କଣ୍ଟାବାଞ୍ଜି : ଦିନରେ ଜାଳିବ ରାତିରେ ଢାଳିବ । ଗତ କିଛିଦିନ ହେବ ରାଜ୍ୟରେ ତାପମାତ୍ରା ହୁ ହୁ ହୋଇ ବଢ଼ିବାରେ ଲାଗିଛି । ଆଜି ୧୫ ଜିଲ୍ଲାରେ ୪୦ ଡିଗ୍ରୀ ଟପି ପାରେ ତାପମାତ୍ରା । ରାଜଧାନୀରେ ଦିନରେ ଖରାର ପ୍ରକୋପ ଓ ଗରମ । ଗୁଳୁଗୁଳିରେ ଅସ୍ତବ୍ୟସ୍ତ ହୋଇପଡ଼ୁଛି ଜନଜୀବନ । ରାତି ହେଲେ ବର୍ଷା ପବନ ହେଉଛି । ଯାହାଫଳରେ ସାମାନ୍ୟ ରାହାତ ମିଳୁଛି । ଆଜି ପଶ୍ଚିମ ଓଡ଼ିଶାର କିଛି ସ୍ଥାନରେ ୪୫ ଡିଗ୍ରୀ ତାପମାତ୍ରା ଟପିପାରେ । ବଲାଙ୍ଗୀର, ଝାରସୁଗୁଡ଼ା, ସମ୍ବଲପୁର ଓ ସୋନପୁରରେ ଗ୍ରୀଷ୍ମ ପ୍ରବାହ ବହିବା ନେଇ ପୂର୍ବାନୁମାନ କରିଛି ପାଣିପାଗ ବିଭାଗ । କଣ୍ଟାବାଞ୍ଜିରେ ପାରଦ ୪୨ଡିଗ୍ରୀ ।
ବଢ଼ୁଛି ଖରାର ପ୍ରକୋପ । ଅସହ୍ୟ ହେଲାଣି ତାତି। ତାପମାତ୍ରା ବଢ଼ିବା ନେଇ ଚିନ୍ତାରେ ଅଞ୍ଚଳବାସୀ । କାମ ନଥିଲେ ଘରୁ ବାହାରୁ ନାହାଁନ୍ତି ଲୋକେ । ଥଣ୍ଡା ପାନୀୟ, ବିଭିନ୍ନ ଫଳ ଦୋକାନ, ତରବୁଜ ଆଖୁରସ ଦୋକାନରେ ଲୋକଙ୍କ ଭିଡ଼ ଜମୁଛି । ସେପଟେ ୧୭ ତାରିଖରେ କିଛି ଜିଲ୍ଲାରେ କାଳବୈଶାଖୀ ସମ୍ଭାବନା ରହିଛି । ଉତ୍ତର ଓଡ଼ିଶାର ମୟୂରଭଞ୍ଜ, କେନ୍ଦୁଝର ଓ ବାଲେଶ୍ବରରେ ଘଡ଼ଘଡ଼ି ସହ ବର୍ଷା ହୋଇପାରେ । ୧୮ ଓ ୧୯ ତାରିଖରେ ଗଞ୍ଜାମ, ଗଜପତି, ରାୟଗଡ଼ା, କୋରାପୁଟ ଓ ମାଲକାନଗିରିରେ ଘଡ଼ଘଡ଼ି ସହ ବର୍ଷା ନେଇ ପାଣିପାଗ ବିଭାଗ ଆକଳନ କରିଛି ।
