ଲେଫ୍ଟନାଣ୍ଟ ଜେନେରାଲ୍ ଧୀରଜ୍ ସେଠ୍ଙ୍କୁ ଭାରତର ପରବର୍ତ୍ତୀ ସେନାମୁଖ୍ୟ ଭାବେ ନିଯୁକ୍ତ କରାଯାଇଛି। ଭାରତ ସରକାରଙ୍କ ପକ୍ଷରୁ ତାଙ୍କ ନାମକୁ ଆନୁଷ୍ଠାନିକ ଭାବେ ଅନୁମୋଦନ କରାଯାଇଛି। ସେ ବର୍ତ୍ତମାନର ସେନା ମୁଖ୍ୟ ଜେନେରାଲ୍ ଉପେନ୍ଦ୍ର ଦ୍ୱିବେଦୀଙ୍କ ସ୍ଥାନ ନେବେ। ଚଳିତ ମାସ ଶେଷରେ ଜେନେରାଲ୍ ଦ୍ୱିବେଦୀ ସେବାନିବୃତ୍ତ ହେବା ପରେ ଲେଫ୍ଟନାଣ୍ଟ ଜେନେରାଲ୍ ସେଠ୍ ନୂଆ ସେନା ମୁଖ୍ୟଭାବେ କାର୍ଯ୍ୟଭାର ଗ୍ରହଣ କରିବେ। ବର୍ତ୍ତମାନ ସେ ଭାରତୀୟ ସେନାର ଉପମୁଖ୍ୟ ଭାବେ ସେବା ପ୍ରଦାନ କରୁଛନ୍ତି।
ଲେଫ୍ଟନାଣ୍ଟ ଜେନେରାଲ୍ ଧୀରଜ୍ ସେଠ୍ଙ୍କ ସାମରିକ କ୍ୟାରିୟର୍ ଚାରି ଦଶନ୍ଧିରୁ ଅଧିକ ସମୟର ହୋଇଥିବା ବେଳେ ସେ ଦେଶର ଅନେକ ଗୁରୁତ୍ୱପୂର୍ଣ୍ଣ କମାଣ୍ଡରେ ସଫଳତାର ସହ କାର୍ଯ୍ୟ କରିଛନ୍ତି। ସେ ନ୍ୟାସନାଲ୍ ଡିଫେନ୍ସ ଏକାଡେମୀ (ଏନ୍ଡିଏ) ଏବଂ ଇଣ୍ଡିଆନ୍ ମିଲିଟାରି ଏକାଡେମୀ (ଆଇଏମ୍ଏ)ର ଜଣେ ପ୍ରାକ୍ତନ ଛାତ୍ର। ଆଭ୍ୟନ୍ତରୀଣ ସୁରକ୍ଷା, ଆତଙ୍କବାଦ ବିରୋଧୀ ଅଭିଯାନ ଏବଂ ସୀମା ପରିଚାଳନାରେ ତାଙ୍କର ବିପୁଳ ଅଭିଜ୍ଞତା ରହିଛି।ସେ ସେନାର ଏକ ପ୍ରମୁଖ ଷ୍ଟ୍ରାଇକ୍ କର୍ପ୍ସର ନେତୃତ୍ୱ ନେଇଥିବା ବେଳେ ବିଭିନ୍ନ ଜଟିଳ ଅପରେସନାଲ୍ ଥିଏଟର୍ରେ ମଧ୍ୟ କାର୍ଯ୍ୟ କରିଛନ୍ତି। ଏହା ବ୍ୟତୀତ ସେ ଜାତିସଂଘର ଶାନ୍ତିରକ୍ଷା ମିସନ୍ରେ ମଧ୍ୟ ବିଦେଶରେ ଭାରତର ପ୍ରତିନିଧିତ୍ୱ କରିଛନ୍ତି।
ଲେଫ୍ଟନାଣ୍ଟ ଜେନେରାଲ୍ ସେଠ୍ ସେନାରେ ଅତ୍ୟାଧୁନିକ ପ୍ରଯୁକ୍ତିବିଦ୍ୟାର ବ୍ୟବହାର ଏବଂ ଆଧୁନିକୀକରଣ ଉପରେ ବିଶେଷ ଗୁରୁତ୍ୱ ଦେବା ପାଇଁ ଜଣାଶୁଣା। ନୂଆ ସେନା ମୁଖ୍ୟ ଭାବେ ଦାୟିତ୍ୱ ନେବା ପରେ ସୀମାରେ ଚାଲିଥିବା ଉତ୍ତେଜନାର ମୁକାବିଲା କରିବା, ଚୀନ୍ ଓ ପାକିସ୍ତାନ ସୀମାରେ ରଣନୈତିକ ଭିତ୍ତିଭୂମିକୁସୁଦୃଢ଼ କରିବା ଏବଂ ସେନାବାହିନୀକୁ ନୂତନ ପ୍ରଯୁକ୍ତିବିଦ୍ୟାରେ ସଜ୍ଜିତ କରିବା ତାଙ୍କର ପ୍ରମୁଖ ଲକ୍ଷ୍ୟ ରହିବ।
ଧୀରଜ୍ ସେଠ୍ ନୂଆ ସେନାମୁଖ୍ୟ : ଚଳିତ ମାସ ଶେଷରେ ଦାୟିତ୍ୱ ନେବେ
ଆଗକୁ ପଢନ୍ତୁ
