଛନ୍ତି ସୋନାଲି । ଚନ୍ଦ୍ରଶେଖରପୁର ଥାନା ଅନ୍ତର୍ଗତ ଡମଣା ଛକର ଘଟଣା । କଡ଼ା ନାଇଟ ବ୍ଲକିଂ ଓ ଚେକିଂରେ ସାମିଲ ଥିଲେ ପୋଲିସ ଅଧିକାରୀଙ୍କ ସହିତ ଜୋନ ୬ ଏସିପି ଦାୟିତ୍ବରେ ଥିବା ସୋନାଲି ସିଂହ ପରମାର୍ । ଆଉ ସେତିକି ବେଳେ ରାସ୍ତାରେ ହଠାତ ଅନ୍ୟପାର୍ଶ୍ବକୁ ଯାଇଥିଲେ ସୋନାଲି । କେହି କିଛି ପ୍ରଥମେ ବୁଝି ପାରିଲେନି । ନାଇଟ୍ ଚେକିଂ ବେଳେ ସୋନାଲି ଏମିତି କାହିଁକି ଏକା ଆରପଟକୁ ଯାଉଛନ୍ତି ସମସ୍ତଙ୍କ ମନରେ ପ୍ରଶ୍ନ ଆସିଥିଲା ସତ। କିନ୍ତୁ ନୀରିହ କୁକୁର ଛୁଆକୁ ହାତରେ ଧରିବା ପରେ ସବୁ କିଛି ସ୍ପଷ୍ଟ ହୋଇଯାଇଥିଲା । ରାସ୍ତାରେ ଗାଡ଼ି ମଟର ଦ୍ରୁତ ଗତିରେ ଯାଉଥିବା ବେଳେ ଗୋଟିଏ କୁକୁର ଛୁଆ ରାସ୍ତା ଉପରେ ବୁଲାବୁଲି କରୁଥିବା ଦେଖିଥିଲେ ସୋନାଲି । କୁକୁର ଛୁଆ ଜୀବନ ପ୍ରତି ବିପଦ ଥିବା ଜାଣିପାରି ଦୌଡ଼ି ଯାଇ କୁକୁର ଛୁଆଟିକୁ ମଝି ରାସ୍ତାରୁ ଉଠାଇ ସୁରକ୍ଷିତ ସ୍ଥାନରେ ଛାଡ଼ି ଦେଇଥିଲେ ।
ଏପରି କାର୍ଯ୍ୟ ପୁଣି ଥରେ ଖାକି ଭିତରେ ଥିବା ଜଣେ ହୃଦୟବାନ ମଣିଷର ଚିତ୍ର ସହ ଜୀବେ ଦୟାର ଯଥାର୍ଥକୁ ଦେଖାଇଛି । ଆଜିକାଲି ଯୁଗରେ ଏଭଳି ନିସ୍ବାର୍ଥପର ସେବାଭାବ ଖୁବ କମ ଲୋକଙ୍କ ପାଖରେ ଦେଖିବାକୁ ମିଳିଥାଏ ଏବଂ ଏପରି ଘଟଣା ଆମକୁ ଅନେକ ପ୍ରେରଣା ଯୋଗାଇଥାଏ । ସୋନାଲିଙ୍କ ଏହି ଦୟା ମନୋଭାବ ଦ୍ୱାରା ଗୋଟିଏ ନୀରିହ କୁକୁରର ଜୀବନ ବଞ୍ଚିପାରିଛି, ଯାହା ଖୁବ ପ୍ରଶଂସନୀୟ ।
