ନୂଆଦିଲ୍ଲୀ : ଦୁଇ ଦିନିଆ ସିକିମ୍ ଗସ୍ତରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ। ଏହି ଗସ୍ତ ସମୟରେ, ସେ ରାଜ୍ୟ ଗଠନର ୫୦ ତମ ବାର୍ଷିକୀ ଉପଲକ୍ଷେ ସୁବର୍ଣ୍ଣ ଜୟନ୍ତୀ ସମାରୋହର ସମାପନୀ ଉତ୍ସବରେ ଯୋଗଦେବେ। ଏବଂ ୪ ହଜାର କୋଟିରୁ ଅଧିକ ମୂଲ୍ୟର ଅନେକ ବିକାଶମୂଳକ ପ୍ରକଳ୍ପର ଉଦଘାଟନ, ଭିତ୍ତିପ୍ରସ୍ତର ସ୍ଥାପନ କରିବାର କାର୍ଯ୍ୟକ୍ରମ ରହିଛି। ପ୍ରଧାନମନ୍ତ୍ରୀ ଆଜି ଅପରାହ୍ନ ପ୍ରାୟ ୩ଟାରେ ଗ୍ୟାଙ୍ଗଟକରେ ପହଞ୍ଚିବେ। ଏପ୍ରିଲ ୨୮ ତାରିଖରେ, ସେ ଗ୍ୟାଙ୍ଗଟକ ଅର୍କିଡାରିୟମ୍ ପରିଦର୍ଶନ କରିବେ। ଏହାପରେ ପ୍ରାୟ ସକାଳ ୧୦ଟାରେ, ପ୍ରଧାନମନ୍ତ୍ରୀ ପାଲଜୋର ଷ୍ଟାଡିୟମରେ ସୁବର୍ଣ୍ଣ ଜୟନ୍ତୀ ସମାରୋହର ସମାପନୀ ଉତ୍ସବରେ ଯୋଗଦେବେ। ସେଠାରେ ସେ ବିଭିନ୍ନ କ୍ଷେତ୍ରରେ ପ୍ରକଳ୍ପ ଉଦଘାଟନ କରିବେ। ଏବଂ ଏକ ସାଧାରଣ ସମାବେଶକୁ ସମ୍ବୋଧିତ କରିବେ। ସ୍ୱାସ୍ଥ୍ୟକ୍ଷେତ୍ରରେ ପ୍ରଧାନମନ୍ତ୍ରୀ ମୋଦୀ ୟାଙ୍ଗାଙ୍ଗରେ ଏକ ୧୦୦ ଶଯ୍ୟା ବିଶିଷ୍ଟ ଆୟୁର୍ବେଦ ହସ୍ପିଟାଲର ଶିଳାନ୍ୟାସ କରିବେ । ଏବଂ ଏନଆଇଟି ଦେଓରାଲିରେ ଏକ ୩୦ ଶଯ୍ୟା ବିଶିଷ୍ଟ ସମନ୍ୱିତ ସୋୱା ରିଗପା ହସ୍ପିଟାଲର ଉଦଘାଟନ କରିବେ।
ସେହିପରି ଶିକ୍ଷା କ୍ଷେତ୍ରରେ ସେ ୟାଙ୍ଗାଙ୍ଗରେ ସିକିମ ବିଶ୍ୱବିଦ୍ୟାଳୟର ସ୍ଥାୟୀ କ୍ୟାମ୍ପସ, ନେତାଜୀ ସୁଭାଷ ଚନ୍ଦ୍ର ବୋଷ ଉତ୍କର୍ଷ ବିଶ୍ୱବିଦ୍ୟାଳୟର ପ୍ରଶାସନିକ ଭବନ, ହେଲେନ ଲେପଚା ମେଡିକାଲ କଲେଜ ଏବଂ ଡେଣ୍ଟାମ ପ୍ରଫେସନାଲ୍ କଲେଜର ଉଦଘାଟନ କରିବେ। ଏହା ବ୍ୟତୀତ ହେ-ଗ୍ୟାଥାଙ୍ଗରେ ମଡେଲ ଆବାସିକ ସ୍କୁଲ, ମାଙ୍ଗଶିଳାରେ ନୂତନ ମଡେଲ ଡିଗ୍ରୀ କଲେଜ, ବୁମତାର ଗୁମ୍ଫାରେ ମଠ ଛାତ୍ରାବାସ-ସମ-ଶ୍ରେଣୀଗୃହ କୋଠା ଏବଂ ୧୬୦ଟି ସ୍କୁଲରେ ଆଇଟି-ସକ୍ଷମ ଭିତ୍ତିଭୂମି ପ୍ରକଳ୍ପ ମଧ୍ୟ ଉଦଘାଟନ କରାଯିବ। ସଂଯୋଗୀକରଣକୁ ସୁଦୃଢ଼ କରିବା ପାଇଁ, ପ୍ରଧାନମନ୍ତ୍ରୀ ସିରୱାନି ଏବଂ ଲୋୟର ସାମଡୋଙ୍ଗରେ ତିସ୍ତା ନଦୀ ଉପରେ ଦୁଇଟି ଡବଲ-ଲେନ୍ ଷ୍ଟିଲ୍ ଆର୍ଚ୍ ସେତୁର ଭିତ୍ତିପ୍ରସ୍ତର ସ୍ଥାପନ କରିବେ। ସେ ବାରଡାଙ୍ଗରୁ ନାମଚି ଦେଇ କିଚୁଡୁମରା ପର୍ଯ୍ୟନ୍ତ ଉନ୍ନତ ରାସ୍ତା ପ୍ରକଳ୍ପର ମଧ୍ୟ ଉଦଘାଟନ କରିବେ।
