ଭୁବନେଶ୍ୱର : କୋରାପୁଟ ଜିଲ୍ଲାର ପଟାଙ୍ଗୀ ପାହାଡ଼ ଘେରା ପରିବେଶରେ ବଢ଼ିଥିବା ଜଣେ ଯୁବତୀ ଦିନେ ଦିନେ ଏମିତି ଏକ ସ୍ୱପ୍ନ ଦେଖିଥିଲେ, ଯାହା ତାଙ୍କ ଆଖି ଆଗରେ ଦିଶୁଥିବା ପାହାଡ଼ର ସୀମାଠାରୁ ମଧ୍ୟ ଉଚ୍ଚ ଥିଲା । ସେହି ସ୍ୱପ୍ନକୁ ନିଷ୍ଠା, ପରିଶ୍ରମ ଓ ଦୃଢ଼ ମନୋବଳରେ ସାକାର କରିଛନ୍ତି ଆଲିଶା ରାଣୀ ପାଙ୍ଗୀ, ବାଲାରାମ ପାଙ୍ଗୀଙ୍କ ଝିଅ ।
ଆଜି ଆଲିଶାଙ୍କ ପରିଚୟ କେବଳ ପଟାଙ୍ଗୀ ଜଣେ ଯୁବତୀ ଭାବେ ନୁହେଁ, ବରଂ ଓଡ଼ିଶା ସରକାରଙ୍କ ଜଣେ କନିଷ୍ଠ ଯନ୍ତ୍ରୀ (Junior Engineer) ଭାବେ ରହିଛି । ଏହି ସଫଳତା ତାଙ୍କ ପାଇଁ କେବଳ ଏକ ସରକାରୀ ନିଯୁକ୍ତି ନୁହେଁ, ଏହା ହେଉଛି ବର୍ଷ ବର୍ଷର ଶିକ୍ଷା, ପରିଶ୍ରମ, ଧୈର୍ଯ୍ୟ ଓ ନିରବ ସଂଘର୍ଷର ଫଳ । ଆଲିଶାଙ୍କୁ ଓଡ଼ିଶା ସରକାରଙ୍କ ଗୃହ ଓ ନଗର ଉନ୍ନୟନ ବିଭାଗରେ କନିଷ୍ଠ ଯନ୍ତ୍ରୀ ଭାବେ ନିଯୁକ୍ତି ମିଳିଛି । ତାଙ୍କର ପୋଷ୍ଟିଂ RWS&S ଡିଭିଜନ, ମାଲକାନଗିରିରେ ହୋଇଛି । ନିଯୁକ୍ତି ମେଳା ଅବସରରେ ଆଲିଶାଙ୍କୁ ମାନ୍ୟବର ମୁଖ୍ୟମନ୍ତ୍ରୀଙ୍କୁ ପୁଷ୍ପଗୁଚ୍ଛ ଦେଇ ସ୍ୱାଗତ କରିବାର ସୁଯୋଗ ମିଳିଥିଲା । ସେ ମାନ୍ୟବର ମୁଖ୍ୟମନ୍ତ୍ରୀଙ୍କଠାରୁ ନିଜ ନିଯୁକ୍ତିପତ୍ର ଗ୍ରହଣ କରିଥିଲେ । ନିଯୁକ୍ତି ମେଳାରେ ୯ଟି ବିଭାଗରେ ମୋଟ ୧,୩୨୬ଟି ନିଯୁକ୍ତିପତ୍ର ବଣ୍ଟନ କରାଯାଇଥିଲା । ସେଥିମଧ୍ୟରୁ ଗୃହ ଓ ନଗର ଉନ୍ନୟନ ବିଭାଗରେ ୩୬୪ ଜଣଙ୍କୁ ନିଯୁକ୍ତି ମିଳିଥିଲା ।
