ନୂଆଦିଲ୍ଲୀ: ନିକଟରେ ତାଞ୍ଜାନିଆରେ ମାର୍ବର୍ଗ ଭୂତାଣୁ ବ୍ୟାପିବା ପରେ ୮ ଜଣଙ୍କ ମୃତ୍ୟୁ ଘଟିଥିବାରୁ ଦେଶ ଓ ଏହାର ପଡ଼ୋଶୀ ଦେଶରେ ଚିନ୍ତା ବଢ଼ିଯାଇଛି। ଲୋକଙ୍କୁ ସତର୍କ ରହିବା ପାଇଁ କୁହାଯାଇଛି। ଏହି ମାର୍ବର୍ଗ ଭୂତାଣୁ ରୋଗ (ଏମ୍ଭିଡି) ମାର୍ବର୍ଗ ହେମୋରେଜିକ୍ ଜ୍ୱର ସୃଷ୍ଟି କରେ, ଯାହାର ମୃତ୍ୟୁ ହାର ଅଧିକ ରହିଛି। ବିଶ୍ୱ ସ୍ୱାସ୍ଥ୍ୟ ସଂଗଠନ (ହୁ) ଜାନୁଆରି ୧୧ରେ ଦେଶର ଉତ୍ତରରେ ଥିବା କାଗେରା ଅଞ୍ଚଳର ଦୁଇଟି ଜିଲ୍ଲାରେ ୯ ଜଣ ସନ୍ଦିଗ୍ଧ ସଂକ୍ରମିତ ଚିହ୍ନଟ ହୋଇଥିବା ସୂଚନା ଦେଇଛି, ଯେଉଁଥିରେ ୮ ଜଣଙ୍କର ମୃତ୍ୟୁ ଘଟିଛି।
ଦୁଇ ଜିଲ୍ଲାରୁ ସନ୍ଦିଗ୍ଧ ଏମ୍ଭିଡି ମାମଲା ରିପୋର୍ଟ ହେବା ଭୌଗୋଳିକ ବିସ୍ତାରକୁ ସୂଚାଉଛି। ଆକ୍ରାନ୍ତଙ୍କ ବିଳମ୍ବରେ ଚିହ୍ନଟ ଓ ଆଇସୋଲେସନ୍ ଏବଂ କଣ୍ଟାକ୍ଟ ଟ୍ରେସିଂ ଜାରି ରହିଥିବାରୁ ବର୍ତ୍ତମାନର ସଂକ୍ରମଣ ସମ୍ପର୍କରେ ସମ୍ପୂର୍ଣ୍ଣ ସୂଚନାର ଅଭାବ ଥିବା ଜଣାପଡ଼ୁଛି। ଆହୁରି ଅଧିକ ଆକ୍ରାନ୍ତ ଚିହ୍ନଟ ହେବେ ବୋଲି ହୁ ପକ୍ଷରୁ କୁହାଯାଇଛି। ରୋଗ ନିରୀକ୍ଷଣରେ ଉନ୍ନତି ଆସିବା ପରେ ଆଗାମୀ ଦିନରେ ଅଧିକ ମାମଲା ସାମ୍ନାକୁ ଆସିବ ବୋଲି ଆଶା କରାଯାଉଛି। ଏହି ରୋଗ ଚିନ୍ତାଜନକ କାରଣ ଉପଯୁକ୍ତ ଚିକିତ୍ସା ବିନା ଏହାଦ୍ୱାରା ଅସୁସ୍ଥ ହେଉଥିବା ୮୮ ପ୍ରତିଶତ ଲୋକଙ୍କ କ୍ଷେତ୍ରରେ ଏହା ମାରାତ୍ମକ ହୋଇପାରେ। ତାଞ୍ଜାନିଆରେ ସନ୍ଦିଗ୍ଧ ସଂକ୍ରମଣ ଜାତୀୟ ଓ ଆଞ୍ଚଳିକ ସ୍ତର ପାଇଁ ଅଧିକ ବିପଦ ରଖୁଥିବା ବେଳେ ବିଶ୍ବସ୍ତରରେ ଏହା କମ୍ ବୋଲି ହୁ ଆକଳନ କରିଛି।
ମାର୍ବର୍ଗ ଭୂତାଣୁ ରୋଗ (ଏମ୍ଭିଡି) ପାଇଁ ଇନକ୍ୟୁବେସନ୍ ଅବଧି ୨ରୁ ୨୧ ଦିନ ପର୍ଯ୍ୟନ୍ତ ହୋଇଥାଏ। ଏହା ହଠାତ୍ ପ୍ରବଳ ଜ୍ୱର, ମାଂସପେଶୀ ଯନ୍ତ୍ରଣା, ପ୍ରବଳ ମୁଣ୍ଡବିନ୍ଧା ଓ ଅତ୍ୟଧିକ ଥକାପଣ ସହିତ ଲକ୍ଷଣ ଦେଖାଇବା ଆରମ୍ଭ କରେ। ତୃତୀୟ ଦିନ ବେଳକୁ ରୋଗୀମାନେ ତରଳ ଝାଡ଼ା, ପେଟରେ ଯନ୍ତ୍ରଣା, ବାନ୍ତି ଓ ଓକାର ଅନୁଭବ କରିପାରନ୍ତି। ଲକ୍ଷଣ ଆରମ୍ଭ ହେବାର ୨ରୁ ୭ ଦିନ ମଧ୍ୟରେ ଦେହରେ କୁଣ୍ଡେଇ ହେଉ ନ ଥିବା ଫଳାଦାଗ ଦେଖାଯାଏ। ପଞ୍ଚମ ଦିନରୁ ରକ୍ତସ୍ରାବ ଲକ୍ଷଣ ଦେଖାଯାଏ। ବାନ୍ତି ଓ ମଳରେ ରକ୍ତ ପଡ଼ିବା ସହ ନାକରୁ ରକ୍ତ ବାହାରିବା, ମାଢ଼ିରୁ ରକ୍ତସ୍ରାବ ଏବଂ ଭେନିପଙ୍କଚର (ଇଂଜେକ୍ସନ ଦେବା ପାଇଁ ଛୁଞ୍ଚି ଫୋଡ଼ାଯାଉଥିବା) ସ୍ଥାନରୁ ରକ୍ତସ୍ରାବ ହୋଇପାରେ। ଦ୍ବନ୍ଦ୍ବ, ଚିଡ଼ଚିଡ଼ାପଣ ଓ ଆକ୍ରୋଶ ଭଳି ସ୍ନାୟବିକ ଲକ୍ଷଣ ଦେଖାଦେଇପାରେ। ବିରଳ କ୍ଷେତ୍ରରେ ପରବର୍ତ୍ତୀ ପର୍ଯ୍ୟାୟରେ ଅର୍କିଟିସ୍ (ଅଣ୍ଡକୋଷ ପ୍ରଦାହ) ଦେଖାଯାଏ। ସାଂଘାତିକ କ୍ଷେତ୍ରରେ, ସାଧାରଣତଃ ଲକ୍ଷଣ ଆରମ୍ଭ ହେବାର ୮ରୁ ୯ ଦିନ ପରେ ମୃତ୍ୟୁ ହୁଏ। ପ୍ରାୟତଃ ଗୁରୁତର ରକ୍ତ କ୍ଷୟ ଓ ମାନସିକ ଆଘାତ କାରଣରୁ ଏହା ହୁଏ।
ମାର୍ବର୍ଗ ଭୂତାଣୁ ଫଳ-ବାଦୁଡ଼ିରୁ ଲୋକଙ୍କଠାରେ ବ୍ୟାପିଥାଏ ଏବଂ ମଣିଷରୁ ମଣିଷକୁ ସଂକ୍ରମଣ କରିଥାଏ। ବର୍ତ୍ତମାନ ଏମ୍ଭିଡି ପାଇଁ କୌଣସି ଅନୁମୋଦିତ ଟିକା କିମ୍ବା ଆଣ୍ଟିଭାଇରାଲ ଚିକିତ୍ସା ନାହିଁ। କିନ୍ତୁ ଅନେକ ଟିକା ଓ ଔଷଧ ଥେରାପି ବିକଶିତ ହେଉଛି। ଏହି ଭୂତାଣୁ ଇବୋଲା ସହ ସାମଞ୍ଜସ୍ୟ ରଖିଛି। ଉଭୟ ରୋଗ ବିରଳ କିନ୍ତୁ ଅଧିକ ମୃତ୍ୟୁ ହାର ସହିତ ପ୍ରକୋପ ସୃଷ୍ଟି କରିପାରେ। ମାର୍ବର୍ଗ ଭୂତାଣୁଜନିତ ମୃତ୍ୟୁ ହାର ଅତୀତରେ ୨୪%ରୁ ୮୮% ମଧ୍ୟରେ ରହିଛି।
